މީޑިއާތަކުން ބުނަނީ އޭނާގެ ބަދަލުގައި ގެންނާނެ ކޯޗު ވެސް ކަނޑައަޅައިފި ކަމަށް
ސްޕޯޓިންގެ ކޯޗު ރުބެން އަމޮރިމް
މި ސީޒަނަށް ފަހު ލިވަޕޫލާ ހަވާލުވާން އުޅޭ ވާހަކަ ޕޯޗުގަލްގެ ސްޕޯޓިން ލިޒްބަންގެ ކޯޗު ރުބެން އަމޮރިމް ދޮގުކޮށްފިއެވެ.
އޭނާ މިފަދައިން ވާހަކަ ދައްކަމުން ބުނީ މިވަގުތު އިސްކަންދެނީ ޕޯޗުގަލް ލީގު ސްޕޯޓިން، ލިޒްބަނަށް ހޯދައިދޭން ކަމަށެވެ.
އުމުރުން 39 އަހަރުގެ ޒުވާން ކޯޗު ބުނީ އޭނާ އެންމެ ކަންބޮޑުވަނީ ސްޕޯޓިންއިން އޭނާގެ ބަދަލުގައި އާކޯޗެއް ހޯދައިފިކަމަށް ވާހަކަދެކެވޭތީ ކަމަށެވެ. ރިޕޯޓްތައް ބުނާގޮތުން އޭނާގެ ބަދަލުގައި ސްޕޯޓިންއަށް ގެންނަ ކޯޗަކީ 37 އަހަރުގެ އިނގިރޭސި ކޯޗު އެންތަނީ ބެރީއެވެ. އޭނާއަކީ ބަޔާން މިއުނިކާއި ޕޯޗުގަލް ގައުމީ ޓީމުގެ ވެސް އެސިސްޓެންޓް ކޯޗެވެ.
އަމޮރިމް ލިވަޕޫލަށް ގެންދާ ވާހަކަ ދެކެވެމުންދަނީ އޭނާ ކުޅުވާ އެޓޭކިން ސްޓައިލްގެ ސަބަބުންނެވެ. ސްޕޯޓިންގައި ހޭދަވީ ހަތަރު އަހަރުގެތެރޭގައި އޭނާ ވަނީ ދެ ފަހަރު ޕޯޗުގަލް ކަޕް ކާމިޔާބުކޮށް އެއް ފަހަރު ލީގު ޗެމްޕިއަންކަން ހޯދައިފައެވެ.
