މިޞްރު ތަސްބީހަފަތި ތަފާތު ވަނީ ކީއްވެ؟

އިހުގައި ގެންގުޅުނު އެތައް އާލާތަކާއި ވަސީލަތެއް މުށުތެރޭގައި އެއް ފަހަރާ ގެންގުޅެލެވޭ ވަރަށް އަދުގެ ދުނިޔޭގައި ޓެކްނޮލޮޖީ ކުރިއަރާ ގޮސްފައި އޮތެއް ކަމަކު، ބައެއް އާދަކާދައިގެ ރޫޙު އާލާވަމުން ދާތީ އަދިވެސް ފެނެއެވެ. ޒަމާނީ އެތައް ގޮތަކަށް ގުނާ ޢަދަދު ކުރާނެ ވަސީލަތްތައް ފަހިވެފައި އޮތެއް ކަމަކު، އަދިވެސް ގިނަ ބަޔަކު ގެންގުޅޭ އެކައްޗަކީ ތަސްބީހަ ފައްޗޭ ދެންނެވުމަކުން ގޯހެއް ނެތެވެ. ވަކިން ހާއްސަކޮށް، ރަމަޟާން މަހާ ދިމާކޮށް، ތަސްބީހަ ފައްޗަށް އޮންނަ ޑިމާންޑްވެސް އިތުރުވާކަން ފާހަގަ ކުރަން ޖެހެއެވެ.

މިޞްރުގެ ވެރިކަން ކުރާ ޤާހިރާގެ ޤަދީމީ ސަރަޙައްދުގެ ހަލަބޮލި މަގުތަކުންވެސް ފެންނަނީ އެފަދަ މަންޒަރެކެވެ. މަގުގެ ދެފަރާތުގައި ހުރި ފިހާރަތަކާއި، ފިހާރަތަކުގެ ބޭރުގައި ޖަހާފައިވާ ކަޑަތަކުންވެސް އެންމެ ގިނައިން ފެންނަ އެކައްޗަކަށް ވެފައި އޮތީ ތަސްބީހަފައްޗެވެ. ވިޔަފާރިކުރަން ނުކުމެ އުޅޭ މީހުން ފުދޭ ވަރަކަށް އުޅެމުން ދިޔަ އެ ބާޒާރުގައި އެންމެ ބޮޑު ޑިމާންޑެއް އޮންނަ އެކައްޗަކީވެސް އަތުން ހަދާފައި ހުންނަ ތަސްބީހަފައްޗެވެ.

އިސްލާމީ ޤައުމުތަކުގައި އުފައްދާ ތަސްބީހަތަކާއި މިޞްރުގެ ތަސްބީހަފަތި ތަފާތު ކަމަށް ބުނާ މީހުން މަދެއް ނޫނެވެ. ސަބަބެއް ކަމަށް ބުނަނީ ތަސްބީހަފަތި ހަދާ މީހުންގެ އާދަޔާ ޚިލާފު ފަންނުވެރިކަމެވެ. ތަސްބީހަފަތި ހަދާ މީހުންގެ އަތަށް، އެކަމަށް ބޭނުންވާ ސާމާނު އަރާ ހިސާބުން އެއްވެސް ވަރަކަށް މެޝިނެއްގެ ބޭނުމެއް ނުކުރެއެވެ.

ކަން އެހެން އޮތް ނަމަވެސް، މިޞްރަށް މިއަދު ކުރިމަތިލާން ޖެހިފައި އޮތް އިޤުތިޞާދީ ގޮންޖެހުންތަކުގެ ސީދާ އަސަރުތައް، ތަސްބީހަފަތި ހަދާ މީހުންނަށް ދަނީ ފޯރަމުންނެވެ. ތަސްބީހަފަތި ހަދަން ބޭނުން ކުރާ ސާމާނު ގަންނަން ލިބޭ އަގުތައް ވަނީ އުފުލިފައެވެ. ބައެއް ތަސްބީހަފައްޗަކީ އަގު ހުރި ހިލަ ކަނޑައިގެން ހަދާ ތަސްބީހަފައްޗަށް ވާ އިރު، މިހާރު އެފަދަ ބައެއް ބާވަތްތަކުގެ އަގު އުޅެނީ އަތްފޯރާ ވަރަށް ވުރެ މާ މަތީގައެވެ. ބައެއް ބާވަތްތަކުގެ އަގު އުޅެނީ އެތައް ހާސް ޕައުންޑެއްގައެވެ.  

ޛިކުރު ކުރުމަކީ އެކަމުގައި ދުނިޔެއާއި އާޚިރަތުގައިވެސް ފައިދާ އެކުލެވޭ އަމަލަކަށް ވާ އިރު، ވަކި ޛިކުރެއް ކިޔޭ އަދަދަކާ މެދު ވިސްނަން އިނުމަށް ވުރެ، ތަސްބީހަފައްޗެއް ފަދަ އެއްޗެއް ބޭނުން ކުރުމުން، އެ ކުރެވޭ ޛިކުރަކަށް ފުރިހަމަ ސަމާލުކަން ދިނުމަށް އެހީއަކަށްވެއެވެ.