ޔޫރޯގައި ޖަރުމަނު ވަށައިގެން ބޯޑަރުތައް ޗެކްކުރަނީ
އެންމެ ބޮޑަށް އިސްކަންދޭނީ ގޭންގްތަކާއި ހައްދުފަހަނައަޅައިފައިވާ ޖަމާއަތްތަކުގެ ހަރަކާތްތައް ބެލެހެއްޓުމަށް: މިނިސްޓަރު
ޔޫރޯ 2024ގެ ބައެއް ތައްޔާރީތައް ޖަރުމަނުގައި ކުރިއަށް ދަނީ
މި އަހަރުގެ ޖޫން މަހު ފަށާ ޔޫރޯ ފުޓްބޯޅަ މުބާރާތުގެ ދުވަސްވަރު ޖަރުމަނު ވަށައިގެންވާ އެންމެހާ ހިސާބުތަކުގެ ވަށައިގެން ޗެކްކުރަން ނިންމައިފި އެވެ.
ޖަރުމަނުގެ އިންޓީރިއާ މިނިސްޓަރު ނަންސީ ފިއޭސާ މިހެން ވިދާޅުވީ މުބާރާތުގެ ތެރޭގައި ގާނޫނާ ހިލާފު އެއްވެސް ކަމެއްވިޔަނުދީ އޮމާންކަމާއެކު މުބާރާތް ނިންމާލުމަށް ކުރަންޖެހޭ ހުރިހާ ކަމެއް ކުރާނެ ކަމަށެވެ. އޭނާ މިފަދައިން ވިދާޅުވީ ދާދި ފަހުން ރަޝިޔާގައި ކޮންސެޓެއް ބޭއްވި ހޯލަކަށް ބަޔަކު ދިން ޓެރަރިސްޓް ހަމަލާއާ ގުޅިގެންނެވެ. މިހަމަލާދިން ކަމަށް އެ ގައުމުން ތުހުމަތު ކުރަނީ ހައްދު ފަހަނައަޅައިފައިވާ އިސްލާމީ ގްރޫޕެއްގެ ބަޔަކު ކަމަށެވެ.
ބައިނަލް އަގްވާމީ މުބާރާތްތައް ބާއްވާއިރު ގަވާއިދުން ބޯޑަރު ޗެކްކޮށް ސަލާމަތީ ކަންކަން ވަރުގަދަ ކުރުމަކީ ކޮންމެ ގައުމަކުން ވެސް ކުރާކަމެކެވެ. ނަމަވެސް ޖަރުމަނު މި ފަހަރު މިކަން ކުރިއަށްވުރެ ސީރިއަސް ކަމެއްގެ ގޮތުގައި ނަގައިގެން މިއުޅެނީ 2022ގެ ވޯލްޑްކަޕާ ދިމާކޮށް އެ ގައުމުން އިސްލާމީ އުސޫލުތަކަށް ވަރަށް ބޮޑަށް ފާޑުކިޔައި ހެދުމާވެސް އެކުގަ އެވެ. ޖަރުމަނަކީ އެގައުމުގެ އިރުމައްޗާއި ދެކުނުގެ ބޯޑަރު ވަރަށް ބޮޑަށް ބަލަހައްޓާ ގައުމެކެވެ. ޖަރުމަނަށް އެންމެ ގިނަ މިހުން ވަގަށް އެތެރެވަނީ ޕޮލެންޑާއި އޮސްޓްރިއާ އަދި ޗެކްރިޕަބްލިކާއި ސްވިޒަލޭންޑާވީ ފަޅިންނެވެ.
