ހުކުރު 07 އޯގަސްޓު 2020
10 އަހުލިހަ
1441 ޒުލްޙައްޖު 17
ފަތިސް 04:47
އިރުއަރާ 06:02
މެންދުރު 12:16
އަސްރު 15:33
އިރުއޮއްސޭ 18:22
އިޝާ 19:37
ދިވެހި ޕްރިމިއާ ލީގު

ދިވެހި ޕްރިމިއާ ލީގު: ބޮޑު ތަފާތަކުން ކުޑަހުވަދޫގެ މައްޗަށް މާޒިޔާ ކުރިހޯދައިފި

  • ކުޑަހުވަދޫ މައްޗަށް މާޒިޔާ ކުރިހޯދީ 0-4 ގެ ނަތީޖާއަކުން

ކ. މާލެ | 5 އޯގަސްޓް 2017 | ހޮނިހިރު 02:16 | 3,156

މާޒިޔާ އަދި ކުޑަހުވަދޫ ބައްދަލުކުރި މެޗުގެ ތެރެއިން - ޓްވިޓަރ

އުރީދޫ ދިވެހި ޕްރިމިއާ ލީގު ހުޅުވި މެޗުގައި، މިނިވަން ޗެމްޕިއަންޝިޕްގެ ޗެމްޕިއަން، ދ.ކުޑަހުވަދޫގެ މައްޗަށް މާލޭ ލީގުގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަންއިން ބޮޑު ތަފާތަކުން ކުރިހޯދައިފިއެވެ.

ހުކުރު ދުވަހުގެރޭ ކުލަގަދަ ރަސްމިއްޔާތަކާއެކު ދިވެހި ޕްރިމިއާ ލީގު ފެށިއިރު، ލީގް ހުޅުވި މެޗަށް ފްރާންސް އަދި ޗެލްސީގެ ކުރީގެ ޑިފެންޑަރު މާސެލް ޑެސައިލީ ވަނީ ގެނެސްފައެވެ. އޭނާ ވަނީ މާޒިޔާ އަދި ކުޑަހުވަދޫ ބައްދަލުކުރި މެޗުގައި ޝަރަފުވެރި މެހެމާނެއްގެ ގޮތުގައި ބައިވެރިވެފައެވެ.

ގަލޮޅު ރަސްމީ ދަނޑުގައި މާޒިޔާ އަދި ކުޑަހުވަދޫ ބައްދަލުކުރި މެޗު މާޒިޔާ އިން ކާމިޔާބުކުރީ ފަސޭހަކަމާއެކު، 0-4 ގެ ތަފާތުބޮޑު ނަތީޖާއަކުންނެވެ.

މެޗު ފެށިގެން މިނެޓެއް ނުވަނީސް މާޒިޔާއިން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ކެޕްޓަން އަސަދުﷲ އަބްދުﷲ އެވެ. މި ލަނޑު އޭނާ ކާމިޔާބުކުރީ މުހައްމަދު އުމެއިރު ތަނަވަސްކޮށްދިން ފުރުސަތަކުންނެވެ.

މި ލަނޑަށްފަހުވެސް މާޒިޔާ އިން ދިޔައީ ކުޑަހުވަދޫގެ ހާފަށް ބާރުބޮޑުކޮށް، ލަނޑު ޖެހުމަށް ފުރުސަތު ތަނަވަސްކުރަމުންނެވެ. އެގޮތުން މާޒިޔާގެ ކެރިޗް އަދި އަސަދުﷲ އަށް ފުލުފުލުގައި ލިބުނު ހުސް ފުރުސަތައް ހިމެނެއެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ކުޑަހުވަދޫގެ މައްޗަށް މާޒިޔާ ކުރީގައި އޮވެގެންނެވެ.

ދެވަނަ ހާފް ފެށިގެން މާޒިޔާ އިން ވަނީ އެޓީމުގެ ކުޅުން އިތުރަށް ވަރުގަދަ ކޮށްފައެވެ. ފުރަތަމަ ހާފާ ޚިލާފަށް ދެވަނަ ހާފްގައި ކުޑަހުވަދޫގެ ފަރާތުން ޑިފެންސިވް ކުޅުމެއް ފެނިގެންދިޔައިރު، އެޓީމަށް ލަނޑު ޖަހަން މާ ރަނގަޅު ފުރުސަތުތަކެއް މުޅި މެޗުގައިވެސް ލިބިފައެއް ނުވެއެވެ.

މާޒިޔާ އިން މެޗުގެ ލީޑު ފުޅާކުރީ 55 ވަނަ މިނެޓުގައި ކެރިޗް ކާމިޔާބުކޮށްދިން ލަނޑުންނެވެ. މި ލަނޑު އޭނާ ކާމިޔާބުކުރީ، ކުޑަހުވަދޫގެ ދެ ކުޅުންތެރިން ކައިރިން ނައްޓާލުމަށްފަހު އަސަދުﷲ ދިން ޕާހަކުންނެވެ.

މާޒިޔާގެ ތިންވަނަ ލަނޑު ޖެހީ މެޗުގެ 69 ވަނަ މިނެޓުގައެވެ. މި ލަނޑުވެސް އެޓީމަށް ކާމިޔާބުކޮށްދިނީ ކެރިޗެވެ. އޭނާ މި ލަނޑު ކާމިޔާބުކުރީ އަސްހަދު އަލީ (އަޑުބަރޭ) ތަނަވަސްކޮށްދިން ފުރުސަތުތަކުންނެވެ. މެޗުގެ ފަހު ލަނޑަކީ ކުޑަހުވަދޫގެ ރަޝާދު އަތުން ބައިކޮޅަށް ވަތް ލަނޑެކެވެ.

ލީގުގައި ހޮނިހިރު ދުވަހުގެ ރޭ ވެސް މެޗެއް ކުޅޭނެއެވެ. ހޮނިހިރު ދުވަހުގެ ރޭ ބައްދަލުކުރާނީ ނިއުރޭޑިއަންޓް ސްޕޯޓްސް ކްލަބް އަދި ޓީސީ ސްޕޯޓްސް ކްލަބެވެ. މި މެޗު ފަށާނީ 21:00 ޖަހާއިރެވެ.

 

އެންމެ ފަހުން އަޕްޑޭޓް ކުރީ: 4 މަސް ކުރިން | ރިވިއު ކުރީ: އިސްމާއިލް ނާއިލް ނަޝީދު

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.