ބިންތަކުގެ ރަސްކަލުންގެ ނަމުން މަޝްހޫރުވެފައިވާ އިންޑިއާގެ ރަޖަސްތާން ސްޓޭޓަށް އުފަން ސުމަން ރާއޯ، 2019 ވަނަ އަހަރުގެ އިންޑިއާގެ ރީތީގެ ރާނީގެ މަގާމު ހޯދައިފިއެވެ.

މުމްބާއީގެ ސަރްދާރް ވައްލަބާއީ ޕަޓޭލް އިންޑޯ ސްޓޭޑިއަމްގައި ހޮނިހިރު ދުވަހު ބޭއްވި ރަސްމިއްޔާތުގައި ފެމިނާ މިސް އިންޑިއާގެ މަގާމު ސުމަން ހޯދާފައި ވަނީ، އިންޑިއާގެ 12 ސްޓޭޓުގެ ބައިވެރިންނާ ވާދަކޮށެވެ. ސުމަން އަށް މިސް އިންޑިއާގެ ތާޖު ހަވާލުކޮށްފައިވަނީ 2018 ވަނަ އަހަރު އެ މަގާމު ހޯދާފައިވާ ޓެމިލްނާޑުގެ އަނޫކްރިތީ ވަސްއެވެ.

މިސް އިންޑިއާ ގްރޭންޑް އިންޓަނޭޝަނަލްގެ މަގާމު ޗަތިސްގަރް ސްޓޭޓްގެ ޝިވާނީ ޔާދަވް އަށް ލިބުނުއިރު، މިސް އިންޑިއާ ޔުނައިޓެޑް ކޮންޓިނެންޓްސްގެ މަގާމު ހާސިލްކޮށްފައިވަނީ 13 ވަނަ އަށް އެންމެ ބޮޑު ސްޓޭޓް ކަމަށްވާ ބިހާރުގެ ޝްރިޔާ ޝަންކަރެވެ.