އީސީއަށް މެންބަރުން އައްޔަންކުރުމުގެ ބާރު މަޖިލީހަށް ލިބިދޭގޮތަށް ގާނޫނަށް އިސްލާހެއް ހުށަހަޅައިފި

އިލެކްޝަންސް ކޮމިޝަން (އީސީ)އަށް މެންބަރުން އައްޔަންކުރުމުގެ ބާރު ރައްޔިތުންގެ މަޖިލީހަށް ލިބިދޭގޮތަށް އިލެކްޝަންސް ކޮމިޝަނުގެ ގާނޫނަށް އިސްލާހެއް ހުށަހަޅައިފިއެވެ.

މި އިސްލާހު ރައްޔިތުންގެ މަޖިލީހަށް ހުށަހެޅުއްވީ ހޮޅުދޫ ދާއިރާގެ އެމްޑީޕީ މެންބަރު ޔޫނުސް އަލީއެވެ.

އީސީގެ ގާނޫނުގެ ހަތަރުވަނަ މާއްދާގައިވާ ގޮތުން އެ ކޮމިޝަނަށް މެންބަރުން އައްޔަންކުރާނީ ރައީސުލްޖުމްހޫރިއްޔާއެވެ. އެގޮތުން އީސީއަށް މެންބަރުން އައްޔަންކުރަން ބޭނުންވާ ކޮންމެ ފަހަރަކު ވެސް މެންބަރުން އައްޔަންކުރަންޖެހޭ އަދަދަށްވުރެ މަދުނޫން އަދަދަކަށް މީހުންގެ ނަން ރައްޔިތުންގެ މަޖިލީހަށް ފޮނުއްވަން ޖެހެނީ ރައީސުލްޖުމްހޫރިއްޔާއަށެވެ.

މި މާއްދާ އިސްލާހުކުރަން ހުށަހެޅި ބިލުގައި ވަނީ އީސީގެ މެންބަރުން އައްޔަންކުރަން ބޭނުންވާ ކޮންމެ ފަހަރަކު، އެ ކަމަށް އެދޭ ފަރާތްތައް ހޯދުމަށް އިއުލާނުކުރަން ޖެހޭނީ ރައްޔިތުންގެ މަޖިލީހުން ކަމަށެވެ. އަދި، އީސީގެ މެންބަރުކަމަށް އިޖާބަދޭ މީހުންގެ ނަންތައް، މަޖިލީހުގެ މިނިވަން މުއައްސަސާތަކާބެހޭ ކޮމިޓީން ދިރާސާކޮށް ކޮމިޓީގެ ރިޕޯޓު މަޖިލީހަށް ހުށަހެޅުމަށެވެ. އަދި މަޖިލީހަށް ހުށަހަޅާ ނަންތަކުގެ ތެރެއިން ރައްޔިތުން މަޖިލީހުގެ ޖަލްސާއެއްގައި ހާޒިރުވެ ވޯޓުގައި ބައިވެރިވި މެންބަރުންގެ އަގުލަބިއްޔަތުން ފާސްކުރާ ފަރާތެއް ނުވަތަ ފަރާތްތަކެއް އިލެކްޝަން ކޮމިޝަނުގެ މެންބަރު ކަމަށް ރައީސުލްޖުމްހޫރިއްޔާ އައްޔަން ކުރަންވާނެ ކަމަށް ބުނެފައިވެއެވެ.

މީގެ އިތުރުން ކޮމިޝަނުގެ މެންބަރު ކަމަށް ރައްޔިތުން މަޖިލީހުން ފާސްކުރާ ނަންތަކަކީ އާއްމުކޮށް އިއުލާންކޮށްގެން އެކަމަށް އިޖާބަދޭ މީހުންގެ ތެރެއިން މިގާނޫނުގެ 5 ވަނަ މާއްދާގައި ބަޔާންކުރާ ޝަރުތު ފުރިހަމަވާ މީހުންކަމުގައި ވާންވާނެ ކަމަށް އިސްލާހުގައި ބުނެފައިވެއެވެ.

މަޖިލީހަށް މިފަދަ ބިލެއް ހުށަހަޅާފައިމިވަނީ ކޮމިޝަނުގެ މަގާމެއް ހުސްވެފައިވަނިކޮށެވެ. ކޮމިޝަނުގެ ނައިބު ރައީސަކަށް ހުންނެވި އިސްމާއީލް ހަބީބުގެ ދައުރު ވަނީ ހަމަވެފައެވެ.