ބިދޭސީންގެ މައްސަލަ ފާލުން ނެއްޓުމަކީ އެތައް އަހަރެއްގެ އިހުމާލުގެ ނަތީޖާ، ހަމަމަގަށް އަޅުވަން ކުރަންޖެހޭ މަސައްކަތް ބުރަ

ބިދޭސީންގެ މައްސަލައަކީ މި ގައުމުގައި މިއަދު ބޮޑުވެފައިވާ މައްސަލައެކެވެ. ވަކިން ޚާއްސަކޮށް ގަވައިދާ ޚިލާފަށް ރާއްޖޭގައި އުޅޭ ބިދޭސީންގެ އަަދަދު ދުވަހެއް ދުވަހަކަށް އިތުރުވުމާއި، ބިދޭސީން ކުރުން މަނާ ވިޔަފާރީގެ ތެރެއަށް އަތްގަދަކުރުމާއި، ތަފާތު އެކި ބާވަތްތަކުގެ ކުށްތަކަށް އަރައިގަތުންވެސް މި ވަނީ އިންތިހާއަށް އިތުރުވެފައެވެ.

2022 ވަނަ އަހަރު މުޅި ރާއްޖޭގައި ކުރިޔަށްގެންދިޔަ ބޯހިމެނުމުގެ ނަތީޖާ ދައްކާގޮތުން ރާއްޖޭގެ އާބާދީގެ 26 އިންސައްތަ ހިއްސާކުރަނީ ބިދޭސީންނެވެ. 

މިއަދު ތަފާތު އެކި ވިޔަފާރިތަކުގެ މައްޗަށް ބިދޭސީން އަތްގަދަކުރަމުން ދާއިރު، ގަވާއިދާ ޚިލާފަށް ކަންކަން ހިންގާ ބިދޭސީންގެ މައްޗަށް ހިންގޭ ގާނޫނެއް ނޯވެއެވެ. ނުވަތަ ގާނޫނެއް އޮތަސް ތަންފީޒު ކުރެވޭ ގޮތެއް ނޯވެއެވެ.

އެކަމުގެ ސަބަބުން އެ މީހުންގެ އަތުން ޓެކުހެއްވެސް ނުނެގި، އެތައް ވިޔަފާރިތަކެއްގެ ޒަރީއާއިން ރާއްޖޭގެ އިގްތިސާދަށް އޭގެ އަސަރު ކުރެއެވެ. ނަމަވެސް އެކަންކަމުގެ ބެލެނިވެރި އިދާރާތަކަށް ހިލަމެއް ނުވެއެވެ.

ރާއްޖޭގައި އުޅޭ ބިދޭސީންގެ އަދަދު އިންތިހާއަށް އިތުރުވުމުގެ ސަބަބުން ނުރަނގަޅު އެތައް ކަމެއްވެސް ދަނީ ފެންމަތިވަމުންނެވެ.

މިހާރު ރާއްޖޭގެ ކުށުގެ ވެއްޓަށް ބެލިއަސް، ބޮޑެތި ކުށްތަކުގައި ހައްޔަރުކުރާ މީހުންގެ ތެރޭގައި ބިދޭސީން ނުހިމެނޭ ފަހަރެއް މަދެވެ. މިފަދަ މައްސަލައެއްގައި ހައްޔަރުކުރެވޭއިރު ގިނަ ފަހަރަށް އެމީހެއްގެ އަތުގައި ރަނގަޅު ވޯރކް ޕަރމިޓެއްވެސް ނޯވެއެވެ. އެހެން ނަމަވެސް ރާއްޖެ އައިސް އުޅޭކަމަށްވަނީ ކޮންމެވެސް މަސައްކަތެއްގައެވެ.

މިހާ ހިސާބަށް މި މައްސަލަ ދިޔައީ ގައިމުވެސް ކަމާ ގުޅުންހުރި އިދާރާތަކަށް އެކަށީގެންވާ މަސައްކަތްތަކެއް ނުކުރެވުމުގެ ސަބަބުންނެވެ. ގާނޫނުތަކާއި، ގާނޫނުތަކުގެ ދަށުން ހެދިފައިވާ އުސޫލުތަކާއި ގަވާއިދުތައް ތަންފީޒު ނުކުރެވުމުގެ ސަބަބުންނެވެ.

ބިދޭސީންގެ މައްސަލައަށް ހައްލު ހޯދުމުގެ މަސައްކަތް އެކި ސަރުކާރުތަކުން އެކި މިންވަރަށް ކޮށްފައިވެއެވެ. ބައެއް ސަރުކާރުތަކުގައި އެކަމުގެ ކޮންމެވެސް މިންވަރެއްގެ ނަތީޖާތަކެއް ނެރެވޭފަދަ މަސައްކަތްތަކެއް ކުރެވެން ފެށިފައިވެއެވެ. ނަމަވެސް މިއަދާ ހަމައަށްވެސް މި މައްސަލަ އޮތީ ބޮއްސުންލައިގެން ގޮސްފައިވާ ބޮޑު މައްސަަލައެއްގެ ގޮތުގައެވެ.

މިއަދުވެސް މިކަންކަން ހައްލުކޮށް، ބިދޭސީންގެ މައްސަލައަށް ހައްލު ގެނެވޭނީ ކަމާ ގުޅުންހުރި އިދާރާތަކުން އެކަށީގެންވާ ހަރުކަށި ފިޔަވަޅުތަކެއް ތަންފީޒު ކޮށްގެންނެވެ. ނަތީޖާ ނެރެވެންދެން ހުއްޓުމެއް ނެތި މަސައްކަތް ކޮށްގެންނެވެ. މިއީ ދުވަސް ނަގާނެ ކަމެއް ކަމަށް ބެލެވުނު ނަމަވެސް، އިޚްލާސްތެރިކަމާއެކު، މެދުނުކެނޑި އިދާރާތަކުން މަސައްކަތް ކޮށްފިނަމަ މިއީ ނުވާނެ ކަމެއް ނޫނެވެ.