ވައިގެ މަގުންނާއި ކަނޑުމަގުން ޣައްޒާއަށް އެހީ ފޯރުކޮށްދިނުމަކީ އެއްގަމު އުޅަނދުފަހަރުގައި އެހީ ފޯރުކޮށްދިނުމާ އަޅައިގާތް ވެސް ކުރެވޭނެ ކަމެއް ނޫންކަމަށް ބުނެ އިންސާނީ ހައްގުތަކަށް މަސައްކަތްކުރާ ބޮޑެތި 25 ޖަމިއްޔާއަކުން ފާޑުކިޔައިފިއެވެ.
އެމްނެސްޓީ، އެކްޝަން އެއިޑް އިންޓަނޭޝަނަލް އަދި އޮކްސްފާމް ފަދަ ޖަމިއްޔާޖަމާއަތްތަކުން ގުޅިގެން ނެރުނު ނޫސްބަޔާނެއްގައި ވަނީ ދާއިމީ ގޮތެއްގައި ޣައްޒާގެ ހަނގުރާމަ ހުއްޓާލުމަށާއި ފަލަސްތީނުގެ އެންކްލޭވްއަށް އެއްގަމު އުޅަނދުތައް މެދުވެރިކޮށް "ރައްކާތެރި އަދި ހުއްޓުމެއް ނެތި" އިންސާނީ ވަސީލަތްތައް ގާއިމުކުރުމަށް ގައުމުތަކުގެ ކިބައިން އެދިފައެވެ.
ޣައްޒާއަށް އިންސާނީ އެހީ ފޯރުކޮށްދިނުމަށް އެކަށީގެންވާ މަސައްކަތްތަކެއް ކުރަމުންދާ ކަމުގެ މަންޒަރުދައްކާ ދުނިޔޭގެ ލޮލުގައި އަނދުންއަޅުވަން އެއާޑްރޮޕްތަކާއި މެރިޓައިމް ކޮރިޑޯއެއް ހުޅުވަން ކުރާ މަސައްކަތުގެ ފަހަތުގައި ދައުލަތްތަކަށް ފޮރުވިގެން ނުވާނެ ކަމަށް 25 އެންޖީއޯއިން އެކުވެގެން ނެރުނު ބަޔާނުގައި ލިޔެފައިވެ އެވެ.
އެމީހުންގެ އެންމެ އިސް މަސްއޫލިއްޔަތަކީ އަނިޔާވެރި ޖަރީމާތައް ހިނގިޔަ ނުދިނުމާއި، ކެނޑިނޭޅި ބޮމުގެ ހަމަލާތައް ދިނުން ހުއްޓުވުމާއި، އިންސާނީ އެހީ ރައްކާތެރިކަން ފޯރުކޮށްދިނުމަށް ހުރަސް އެޅޭ ފިޔަވަޅުތައް ނިމުމަކަށް ގެނައުމަށް ހަރުދަނާ ސިޔާސީ ޕްރެޝަރުތައް ކުރިމަތިކުރުންއެބަޔާނުގައިވޭ
އިންސާނީ އެހީއަށް މަސައްކަތްކުރާ އެހެން ޖަމިއްޔާތަކާއި ސްޓޭޓްތަކުން ބުނަމުން ދަނީ ސިޔާސީ ގޮތުންނާއި ސަލާމަތީ ގޮތުން ދިމާވެފައިވާ ނުތަނަވަސް ހާލަތަށް ބަލާއިރު، އެއާޑްރޮޕަކީ މިވަގުތަށް ލިބެން އޮތް އެންމެ ރަނގަޅު ހައްލެއް ކަމަށެވެ.
ފަސް މަސް ދުވަހުގެ ހަނގުރާމައަށްފަހު ޣައްޒާގައި މިވަގުތު ބަނޑުހައިހޫނުކަމުގެ މައްސަލަ ކުރިމަތިވެފައިވާ އިރު، އެގައުމުގެ ސިއްހަތާ ބެހޭ ވުޒާރާއިން މިދިޔަ ހަފުތާގައި އަންދާޒާކޮށްފައިވާ ގޮތުގައި އުތުރު ޣައްޒާގެ ހޮސްޕިޓަލްތަކުގައި ނިއުޓްރިޝަން އާއި ޑީހައިޑްރޭޝަންގެ ސަބަބުން 20 މީހުން ވަނީ މަރުވެފައެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނީ މީގެ ކުރިން ހަފުތާ ބަންދުގައި ކުރި ޒިޔާރަތުގައި ބަނޑުހައިހޫނުކަމުގެ ސަބަބުން 10 ކުއްޖަކު މަރުވި މަންޒަރު އެ ޖަމިއްޔާގެ ޓީމުން ފެނިފައިވާ ކަމަށެވެ.
އިސްރާއީލު ސިފައިން ޣައްޒާއަށް އެއްގަމު އުޅަނދުފަހަރުގައި އެހީދޭ ގާފިލާތަކަށް ވަނުމަށް ހުރަސް އެޅުމާއި ބަޑީގެ ހަމަލާތައް ދެމުން އަންނަ ކަމަށް ތުހުމަތުކުރެއެވެ. އިސްރާއީލުން ވަނީ އެހީ އަށް ހުރަސް އެޅުމަށް އިންކާރުކޮށް، އޭގެ ބަދަލުގައި އދ.ގެ އެޖެންސީތަކަށް "ބެކްލޮގްސް" ގެ ތުހުމަތު ކޮށްފައެވެ.
ވަކިން ހާއްސަކޮށް އުތުރުގެ ސަލާމަތީ ހާލަތު ގޯސްވެ، ހާލުގައި ޖެހިފައިވާ ފަލަސްތީނާއި ގޭންގުތަކުގެ މީހުން އެހީގެ ޓްރަކްތަކަށް ހަމަލާދިނުމުގެ ސަބަބުން މީގެ ކުރިން ވެސް އިންސާނީ ހައްގުތަކަށް މަސައްކަތް ކުރާ ޖަމިއްޔާތަކަށް ވަނީ ސަޕްލައި ކުރުން ހުއްޓާލަން މަޖުބޫރުވެފައެވެ.
ހުޅަނގުގެ ގައުމުތަކާއި ޖަމިއްޔާތަކުން ވަނީ ޣައްޒާއަށް އިތުރު ކާބޯތަކެތީގެ އެހީ ފޯރުކޮށްދިނުމަށް މަސައްކަތްކޮށް އެކަމަށް ރައްދު ދީފައެވެ. އެގޮތުން މިދިޔަ އަންގާރަ ދުވަހު ސްޕެއިންގެ އުޅަނދެއް ސައިޕްރަސްއިން ފުރައިގެން ދިޔައީ ޣައްޒާގައި ރައްޔިތުންނަށް ބޭނުންވާ 200 ޓަނުގެ ފުށް އަދި ހަނޑޫ ހިފައިގެންނެވެ.
ނަމަވެސް އުޅަނދުގެ ދަތުރަކީ އެ ސަރަހައްދަށް އެހީ ފޯރުކޮށްދިނުމަށް ސީ ކޮރިޑޯއެއް ހުޅުވުމުގެ އިމްތިހާނެއް ކަމަށް ބެލެވޭއިރު، އެންޖީއޯތަކުން ވަނީ އެ މަސައްކަތަށް ވަރަށް ބޮޑަށް ފާޑުކިޔައި، އެއީ ފުދޭ ވަރުގެ އެހީއެއް ނޫން ކަމަށް ބުނެފައެވެ.
އެއާޑްރޮޕްތަކުން ފޯރުކޮށްދެނީ މަދު ޓަނެއްގެ ކާބޯތަކެތީގެ އެހީ ކަމަށާއި ފަސް ޓްރަކްގެ ގާފިލާއަކަށް ގާތްގަނޑަކަށް 100 ޓަނުގެ "ލައިފް ސޭވިން އެސިސްޓެންސް" އުފުލޭނެ ކަމަށް އެންޖީއޯތަކުން ބުނެއެވެ.
