މެންޗެސްޓާ ޔުނައިޓެޑްގެ އިސް ބޭފުޅުން ކުޅުންތެރިން ހޯދުމަށް ޔޫރަޕުގެ ކުލަބުތަކާ ވާހަކަ ދައްކަން ފަށައިފި އެވެ.
އަންނަ ސީޒަނަށް ޓީމު އެކުލަވާލުމަށް ޔުނައިޓެޑްގެ ޗީފް ސްކައުޓް ޖޯން މާޓޮފް އަދި މަޓް ހާގްރީވްސް ވަނީ ހުސްވި ހަފުތާގައި ސްޕޭނުގެ ބާސެލޯނާގެ ސްޕޯޓިން ޑައިރެކްޓަރު ޑެކޯއާ ބައްދަލުކޮށްފަ އެވެ. މީގެ އިތުރުން އެތްލެޓިކޯ މެޑްރިޑާއެކު މަޝްވަރާތައް ކުރުމަށްފަހު ރެއާލް މެޑްރިޑާއެކު ވެސް ބައްދަލުކުރާނެ ކަމަށް ވަނީ ޔަގީންވެފަ އެވެ.
މީގެ އިތުރުން އިޓަލީ އާއި ނެދަލޭންޑްސް އަދި ޖަރުމަނުގެ ކުލަބުތަކާއެކު ވެސް މަޝްވަރާތައް ކުރާނެ އެވެ.
މި ބައްދަލުވުންތަކުގެ ބޭނުނަމީ ޔުނައިޓެޑުން ފާހަގަ ކުރާ ކުޅުންތެރިން ގަނެވޭނެ ގޮތެއް ހޯދުމެވެ. އަދި ކުރިމަގަށް ރަނގަޅު ޒުވާން ޓީމެއް ބިނާ ކުރުމަށް އެކި ކުލަބުތަކުން ކުރާ މަސައްކަތްތައް ދެނެގަތުމެވެ.
ޔުނައިޓެޑުން އަންނަ ސީޒަނަށް މޮޅު ޓީމެއް އެކުލަވާލަން މަސައްކަތް ކުރާއިރު ކޯޗު އެރިކް ޓެންހަގް މަގާމުގައި ހުންނާނެ ކަމާމެދު ވަނީ ސުވާލު އުފެދިފަ އެވެ. ސަބަބަކީ ކުލަބުގެ އައު ވެރިޔާ ޖިމް ރަޓްކްލިފޭ އަންނަ ސީޒަނުގެ ޗެމްޕިއަންސް ލީގަށް ކޮލިފައިނުވެއްޖެނަމަ އޭނާ މަގާމުން ވަކިކުރާނެ ކަމަށް ބެލެވޭތީ އެވެ. މިހާރު ޓޭބަލުގައި ޔުނައިޓެޑް އޮތީ ހަ ވަނާގައި ކަމަށްވުމުން އަންނަ ސީޒަނުގެ ޗެމްޕިއަންސް ލީގަށް ކޮލިފައިނުވާނެ ކަމަށް ގިނަ ކުޅުންތެރިން އަންނަނީ ބުނަމުންނެވެ. އޭގެ ތެރޭގައި ކެޕްޓަން ބުރޫނޯ ފެނާންޑޭޒް ވެސް ހިމެނެ އެވެ.
ޔުނައިޓެޑުން އަންނަ ސީޒަނަށް ކުޅުންތެރިން ހޯދާއިރު އެންމެ ބޮޑަށް އިސްކަން ދެނީ ސެންޓަ ބެކަކާއި ފޯވަޑެއް ހޯދުމަށް ކަމަށް ވެސް އިނގިރޭސި ނޫސްތަކުން ބުނެ އެވެ.
