އައްޑޫ އަދި ކުޅުދުއްފުށި ޕޯޓުގައި ބަންކަރިންގެ ޚިދުމަތް ފަށައިފި
14 މާރިޗު 2024 | ބުރާސްފަތި 06:57ޕްލޭންތަކެއް ވަނީ ހެދިފައި، އެ ޕްލޭންތަކާއި އެއްގޮތަށް މަސައްކަތްތައް ކުރިއަށް ގެންދާނަން
އެމްޕީއެލުން ބޭއްވި ނޫސްވެރިންގެ ބައްދަލުވުމުގެ ތެރެއިން
އައްޑޫ، ކުޅުދުއްފުށި ޕޯޓުގައި ބަންކަރިންގެ ޚިދުމަތް ފަށާފައިވާ ކަމަށް މޯލްޑިވްސް ޕޯޓްސް ލިމިޑެޓް (އެމްޕީއެލް)ގެ ސީއީއޯ މުހައްމަދު ވަޖީހު އިބްރާހީމް ވިދާޅުވެއްޖެއެވެ.
އެމްޕީއެލްގެ މަސައްކަތްތަކާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ސީއީއޯ ވަޖީހު ވިދާޅުވީ އައްޑޫ ޕޯޓާއި ކުޅުދުއްފުށި ޕޯޓު ތަރައްގީ ކުރުމަށް ޚާއްސަ އިސްކަމެއްދީގެން ޕްލޭންތަކެއް ރާވާފައިވާ ކަމަށާއި އެ ޕްލޭންތަކާއި އެއްގޮތަށް މަސައްކަތްތައް ކުރިއަށްދާ ކަމަށެވެ.
ވަޖީހު ވިދާޅުވީ ޕޯޓުގެ ޚިދުމަތްތައް ފުޅާކުރުމަށް ގިނަ މަސައްކަތްތައް ކުރަންޖެހޭ ކަމަށެވެ. އެގޮތުން މިމަހުގެ 5 ވަނަ ދުވަހު ބަންކަރިންގެ ޚިދުމަތް ފަށާފައިވާ ކަމަށް އޭނާ ވިދާޅުވިއެވެ.
ވަޖީހު ވިދާޅުވީ އައްޑޫ އަދި ކުޅުދުއްފުށި ޕޯޓުގައި ބަންކަރިންގެ ޚިދުމަތް ފުޅާކުރައްވާނެ ކަމަށާއި އިންޓަނޭޝަނަލް ފެންވަރުގައި ޚިދުމަތް ދެވޭ ވަރަށް އެ ދެ ޕޯޓުގެ ވެސް ތަރައްގީކުރައްވާނެ ކަމަށެވެ.
