ތަރާވީޙުނަމާދާއި ދަމުނަމާދުކުރާ އިމާމުން ވިތުރީގެ ޤުނޫތުގައި ފަލަސްތީނުގެ ރައްޔިތުންނަށް ހެޔޮ ދުޢާކުރަން އިލްތިމާސްކޮށްފި

އިމާމުވެ ރަމަޟާންމަހުގެ ތަރާވީޙުނަމާދާއި ދަމުނަމާދުކުރާ އިމާމުން ވިތުރީގެ ޤުނޫތުގައި ފަލަސްތީނުގެ ރައްޔިތުންނަށް ހެޔޮ ދުޢާކޮށްދިނުމަށް، އިސްލާމީ ކަންތައްތަކާބެހޭ ވަޒީރު، ޑރ. މުހައްމަދު ޝަހީމް އަލީ ސައީދު އިލްތިމާސްކުރައްވައިފިއެވެ.

ޑރ. ޝަހީމް ހޯމަދުވަހު އެކްސްގައި ކުރެއްވި ޕޯސްޓެއްގައި މިގޮތަށް އިލްތިމާސްކުރައްވާފައިވަނީ ފަލަސްތީނުގެ ރައްޔިތުންނަށް އިސްރާއީލުން ދެމުންގެންދާ އަނިޔާތަކުން ފަލަސްތީނުގެ ރައްޔިތުންނަށް ނަސްރު ދެއްވުން އެދި ހެޔޮ ދުޢާ ކުރެއްވުމުގެ ގޮތުންނެވެ.

ފަލަސްތީނުގެ ރައްޔިތުންނަށް ހެޔޮ ދުޢާކުރުމަށްޓަކައި މީގެ ކުރިން، 18 އޮކްޓޫބަރު 2023 ވީ ބުދަ ދުވަހުގެ މެންދުރު ނަމާދުން ފެށިގެން، ރާއްޖޭގެ ހުރިހާ މިސްކިތެއްގައި، ކޮންމެ ނަމާދެއްގައި ގުނޫތު ނާޒިލާ ކިޔުމަށް އިސްލާމިކް މިނިސްޓްރީން ވަނީ އަންގާފައެވެ. ނަމަވެސް، 4 ފެބްރުއަރީ 2024 ވީ އާދިއްތަ ދުވަހުގެ މަޣުރިބު ނަމާދުން ފެށިގެން އިސްލާމިކް މިނިސްޓްރީގެ އެންގުމަށް ވަގުތީ ގޮތުން ގުނޫތު ނާޒިލާ ކިޔުން ވަނީ ހުއްޓާލާފައެވެ.

އިސްރާއީލުގެ ޔަހޫދީންގެ ހައްދުފަހަނައަޅާފައިވާ އަނިޔާތައް ދުވަހެއް ދުވަހަކަށް ވަރުގަދަކުރަމުން ގޮސް މުޅި ޣައްޒާ އެއްކޮށް ވަނީ ސުންނާފަތިކޮށްފައެވެ. އަދި އިސްރާއީލުގެ މި ލާއިންސާނީ ހަމަލާތަކުގެ ސަބަބުން ޣައްޒާގެ 30,000ށްވުރެ ގިނަ މީހުން ޝަހީދުވެފައި ވާއިރު، އޭގެ ތެރެއިން ދެބައިކުޅަ އެއްބަޔަށްވުރެ ގިނައީ އަންހެނުންނާއި ކުޑަކުދިންނެވެ.