ލިވަޕޫލާއި ސިޓީ އެއްވަރުވެ، ލީގު ރޭޙުގެ ވާދަވެރިކަން ބޮޑުވެއްޖެ

އިނގިރޭސި ޕްރިމިއާ ލީގުގައި ލިވަޕޫލް އާއި އެންމެ ފަހުގެ ޗެމްޕިއަން މެންޗެސްޓަރ ސިޓީ ވާދަކުރި މެޗު އެއްވަރުވެ، ލީގު ރޭހުގެ ވާދަވެރިކަން ބޮޑުވެއްޖެ އެވެ.

ލިވަޕޫލްގެ އެންފީލްޑުގައި އާދިއްތަ ދުވަހުގެ ރޭ ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. އެ މެޗުން މޮޅުވެ، ލީގު ތާވަލްގެ އެއް ވަނަ އަށް ޖެހިލުމުގެ ފުރުސަތު ދެ ޓީމަށް ވެސް އޮތެވެ.

މެޗު ފަށައިގެން 23 ވަނަ މިނެޓުގައި ސިޓީން ވަނީ ލަނޑު ޖަަހައި ލީޑު ނަގައިފަ އެވެ. ކެވިން ޑި ބްރޭނާ ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ޑިފެންޑަރު ޖޯން ސްޓޯންސް އެވެ. ލިވަޕޫލުން މެޗުގެ ނަތީޖާ ހަމަހަމަ ކުރީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ފަސް ވަނަ މިނެޓުގައި ލިބުނު ޕެނަލްޓީ ކާމިޔާބުކޮށް، އެ ޓީމަށް ނަތީޖާ ހަމަހަމަ ކޮށްދިނީ އަލެކްސިސް މެކް އަލިސްޓާ އެވެ.

މި ނަތީޖާ އާއެކު ލިވަޕޫލް އޮތީ ލީގު ތާވަލްގެ ދެ ވަނައިގަ އެވެ. އެއީ މިހާތަނަށް ކުޅުނު 28 މެޗުން 64 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ތިން ވަނައިގައި ސިޓީ އަށް ލިބެނީ 63 ޕޮއިންޓެވެ. އެއް ވަނައިގައި އޮތް އާސެނަލަށް ވެސް ލިބެނީ ލިވަޕޫލާ އެއް އަދަދަކަށް، 64 ޕޮއިންޓެވެ. މި ތިން ޓީމުގެ މެދުގައި ލީގުގެ ވާދަވެރިކަން ވަނީ ބޮޑުވެފަ އެވެ.