ސިޓީ ހުއްޓުވަން ކްލޮޕް، މިރޭ ރޮޑްރީ ބަނދެލަނީ!

އިނގިރޭސި ޕްރެމިއާ ލީގުގައި މިރޭ ޗެމްޕިއަން މެންޗެސްޓަރ ސިޓީ، މޮޅުވިޔަނުދިނުމަށް ލިވަޕޫލުން ކުރާނެ އެެންމެ މުހިންމު ކަމަކީ ސިޓީގެ މިޑްފީލްޑަރު ރޮޑްރީ މާކް ކުރުން ކަމަށް ތަޖުރިބާކާރު ކުރީގެ ކުޅުންތެރިން ބުނަން ފަށައިފި އެވެ.

މި ދެ ޓީމަކީ ޕްރެމިއާ ލީގަށް މިދިޔަ ފަސް ސީޒަނުގައި އެންމެ ބޮޑަށް ވާދަކުރި ދެ ޓީމެވެ. ސިޓީ ހަތަރު ފަހަރު އަދި ލިވަޕޫލް އެއް ފަހަރު ލީގު ނެގި އެވެ. މީގެ ތެރެއިން ދެ ފަހަރު ލިވަޕޫލަށް ތަށި ގެއްލުނީ ސިޓީއަށްވުރެ އެންމެ ޕޮއިންޓެއް މަދުވެގެންނެވެ. މިހެންވެ ކޯޗު ޔާގެން ކްލޮޕްގެ ވަދާއީ ސީޒަނުގައި ތަށި ހޯދުމަށް މި މެޗަކީ ކޮންމެހެން ވެސް ބަލިނުވެ ފަރުޖައްސާލަން ޖެހޭ މެޗެކެވެ.

ލިވަޕޫލްގެ ކުރީގެ މިޑްފީލްޑަރު ޑެނީ މާފީ މެޗާ ބެހޭ ގޮތުން ވާހަކަ ދައްކަމުން ބުނީ މެޗުގެ އޮއިވަރު ހުންނާނީ ސިޓީގެ ސްޕޭން މިޑްފީލްޑަރު ރޮޑްރީ ކުޅޭ ކުޅުމަކަށް ކަމަށެވެ. ސަބަބަކީ ސިޓީގެ އެންމެ ފަހުގެ 60 މެޗަށް ބަލާއިރު ވެސް ރޮޑްރީ ކުޅެގެން ޓީމު ބަލިވެފައި ނެތުން ކަމަށެވެ.

މިކަމާ ބެހޭ ގޮތުން ވާހަކަ ދައްކަމުން މެންޗެސްޓަރ ޔުނައިޓެޑްގެ ކެޕްޓަން އަދި ޕްރެމިއާ ލީގުގެ ވެސް އެންމެ ކާމިޔާބު އެއް ކެޕްޓަން ކަމަށްވާ ރޯއި ކީން ވެސް ބުނީ ސިޓީގެ މެދުތެރެ ހާއްސަކޮށް ރޮޑްރީ މާކްނުކޮށް ލިވަޕޫލަށް މެޗު ކާމިޔާބުކުރަން އުނދަގޫވާނެ ކަމަށެވެ.

މިރޭގެ މެޗަށް ނުކުންނައިރު ދެ ޓީމުގެ ތަފާތަކީ ޕޮއިންޓެކެވެ. ލިވަޕޫލަށް 63 ޕޮއިންޓް ލިބިފައިވާއިރު ސިޓީއަށް ލިބިފައިވަނީ 62 ޕޮއިންޓެވެ. މިވަގުތު އެއް މެޗު އިތުރަށް ކުޅެގެން 64 ޕޮއިންޓާއެކު އެއްވަނާގައިވަނީ އާސެނަލް އެވެ. އެކަމަކު މެޗު ކާމިޔާބުކޮށްގެން ސިޓީ ނުވަތަ ލިވަޕޫލަށް ވެސް ކުރި ލިބޭނެ އެވެ.

ފޯރިގަދަވާނެ ކަމަށް ބެލެވޭ މި މެޗު ފަށާނީ މިރޭ 20:30ގަ އެވެ.