ސަރުކާރުގެ މިސްރާބު އޮޅުން ބޮޅުންވެ މިއަދު ރާއްޖެ އޮތީ ކަޅު އަނދިރި ވަޅެއްގެ ތުންފަތް މަތީގައި - ޝާހިދު
ޝާހިދު ވަނީ މިނިވަން މުއައްސަސާތަކަށް އަތް ބޭނުން ހުއްޓާލަން ގޮވާލައްވާފަ
ލާމަރުކަޒީ ނިޒާމުގެ ދަށުން މާލެސިޓީއަށް ބޭނުންވާ ފެހިފަހި ތަނަވަސް މާލެއެއް ހޯދައިދޭނީ އެމްޑީޕީން: ޝާހިދު
ސަރުކާރުގެ މިސްރާބު އޮޅުން ބޮޅުންވެ މިއަދު ރާއްޖެ އޮތީ ކަޅު އަނދިރި ވަޅެއްގެ ތުންފަތް މަތީގައި ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ޝާހިދު އެފަދައިން ވިދާޅުވީ ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި އެމްޑީޕީގެ ފަރާތުން ތިނަދޫ އުތުރު އަދި ތިނަދޫ ދެކުނަށް ވާދަކުރާ ކެނޑިޑޭޓުންގެ ކެމްޕެއިން ރަސްމީކޮށް ލޯންޗްކުރުމުގެ ޖަލްސާގައި ވާހަކަދައްކަވަމުންނެވެ.
މިދިޔަ 5 އަހަރުގެ ތެރޭގައި ރާއްޖޭގެ ތަރައްޤީއަށްޓަކާ ކުރި ކަންކަމަށް ފަހު ވެސް ނާކާމިޔާބީ އާއި ދިމާވުމުން ރިިޔާސީ އިންތިޚާބަށް ފަހު އެމްޑީޕީ އަށް މޮޅިވެރިކަން އައި ކަމަށް ޝާހިދު ވިދާޅުވިއެވެ. ނަމަވެސް ރާއްޖޭގެ ކަންކަން ރަނގަޅުކުރަން މޮޅިވެރިކަމާއި އެކުގައި ވެސް އެމްޑީޕީން މަސައްކަތް ކުރައްވާނެ ކަަމަށް ޝާހިދު ވިދާޅުވިއެވެ. ހުދުމުހުތާރު ގޮތް ދޫނުކުރާ ސަރުކާރެއްގެ ކުރިމަތީގައި ސިޔާސީ މަސައްކަތްތައް ކުރުމަކީ ފަސޭހަކަމެއް ނޫންކަން އޭނާ ވަނީ ފާހަގަކުރައްވާފައެވެ. މި ސަރުކާރުން ދަނީ މަޖިލިސް އިންތިޚާބަށް ނުފޫޒު ފޯރުވާ، އާއްމުންގެ ހިތުގައި ބިރުވެރިކަން އުފައްދަން ކުރެވުނު ހުރިހާ ކަމެއް ކުރަމުން ކަމަށް ޝާހިދު ވިދާޅުވިއެވެ. ނަމަވެސް މިއަދު ޤާނޫނު އަސާސީން އެފަދަ ކަންކަން ބެލޭނެ މަގު އެބަ އޮތް ކަަމަށާއި ސަރުކާރުން ކުރާނެ ހާ ގޮތަކަށް މަސައްކަތް ކުރަން ދޫކޮށް ނުލައްވާނެ ކަމަށް އޭނާ ވަނީ ވިދާޅުވެފައެެވެ.
ޝާހިދު ވަނީ މިނިވަން މުއައްސަސާތަކަށް އަތް ބޭނުން ހުއްޓާލަން ގޮވާލައްވާފައެވެ. އަދި އަންހެނުންގެ ދުވަހުގެ މުނާސަބަތުގައި ނަމަވެސް ސަރުކާރުން ދޮގުހެދުން ހުއްޓާލުމަށް ޝާހިދު ވަނީ ގޮވާލައްވާފައެވެ. ރައީސް ޑރ.މުހައްމަދު މުއިއްޒުގެ ނަން އިވުމާއި އެކު ބޮލަށް އަންނަނީ ދޮގު ދޮލަނގުގެ ނަން ކަމަށާއި ފިތުނައަކުން ހެވެއް ނުލިބޭނެ ކަމަށް ޝާހިދު ވިދާޅުވިއެވެ. މިއަދު ރައީސް މުއިއްޒު އަށް އެ ދޮގުތަކުގެ ތެދު ހާމަވެ އާއްމުންގެ ފާޑުކިޔުމާއި ކުރިމަތިލައްވަން ޖެހެނީ އެ ސަބަބާއި ހުރެ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ސަރުކާރުގެ މިސްރާބު ބޮޑުތަނުން ކަހާލައިގެން ގޮސްފައިވާ ކަމަށާއި މިއަދު އެމްޑީޕީގެ ސަފުތައް އަލުން ރުކުރުވާލާފައި މި ވަނީ އެކަން ބަދަލުކުރުމަށްޓަކާ ކަމަށެވެ. އެމްޑީޕީން ރާއްޖެ ހަމަމަގަށް އަޅުވާ ކަންކަން ރަނގަޅުކުރާނެ ކަމަށް އޭނާ ވަނީ ވިދާޅުވެފައެވެ.
