މިސަރުކާރުގެ ފުރަތަމަ 100 ދުވަސް ސިފަވަނީ ގޮހޮރު ފުރެންދެން ދޮގާއި މަކަރާއި އޮޅުވާލުން އަޅައިގެން ރައްޔިތުންގެ ކުރިމތީގައި އޮތް ސަރުކާތެއްގެ ގޮތުގައިކަމަށް ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އީސަ ވިދާޅުވީ ކެއްސާލިއަސް، ކިނބިއްސެއް އެޅިއަސް މިސަރުކާރުގެ އަނގައިން ރައްޔިތުންނަށް ދޮގާއި މަކަރާއި އޮޅުވާލުން ނޫން އެއްޗެއް މި 100 ދުވަހުގެ ތެރޭގައި އިވިފައިނުވާކަމަށެވެ. މީގެއިތުރުން މިސަރުކާރު ހިންގުމުގައި އެއްވެސް ހަރުދަނާކަމެއް ނެތްކަމަށް އީސަ ވިދާޅުވިއެވެ.
މިސަރުކާރާމެދު ރައްޔިތުން ވަރަށް އުންމީދުކުރިކަމަށާއި ރައީސް ޑރ މުހައްމަދު މުއިއްޒަކީ ވަރަށް ހަރުދަނާ، ދީންވެރި ވަރަށް ގާބިލު ބޭފުޅެއްގެ ގޮތުގައި ރައްޔިތުން ދެކުނުކަމަށެވެ. ނަމަވެސް ފެންނަނީ އެހެން މަންޒަރެއްކަމަށް އީސަ ވިދާޅުވިއެވެ.
އެއްވެސް ކަހަލަ އުސޫލެއް، ޕްލޭނެއް ހަރުދަނާކަމެއް ނުފެނޭ. ސިޔާސީ މަގާމުތަކުގައި ތިއްބެވި ބޭފުޅުންގެވެސް އެހަރުދަނާ ކަމެއް ނުފެނޭ. އަޅުގަނޑުމެންނަށް ފެންނަނީ ސަރުކާރުގެ ކުންފުނިތަކަށް ވެރިންނަށާއި އަދި ސިޔާސީ އެކިއެކި މަގާމުތަކުގައި ތިއްބަވާ ބޭފުޅުންނަކީ އެބޭފުޅުން އެއަދާކުރައްވާ މަގާމުގެ އެއްވެސް ތަޖުރިބާ އެއް ، ގިނަ ބޭފުޅުންނަކީ އެއްވެސް ތަޖުރިބާއެއްވެސް ނެތް ބޭފުޅުން ގިނަ ބޭފުޅުންނަކީ އެދާއިރާއިން ކިޔަވައިގެންވެސް ތިއްބެވި ބޭފުޅުންވެސް ނޫން. ކިޔަވައި ވިދާޅުނުވިޔަސް ތަޖުރިބާ ހުންނަނަމަ ތަޖުރިބާގެ އަލީގައި ހަރުދަނާ ކަމެއް ހުންނާނެ. ނަމަވެސް އެމަންޒަރެއް ނޫން މިފެންނަނީއަހުމަދު އީސަ/ ކެނދިކުޅުދޫ ދާއިރާގެ މެންބަރު
އީސަ ވިދާޅުވީ ކުރުކޮށް ދަންނަވާނަމަ މިސަރުކާރުން ކުރާ ކަންކަމާމެދު ރައްޔިތުންނަށް ވާނުވާއެއް ނޭންގޭކަމަށެވެ. ރައްޔިތުން އުންމީދުކޮށްގެން ތިބި އެއްވެސް ކަމެއް މިސަރުކާރުގައި ނެތްކަމަށް އީސަ ވިދާޅުވިއެވެ.
