މިސަރުކާރުގެ ފުރަތަމަ 100 ދުވަހުގެ ތެރޭގައި ފެނުނީ ރައްޔިތުންނަށް ދޮގާއި މަކަރާއި އޮޅުވާލިތަން: އީސަ

މިސަރުކާރުގެ ފުރަތަމަ 100 ދުވަސް ސިފަވަނީ ގޮހޮރު ފުރެންދެން ދޮގާއި މަކަރާއި އޮޅުވާލުން އަޅައިގެން ރައްޔިތުންގެ ކުރިމތީގައި އޮތް ސަރުކާތެއްގެ ގޮތުގައިކަމަށް ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އީސަ ވިދާޅުވީ ކެއްސާލިއަސް، ކިނބިއްސެއް އެޅިއަސް މިސަރުކާރުގެ އަނގައިން ރައްޔިތުންނަށް ދޮގާއި މަކަރާއި އޮޅުވާލުން ނޫން އެއްޗެއް މި 100 ދުވަހުގެ ތެރޭގައި އިވިފައިނުވާކަމަށެވެ. މީގެއިތުރުން މިސަރުކާރު ހިންގުމުގައި އެއްވެސް ހަރުދަނާކަމެއް ނެތްކަމަށް އީސަ ވިދާޅުވިއެވެ.

މިސަރުކާރާމެދު ރައްޔިތުން ވަރަށް އުންމީދުކުރިކަމަށާއި ރައީސް ޑރ މުހައްމަދު މުއިއްޒަކީ ވަރަށް ހަރުދަނާ، ދީންވެރި ވަރަށް ގާބިލު ބޭފުޅެއްގެ ގޮތުގައި ރައްޔިތުން ދެކުނުކަމަށެވެ. ނަމަވެސް ފެންނަނީ އެހެން މަންޒަރެއްކަމަށް އީސަ ވިދާޅުވިއެވެ.

އީސަ ވިދާޅުވީ ކުރުކޮށް ދަންނަވާނަމަ މިސަރުކާރުން ކުރާ ކަންކަމާމެދު ރައްޔިތުންނަށް ވާނުވާއެއް ނޭންގޭކަމަށެވެ. ރައްޔިތުން އުންމީދުކޮށްގެން ތިބި އެއްވެސް ކަމެއް މިސަރުކާރުގައި ނެތްކަމަށް އީސަ ވިދާޅުވިއެވެ.