ބެލިންހަމާ މެދު އަމަލު ކުރީ އިންސާފުންނެއް ނޫން: އަންޗެލޮޓީ
7 މާރިޗު 2024 | ބުރާސްފަތި 06:30ރަތް ކާޑު ދެއްކީ އޭނާ ރެފްރީ އަށް ނިސްބަތްވާ ގޮތަށް ހަޑި ހުތުރު ބަސްތައް ބޭނުން ކުރި ކަމަށް ބުނެ
ރެއާލް މެޑްރިޑަށް ކުޅެމުން އަންނަ އިންގްލެންޑުގެ ޖޫޑް ބެލިންހަމް
ރެއާލް މެޑްރިޑަށް ކުޅެމުން އަންނަ އިންގްލެންޑުގެ ޒުވާން ކުޅުންތެރިޔާ، ޖޫޑް ބެލިންހަމާމެދު އަމަލު ކޮށްފައި ވަނީ އިންސާފުން ނޫން ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
ބުދަ ދުވަހު ސްޕެނިޝް ލީގުން ވަނީ، ބެލިންހަމް ދެ މެޗަށް ސަސްޕެންޑު ކުރުމަށް ނިންމައިފަ އެވެ. އެއީ ސްޕެނިޝް ލީގުގައި އެންމެ ފަހުން ރެއާލުން ވެލެންސިއާއާ ދެކޮޅަށް ކުޅުނު މެޗުގައި އޭނާ އަށް ދެއްކި ރަތް ކާޑުގެ ސަބަބުންނެވެ. ބެލިންހަމް ސަސްޕެންޑު ކުރުމުގެ ކުރިން ރެއާލުން ވަނީ ރަތް ކާޑުގެ މައްސަލަ އިސްތިއުނާފު ވެސް ކޮށްފަ އެވެ. ނަމަވެސް އެ މައްސަލަ ބަލައި ނުގަނެ، އަނބުރާ ފޮނުވާލީ އެވެ.
ވެލެންސިއާއާ ދެކޮޅަށް ރެއާލުން ކުޅުނު މެޗުގެ އެންމެ ފަހު ވަގުތު ރެފްރީ ވަނީ ބެލިންހަމަށް ރަތް ކާޑު ދައްކައިފަ އެވެ. މެޗުގެ ފަހު ވަގުތު ބެލިންހަމް ލަނޑު ޖެހުމުގެ ކުރިން ރެފްރީ ވަނީ ފަހު ކަށިގަނޑު ފުމެލައިފަ އެވެ. އެކަމާ ބެލިންހަމް އަދި ރެއާލްގެ ކުޅުންތެރިން ވަނީ ހިތްހަމަ ނުޖެހުން ފާޅުކޮށް، ދެކޮޅު ހަދައިފަ އެވެ. އެކަމުގެ ތެރެއިން ރެފްރީ ވަނީ ބެލިންހަމަށް ރަތް ކާޑު ދައްކައިފަ އެވެ. އެއީ އޭނާ ރެފްރީ އަށް ނިސްބަތްވާ ގޮތަށް ހަޑި ހުތުރު ބަސްތައް ބޭނުން ކުރި ކަމަށް ބުނެ އެވެ.
އެކަމާ ގުޅޭ ގޮތުން އަންޗެލޮޓީ ބުނީ، ބެލިންހަމަށް ދިން ސަސްޕެންޝަށް އިސްތިއުނާފަށް ހުށަހަޅާނެ ކަމަށެވެ. އަދި ބެލިންހަމާ މެދު އަމަލު ކޮށްފައި ވަނީ އިންސާފުން ކަމަށް ޤަބޫލު ނުކުރެވޭ ކަމަށާއި، އެކަމުގައި ގިނަ ސަބަބުތަކެއް ހުރި ކަމަށް ވެސް އޭނާ ބުންޏެވެ.
ސްޕެނިޝް ލީގުން ބެލިންހަމް ސަސްޕެންޑު ކޮށްފައިވާއިރު، އޭނާ އަކީ މި ސީޒަންގެ ސްޕެނިޝް ލީގުގައި މިހާތަނަށް އެންމެ ގިނަ ލަނޑު ޖަހާފައިވާ ކުޅުންތެރިޔާ އެވެ. ސަސްޕެންޝަނާއެކު ބެލިންހަމަށް ގެއްލޭނީ މި މަހުގެ 10 ވަނަ ދުވަހު އަމިއްލަ ދަނޑުގައި ރެއާލުން ސެލްޓަ ވީގޯއާ ދެކޮޅަށް ކުޅޭ މެޗު އަދި، މި މަހުގެ 16 ވަނަ ދުވަހު އޮސަސޫނާއާ ދެކޮޅަށް ކުޅޭ މެޗެވެ.
