ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގައި އެގްރިގޭޓުން ކުރި ހޯދައި، މުބާރާތުގެ އެންމެ ކާމިޔާބު ޓީމު ރެއާލް މެޑްރިޑުން ކުއާޓާ ފައިނަލްގެ ޖާގަ ހޯދައިފި އެވެ.

ކުއާޓާ ފައިނަލްގެ ޖާާގަ ރެއާލުން ހޯދީ ޖަރުމަނުގެ އާރްބީ ލައިޕްޒިގްގެ މައްޗަށް 2-1 ގެ އެގްރިގޭޓު ނަތީޖާ އަކުން ކުރި ހޯދައިގެންނެވެ. މި ދެ ޓީމު ލައިޕްޒިގްގެ ދަނޑުގައި ކުޅުނު މެޗު ރެއާލުން ކާމިޔާބު ކުރީ 1-0 އިންނެވެ. ރެއާލްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު ދެ ވަނަ ލެގުގެ މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. އެގްރިގޭޓުން ކުރި ހޯދީ ރެއާލް އެވެ.

ރެއާލްގެ ދަނޑުގައި ކުޅުނު މެޗުގައި ފުރަތަމަ ލަނޑު ޖަހައި ލީޑު ނެގީ ވެސް ރެއާލުންނެވެ. މެޗުގެ 65 ވަނަ މިނެޓުގައި ރެއާލަށް ލީޑު ނަގައިދިނީ ބްރެޒިލްގެ ވިނީޝިއުސް ޖޫނިއާ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ އިންގްލެންޑުގެ ޖޫޑް ބެލިންހަމް އެވެ. ނަމަވެސް، އޭގެ ތިން މިނެޓު ފަހުން، ލައިޕްޒިގުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ވިލީ އޮބާން އެވެ. އޭގެ ފަހުން ލައިޕްޒިގަށް ވަނީ ދެ ވަނަ ލެގުގެ މެޗު ކާމިޔާބު ކުރަން ވެސް ފުރުސަތު ލިބިފަ އެވެ. ނަމަވެސް ލިބުނު ފުރުސަތު ނިންމާ ނުލެވުނީ އެވެ.

މިހާތަނަށް ކުއާޓާ ފައިނަލުން ޖާގަ ލިބުނީ ހަތަރު ޓީމަކަށެވެ. އެއީ ބަޔާން މިއުނިކް، ޕެރިސް ސެއިންޓް ޖާމަން (ޕީއެސްޖީ)، މެންޗެސްޓަރ ސިޓީ އަދި ރެއާލް މެޑްރިޑެވެ.