ފާއިތުވި ދެ މަހު މާލެ ސަރަހައްދުގައި ދުވާލަކު ގާތްގަޑަކަށް 7 އެކްސިޑެންޓް ހިނގާފައިވޭ، މުޅި ޖުމްލަ 450 އެކްސިޑެންޓް!
އޭގެ ތެރެއިން ގިނަ އެކްސިޑެންޓްތައް ހިނގި ކަމަށް ފާހަގަ ކުރެވެނީ ބުރިޖު އަދި ހައިވޭގައި ނުގަވާއިދުން ދުއްވުމުގެ ސަބަބުން
ބްރިޖް ހައިވޭގައި ނުރައްކާތެރި އެކްސިޑެންޓެއް ހިނގައިގެން އުޅުމުގެ ތެރެއިން
ފާއިތުވި ދެ މަހު މާލެ ސަރަހައްދުގައި 450 އެކްސިޑެންޓް ހިނގާފައިވާ ކަމަށް ފުލުހުން ބުނެފިއެވެ.
ބުދަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި، ސެންޓްރަލް ޕޮލިސިން ކޮމާންޑުގެ އެކި ބަހާތަކުން ކުރި މަސައްކަތްތަކާއި ނަންބަރުތައް ވަނީ ހާމަކޮށްފައެވެ. އެގޮތުން ފާއިތުވި ދެ މަހު، މާލެ އޭރިއާއިން އެންމެ ގިނައިން ރިޕޯޓުކޮށްފައިވަނީ ވައްކަމާއި އެކްސިޑެންޓްގެ މައްސަލަތަކެވެ.
އެކަމުގެ މައުލޫމާތު ދެއްވަމުން މާލެ އެރިއާގެ ޗީފް ސުޕްރިޑެންޓެންޑް އޮފް ޕޮލިސް ހުސެއިން ސަމީރު ވިދާޅުވީ ފާއިތުވި ދެ މަހުގައި ހިނގި އެކްސިޑެންޓްގެ އަދަދުތައް އިތުރުވެފައިވާ ކަން ފާހަކުރެވޭ ކަމަށާއި، އެގޮތުން މުޅި ދެ މަހުގައި 450 އެކްސިޑެންޓެއް ހިނގާފައިވާ ކަމަށެވެ. އޭގެ ތެރެއިން ގިނަ އެކްސިޑެންޓްތައް ހިނގި ކަމަށް ފާހަގަ ކުރެވެނީ ބުރިޖު އަދި ހައިވޭގައި ނުގަވާއިދުން ދުއްވުމުގެ ސަބަބުން ކަން ސަމީރު ފާހަގަ ކުރެއްވިއެވެ.
އެގޮތުން އެކްސިޑެންޓްތައް ހިނގަން މެދުވެރިވި ސަބަބުތައް ފާހަގަ ކުރައްވަމުން ސަމީރު ވިދާޅުވީ، ޚާއްސަކޮށް ބުރިޖު އަދި ހައިވޭގައި ގަވާއިދާ ޚިލާފަށް އޮވަޓޭކް ކުރުމާއި، ޒިގްޒެގްކޮށް އަދި ނުބައި ލޭނުގައި ދުއްވުމާއި، ބާރަށް ދުއްވުމުގެ ސަބަބުން އަނެކާއަށް ސިހުން ލިބުމެވެ.
އަދި މާލެ ސަރަހައްދުގައި، ވަކިން ޚާއްސަކޮށް ބޮޑެތި މަގުތަކުގައި ޔޫޓާން ނެގުމުގައި ހިނގާ ހާދިސާތައް ގިނަ ކަމަށް ފާހަގަ ކުރެވޭ ކަމަށާއި، ބައެއް ހާލަތްތަކުގައި ނުގަވާއިދުން ޕާކުކުރުމުގެ ސަބަބުން މަގު ސާފުކޮށް ނުފެނި އެކްސިޑެންޓްތައް ވެސް ހިނގާ ކަމަށް ސަމީރު ވިދާޅުވިއެވެ.
އަދި އެގޮތަށް ހަރަކާތްތެރިވާ ބައެއް އުޅަނދުތައް ފުލުހުންގެ ބެލުމުގެ ދަށަށް ގެންދެވޭ ކަން ފާހަގަ ކުރައްވަމުން ސަމީރު ވިދާޅުވީ، މޮޑިފައިޑް ސައިލެންސަރުން އަޑު ބާރުކޮށް ދުއްވާ ސައިކަލް އަދި ހަތަރު ފޮރުޅުލީ ވެހިކަލްތައް ފުލުހުންގެ ބެލުމުގެ ދަށަށް ގެނެވޭ ކަމަށެވެ. އެގޮތުން އޭގެ 54 އުޅަނދެއް މިދިޔަ ދެ މަހުގެ ތެރޭގައި ފުލުހުންގެ ބެލުމުގެ ދަށަށް ގެންދެވުނު ކަމަށް ސަމީރު ވިދާޅުވިއެވެ.
އެކްސިޑެންޓްތައް ހިނގާ މިންވަރު މަދުކުރުމަށްޓަކައި އާންމުން ގަވާއިދުން ދުއްވުމުގެ އިތުރުން، ފަރުވާތެރިކަމާ އެކު ދުއްވުމަށް ސަމީރު ވަނީ އެދިވަޑައިގަންނަވައިފައެވެ.
މިފަހަކުން އައިސް އެކްސިޑެންޓްތައް ހިނގާ މިންވަރު ވަރަށް ބޮޑަށް އިތުރުވެ، އެ ފަދަ ޙާދިސާތަކާ ގުޅިގެން ފަރުވާ ދެމުންދާ ނުވަތަ މަރުވާ މީހުންގެ އަދަދުތައް ވެސް ވަނީ އިތުރުވެފައެވެ. ވަކިން ޚާއްސަކޮށް ބުރިޖު، ހަލި މަގު އަދި ހުޅުމާލޭގައި އެފަދަ އެކްސިޑެންޓްތައް ހިނގާ މިންވަރު ގިނަކަމަށް ފާހަގަކުރެވެއެވެ.
