އިސްރާއީލުން ޣައްޒާގައި 364 ޞިއްޙީ ޚިދުމަތްތެރިން ޝަހީދުކޮށްލައިފި
އިސްރާއީލު ސިފައިން ވަނީ 155 ޞިއްޙީ މަރުކަޒު ހަލާކުކޮށް، 32 ހޮސްޕިޓަލަކާއި 53 ޞިއްޙީ މަރުކަޒެއްގެ ޚިދުމަތް ކަނޑައިލާފައި
އިސްރާއީލުގެ އަސްކަރިއްޔާއިން ދިން ހަމަލާއަށްފަހު އެމްބިއުލާންސްގެ ބައިތައް މެޑިކަލް ސިފައިން ބަލަނީ
އިސްރާއީލުން ޣައްޒާގައި 364 ޞިއްޙީ ޚިދުމަތްތެރިން ޝަހީދުކޮށްލައިފި ކަމަށް ރިޕޯޓްތައް ބުނެފިއެވެ.
ޣައްޒާގައި ހުންނަ ފަލަސްޠީނުގެ ޞިއްޙަތާބެހޭ ވުޒާރާގެ ތަރުޖަމާނު އަޝްރަފް އަލްޤުދްރާ ވިދާޅުވީ، އޮކްޓޯބަރު މަހުގެ 7 ވަނަ ދުވަހުން ފެށިގެން އިސްރާއީލުގެ އިސްތިޢުމާރީ ބާރުތަކުން މިހާތަނަށް 364 ޞިއްޙީ އޮފިޝަލުން ޝަހީދުކޮށްލާފައި ވާކަމަށެވެ. ޚާން ޔޫނިސްއާއި ޣައްޒާގެ އުތުރުގެ ހޮސްޕިޓަލްތަކުގެ ޑައިރެކްޓަރުން ހިމެނޭ ގޮތުން، އިތުރު 269 މީހަކު ހައްޔަރުކޮށްފައި ވާކަމަށް ވެސް ފަލަސްޠީނުގެ އޮފިޝަލުންނާ ހަވާލާދީ ޤުދުސް ޕްރެސްއިން ބުނެއެވެ.
އަލްޤުދްރާ އިތުރަށް ވިދާޅުވީ އިސްރާއީލު ސިފައިން 155 ޞިއްޙީ މަރުކަޒު ހަލާކުކޮށް، 32 ހޮސްޕިޓަލަކާއި 53 ޞިއްޙީ މަރުކަޒެއްގެ ޚިދުމަތް މުޅިން ކަނޑައިލާފައި ވާކަމަށެވެ. އަދި ހިފާފައިވާ ހުޅަނގު އައްސޭރިން 126 އެމްބިއުލާންސަށް ހަމަލަދީ އެ އެމްބިއުލާންސްތައް ވެސް ބޭނުންނުކުރެވޭ ވަރަށް ހަލާކުކޮށްފައި ވާއިރު، ޚާން ޔޫނިސްއާއި ޣައްޒާގެ އުތުރުގެ ހޮސްޕިޓަލްތަކުގެ އިންފްރާސްޓްރަކްޗަރ ވެސް މުޅިންހެން ވަނީ ހަލާކުކޮށްލައިފައެވެ.
އަދި ޣައްޒާގެ ޞިއްޙީ ޙާލަތު ވަރަށް ބޮޑަށް ގޯސްވަމުން ދާކަމަށާއި، ޒަރޫރީ ޞިއްޙީ އެހީތެރިކަން ނުލިބުމުގެ ސަބަބުން ޣައްޒާގެ ޞިއްޙީ ހާލަތު ކުރިއަށް އޮތްތަނުގައި މިހާރަށްވުރެވެސް އިތުރަށް ގޯސްވަމުންދާކަން ތަރުޖަމާނު އަޝްރަފް އަލްޤުދްރާ ފާހަގަކުރެއްވިއެވެ.
އިސްރާއީލުގެ ހަމަލަތަކުގެ ސަބަބުން އިންސާނީ އަދި ޞިއްޙީ ކާރިސާއެއް އުފެދި، ބަލިމަޑުކަމާއި ކުރިމަތިވެފައިވާއިރު، ޣައްޒާގައިވަނީ ގައިންގަޔަށް އަރާ ބަލިތައް ފެތުރެން ފަށާފައި ކަމަށްވެސް އަލްޤުދްރާ ވިދާޅުވިއެވެ. އެގޮތުން ގައިންގަޔަށް އަރާ ބަލިތަކުގެ ގާތްގަނޑަކަށް އެއް މިލިއަން ކޭސް، ހެލްތު މިނިސްޓްރީން ރެކޯޑްކޮށްފައި ވާކަމަށާއި، އެކަމަށް ބޭނުންވާ އެއްވެސް ފަރުވާ އެއްވެސް ނުލިބޭކަން އޭނާ ފާހަގަކުރެއްވިއެވެ.
ޣައްޒާގެ އުތުރުގެ ރައްޔިތުން ބޯފެނާއި ކާބޯތަކެތީގެ ދަތިކަމުގެ ސަބަބުން އުފެދިފައިވާ ކާރިސާއާ ކުރިމަތިލާން ޖެހިފައިވާކަމުގެ އިންޒާރު ވެސް އޭނާ ދެއްވިއެވެ. އޭނާ ވިދާޅުވިގޮތުގައި، މިކަމުގެ ސަބަބުން އެތައް ސަތޭކަ ކުޑަކުދިންނާއި އަންހެނުންނާއި އުމުރުން ދުވަސްވީ މީހުންގެ ފުރާނަ ވަނީ ގެއްލިފައެވެ.
އަލްޤުދްރާ ވަނީ ފަލަސްޠީނުގެ އޮފިޝަލުންނާއި، އާންމުންނާއި މުއައްސަސާތަކާއި ޞިއްޙީ ޓީމުތައް ހިމާޔަތްކުރުމަށް ބައިނަލްއަގުވާމީ އިންސާނީ ގާނޫނުތައް ހަރުދަނާކުރުމަށާއި، އިންސާނީ ކާރިސާ އިތުރަށް ގޯސްވިޔަނުދިނުމަށް އިސްރާއީލަށް ފިޔަވަޅު އަޅައިދިނުމަށް އދ.ށް ގޮވާލައްވައިފައެވެ.
މިދިޔަ އޮކްޓޯބަރު މަހުގެ ހަތްވަނަ ދުވަހު ޙަމާސް ޖަމާޢަތުން ބޯޑަރު ހުރަސްކޮށް ޣައްޒާއަށް އަރައިގަތުމާ ގުޅިގެން އިސްރާއީލުން ވަނީ ޣައްޒާއަށް ނުރައްކާތެރި ހަމަލަތަކެއް ދޭން ފަށައިފައެވެ.
ބައިނަލްއަގުވާމީ ކޯޓް އޮފް ޖަސްޓިސްގެ ވަގުތީ ހުކުމާ ޚިލާފަށް އިސްރާއީލުން ޣައްޒާއަށް ދެމުން ގެންދާ ހަމަލާތައް ކުރިއަށް ގެންގޮސްފައިވާއިރު، އޮކްޓޯބަރު މަހުގެ 7 ވަނަ ދުވަހުން ފެށިގެން މިހާތަނަށް ފަލަސްޠީނުގެ 30،631 މީހުން ޝަހީދުކޮށްލައިފައި ވާއިރު އޭގެ ތެރޭގައި ގިނައީ އަންހެނުންނާއި ކުޑަކުދިން ކަމަށާއި، 72،043 މީހުން ޒަޚަމްވެފައި ވާކަމަށް ފަލަސްޠީނުގެ ޞިއްޙަތާބެހޭ އިދާރާތަކުން ބުނެއެވެ.
އިސްރާއީލުން ވަނީ ޣައްޒާގެ އާބާދީ (ޚާއްސަކޮށް ޣައްޒާގެ އުތުރުގެ ރައްޔިތުން) ބަނޑަށްޖައްސައި، ޣައްޒާއަށް ބޮޑެތި ހުރަސްތަކެއް ކުރިމަތިކޮށްފައެވެ.
އިސްރާއީލުގެ ހަމަލަތަކުގެ ސަބަބުން ޣައްޒާގެ އާބާދީގެ 85 އިންސައްތަ މީހުންނަށް ކާބޯތަކެއްޗާއި ސާފު ފެނާއި ބޭހުގެ ދަތިކަން ބޮޑުވެ ގެދޮރު ދޫކޮށް ގޮސްފައިވާއިރު، އެންކްލޭވްގެ އުމްރާނީ ވަސީލަތްތަކުގެ 60 އިންސައްތަ ވަނީ ހަލާކުވެ ނުވަތަ ބޭނުންނުކުރެވޭވަރު ވެފައި ކަމަށް އދ.ން ބުނެއެވެ.
ބައިނަލްއަގުވާމީ ކޯޓް އޮފް ޖަސްޓިސްގައި އިސްރާއީލުގެ މައްޗަށް ވަނީ ޖަރީމާ ހިންގުމުގެ ދަޢުވާ އުފުލައިފައެވެ. މިދިޔަ ޖެނުއަރީ މަހު އެ ކޯޓުން ނެރުނު ވަގުތީ ޙުކުމެއްގައި ވަނީ، ޣައްޒާގައި ދިރިއުޅޭ އާންމުންނަށް އިންސާނީ އެހީތެރިކަން ފޯރުކޮށްދިނުމަށް ޖިނާއީ ޢަމަލުތައް ހުއްޓާލައި، ފިޔަވަޅުތައް އެޅުމަށް ތެލްއަވީވަށް އަންގައިފައެވެ.
