ގޯލްޑަން ފުޓްސަލް ޗެލެންޖު: ގަން، އޭދަފުށި، ގާފަރު އަދި ވިލިމާލެ ސެމީ ފައިނަލަށް

މިހާރު ކުރިއަށްދާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖުގެ ސެމީ ފައިނަލުން، އެންމެ ފަހުގެ ޗެމްޕިއަން ލ. ގަމުގެ އިތުރުން، ބ.އޭދަފުށި، ކ.ގާފަރު އަދި ވިލިމާލެ ޖާގަ ހޯދައިފިއެވެ.

އެންމެ ފަހުގެ ޗެމްޕިއަން ގަމުން ސެމީ ފައިނަލްގެ ޖާގައެއް ހޯދީ، ކުއާޓަރ ފައިނަލްގައި އއ. މަތިވެރި ޕެނަލްޓީން ބަލިކޮށްގެންނެވެ. މެޗުގެ ފުރިހަމަ ވަގުތު ހަމަވީ ދެ ޓީމު 1-1ން އެއްވަރުވެގެންނެވެ. މެޗުގައި އަޙުމަދު ޙަލީމް (އައްމަޑޭ) ގަމަށް ލަނޑު ޖަހައި ލީޑު ނަގައިދީފައި ވަނިކޮށް، މަތިވެރިއަށް ނަތީޖާ ހަމަހަމަކޮށްދިނީ ކީޕަރު މުޙައްމަދު އިމްރާނެވެ. ޕެނަލްޓީގައި ގަމުން ވަނީ މަތިވެރީގެ މައްޗަށް ކުރިހޯދައިފައެވެ. އޭގެ ކުރިން ގަދަ 16 ވަނަ ބުރުގައި ކުޅުނު މެޗު ވެސް ގަމުން ކާމިޔާބު ކުރީ ޕެނަލްޓީ ޖަހައިގެންނެވެ.

އޭދަފުށިން ސެމީ ފައިނަލްގެ ޖާގަ ހޯދީ، މުބާރާތުގެ އެންމެ ކާމިޔާބު ޓީމު ކަމަށްވާ ތ. ތިމަރަފުށި ބަލިކޮށްގެންނެވެ. މެޗުގެ ފުރިހަމަ ވަގުތު ހަމަވީ ދެ ޓީމު 3-3ން އެއްވަރުވެގެންނެވެ. މެޗުގައި އޭދަފުށީގެ ލަނޑުތައް ޖެހީ މުޙައްމަދު ފާސިރު (ފާއްޓޭ) އަދި މުޙައްމަދު ރަޝީދު (ޕޮގްބާ)އެވެ. ފާއްޓޭ ވަނީ ދެ ލަނޑު ޖަހައިފައެވެ. މެޗުގައި ތިމަރަފުށީގެ ލަނޑުތައް ޖެހީ، މުޙައްމަދު އަފްލާޒް، އިސްމާޢީލް މުނީޒް އަދި އިބްރާހީމް ސިނާހެވެ. ނަތީޖާ ނެރުމަށް ޖެހި ޕެނަލްޓީގައި އޭދަފުށިން ކުރި ހޯދީއެެވެ.

ގާފަރުން ވެސް ސެމީ ފައިނަލްގެ ޖާގަ ހޯދީ ޕެނަލްޓީ ޖަހައިގެންނެވެ. ދ. ކުޑަހުވަދުއާ ދެކޮޅަށް ކުޅުނު މެޗުގެ ފުރިހަމަ ވަގުތު ހަމަވީ 2-2ން އެއްވަރުވެގެންނެވެ. މެޗުގައި ކުޑަހުވަދޫގެ ލަނޑުތައް ޖެހީ، މުޙައްމަދު އަރީޝް އަދި ޖުމައިލް ޖަމީލެވެ. ގާފަރުގެ ލަނޑުތައް ޖެހީ އިބްރާހީމް ރިމާހު އަދި އަލީ މާއިސްއެވެ. ނަތީޖާ ނެރުމަށް ޖެހި ޕެނަލްޓީގައި ގާފަރުން ކުޑަހުވަދޫގެ މައްްޗަށް ކުރިހޯދައިފައެވެ.

ކުއާޓަރ ފައިނަލުގައި ވިލިމާލޭން ވަނީ، ސ. ހިތަދޫގެ މައްޗަށް 1-0ން ކުރިހޯދައިފައެވެ. މެޗުގައި ވިލިމާލެއަށް ލަނޑު ޖަހައިދިނީ އިސްމާޢީލް ވަޖީހުއެވެ.

ސެމީ ފައިނަލްގައި އެންމެ ފަހުގެ ޗެމްޕިއަން ކަމަށްވާ ގަން ނިކުންނާނީ ވިލިމާލެއާ ދެކޮޅަށެވެ. އަދި ގާފަރު ނިކުންނާނީ އޭދަފުއްޓާ ދެކޮޅަށެވެ.