އޭސީސީން އެކުލަވާލި ފްލެޓް ލިސްޓު އާންމުކުރަންޖެހޭކަމަށް ގަބޫލުކުރަން: ރޮޒައިނާ

ކުރީ ސަރުކާރުން ހިންގި ގެދޮރުވެރިޔާ ސްކީމުން ދޫކުރާ ފްލެޓްތަކާއި ގުޅޭގޮތުން އެންޓި ކޮރަޕްޝަން ކޮމިޝަން (އޭސީސީ) އިން ކުރި ތަހުގީގުގައި ޝަރުތުހަމަވެ އިތުރު މައްސަލައެއް ހުރިކަން ފާހަގަވެފައިނުވާ ފޯމުތަކުގެ ލިސްޓު މިހާރު އާންމުކުރަންޖެހޭކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ރޮޒައިނާ ވިދާޅުވީ އޭސީސީން ކޮމިޓީއާ ހިއްސާކޮށްފައިވާ މައުލޫމާތުތަކުގައި ސިއްރު ޖަހާފައި ހުރިނަމަވެސް އެ ޑޮކިޔުމަންޓްތަކުގައި އޭސީސީން ހިންގި ތަހުގީގުގެ މައުލޫމާތެއް ނެތްކަމަށެވެ. ރޮޒައިނާ ވިދާޅުވީ މިހާހިސާބަށް އައިއިރު އެ މައުލޫމާތުތައް ރައްޔިތުންނާ ހިއްސާކުރަންޖެހޭކަމަށެވެ. އަދި ލިސްޓުގައި ނަން އޮތްތޯ ބަލަން އެތައް ރައްޔިތުންނެއް އެދެމުން އަންނަކަމަށް ރޮޒައިނާ ވިދާޅުވިއެވެ.

ނަން ޖަހާފައި ލިސްޓު އާންމުކުރަން ބޭނުންނުވާނަމަ ނަންބަރެއް ޖެހުމަށްފަހު ވެސް ލިސްޓު އާންމުކުރެވިދާނެކަމަށް ރޮޒައިނާ ވިދާޅުވިއެވެ.

ރޮޒައިނާ ވިދާޅުވީ އޭސީސީން ބެލިބެލުމުން ޝަރުތުހަމަނުވާ 59 އިންސައްތަ މީހުން ތިބިކަމަށް ބުނިނަމަވެސް ކޮމިޓީން ބެލިބެލުމުން އަދި އެއީ މުޅިން ރަނގަޅުވާހަކައެއް ނޫންކަމަށެވެ. އޭސީސީން ބަލާފައި ވަނީ ކޮންމެހެން ޝަރުތުހަމަވޭތޯ ނުވަތަ ނޫންތޯ ނޫންކަމަށާއި ޝަރުތުހަމަވާކަން ސާބިތުކޮށްދިނުމަށް ހުށަހަޅާފައިވާ ލިޔެކިޔުންތަކުގެ ޞައްހަކަމަށް ބަލާފައިވާނެކަމަށެވެ.

ކޮމިޓީގައި އޭސީސީން ވެސް ލިސްޓު އަލުން އިވެލިޔޭޓްކުރުމަށް ތާއީދުނުކުރާ ކަމަށާއި ހައުސިންގ މިނިސްޓްރީން ވެސް ބުނެފައިވަނީ އަލުން އިވެލުޔޭޓްނުކުރާނެކަމަށް ރޮޒައިނާ ވިދާޅުވިއެވެ.