ފްލެޓް މައްސަލައިގައި ސަރުކާރުން އުޅެނީ ރައްޔިތުން ވާ ވައްދަން، މަޖިލީހުން އެކަމަށް ފާރުވެރިވާނަން: އަނދުން ހުސައިން
ނުހައްގުން ފްލެޓް ދޭ މަންޒަރު ބަލަން އެމްޑީޕީން ނުތިބޭނެ ކަމަށް ވެސް އޭނާ ވަނީ ވިދާޅުވެފަ
ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސައިން ޝަހީމް
ފްލެޓް މައްސަލައިގައި ސަރުކާރުން އުޅެނީ ރައްޔިތުން ވާ ވައްދަން ކަމަށާއި މަޖިލީހުން އެކަމަށް ފާރަވެރިވާނެ ކަމަށް މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސައިން ޝަހީމް (އަނދުން ހުސައިން) ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުންނެވެ. ކުރީ ސަރުކާރުން ހިންގި ގެދޮރުވެރިޔާ ސްކީމުން ދޫކުރާ ފްލެޓްތަކާއި ގުޅޭގޮތުން އެންޓި ކޮރަޕްޝަން ކޮމިޝަން (އޭސީސީ) އިން ކުރި ތަހުގީގާއި ގުޅިގެން ފިޔަވަޅު އަޅަން ވާނީ ކަންކަން ގޯސްކޮށް ކޮށްފައި ހުރި މީހުންނަށް ކަމަށާއި އެއްވެސް މީހަކަށް ފްލެޓް ނުލިބޭގޮތަށް މުޅި މަރުހަލާ މަޑުޖައްސާލުމަކީ ބަލައިގަނެވޭ ކަމެއް ނޫން ކަމަށް އޭނާ ވަނީ ވިދާޅުވެފައެވެ. އޭސީސީން ބެލިބެލުމުން ޝަރުތުހަމަނުވާ 59 އިންސައްތަ މީހުން ތިބިކަމަށް ބުނިނަމަވެސް ފްލެޓް ދިނުމުގައި ގޯސްކޮށް ކަމެއް ކޮށްފައި ނުވާނެ ކަަމަށް އެމްޑީޕީ ސަރުކާރުގައި އެކަމުގައި އިސްކޮށް އުޅުއްވި ފަރާތްތަކުން ބުނެއެވެ. ޝަހީމް ވިދާޅުވީ ފްލެޓް ދިނުމަށް ކަނޑައެޅި ޝަރުތުތައް ހުރީ ފްލެޓަށް އިޢުލާން ކުރި އިރުވެސް ހާމަކޮށްފައި ކަމަށެވެ. އެ ޝަރުތުތަކަށް ފެތޭ ނަމަ ފްލެޓް ދޭން ވާނެ ކަމަށާއި އެ ޝަރުތުތަކަށް ފެތުނު ނަމަވެސް އޭސީސީން ޤަބޫލުކުރާ އެހެން ކަންކަން ފުރިހަމަ ނުވާ ކަަަމަށް ބުނެ ފްލެޓް ލިބުނު މީހުންގެ ހައްގު ނިގުޅައިގަނެގެން ނުވާނެ ކަމަށް އޭނާ ވަނީ ވިދާޅުވެފައެވެ.
ޝަހީމް ވަނީ ފްލެޓްތައް ދިނުމުގެ މައްސަލަ ކުރިއަށް އޮތް މަޖިލިސް އިންތިޚާބަށް ނުފޫޒު ފޯރުވަން ދިގުދަންމާކަމަށާއި އެކަމުގެ ޝަކުވާ ލިބެމުންދާކަމަށް ވިދާޅުވެފައެވެ. އަދި ސަރުކާރުގެ ބައެއް ކެނޑިޑޭޓުން އެ ކެނޑިޑޭޓުންނަށް ވޯޓު ދިނުމުން ނޫނީ ފްލެޓް ނުލިބޭނެ ކަމަށް ބުނާތީ އެކަމާއި މެދު ކަންބޮޑުވުން ހިއްސާކުރެއްވިއެވެ. ނުހައްގުން ފްލެޓް ދޭ މަންޒަރު ބަލަން އެމްޑީޕީން ނުތިބޭނެ ކަމަށް ވެސް އޭނާ ވަނީ ވިދާޅުވެފައެވެ.
ގެދޮރުވެރިޔާގެ ފްލެޓްގެ ތެރެއިން، ފުރަތަމަ 4،000 ފްލެޓްގެ ލިސްޓުގައި ބޮޑެތި މައްސަލަތަކެއް އުޅޭ ކަމަށް ބުނެ އޭސީސީން ގެދޮރުވެރިކަމާ ބެހޭ ވުޒާރާއަށް މީގެ ކުރިން ސީޓީ އެއް ފޮނުއްވިއެވެ. އަދި މައްސަލަ ބެލުމަށް ފަހު ފްލެޓް ލިބުނު މީހުންގެ ލިސްޓުން ޝަރުތު ހަމަވަނީ ގާތްގަޑަކަށް އެންމެ 20 ޕަސެންޓް ފޯމުގައި ކަމަށް އޭސީސީން ބުނެފައިވެއެވެ.
