އެއްވެސް ޤާނޫނީ ލަފައެއް ހޯދާކަށް ނުޖެހޭ، މަޖިލީހުން ފާސްކުރީމަ ތަސްދީޤުކުރެއްވުން ނޫން ގޮތެއް ނޯންނާނެ: ބިގޭ
އޭޖީގެ ޤާނޫނީ ލަފަޔަކަށް އެދި ދަންނަވާނެކަމަށް ރައީސް ވިދާޅުވި
އަލިފުށީ ދާއިރާގެ މެންބަރު މުޙައްމަދު ރަޝީދު ހުސައިން (ބިގޭ)
ރޯދައިގެ ފަހަށް މަޖިލިސް އިންތިހާބު ބާއްވަން ގެނައި އިސްލާހު ތަސްދީގު ކުރުމާމެދު އެއްވެސް ޤާނޫނީ ލަފަޔަކަށް އެދެން ނުޖެހޭނެކަމަށާއި، މަޖިލީހުން ފާސްކުރީމަ ތަސްދީޤު ކުރެއްވުން ނޫން ގޮތެއް ނޯންނާނެކަމަށް އަލިފުށީ ދާއިރާގެ މެންބަރު މުޙައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
ބިގޭ މިހެން ވިދާޅުވީ ދެވަނަ ފަހަރަށް ބިލު ފާސްކޮށްފައި މަޖިލީހުން ފޮނުވުމުންވެސް އެ ބިލު ތަސްދީޤު ނުކުރައްވާނެކަމުގެއިޝާރާތެއްރައީސް ޑރ މުޙައްމަދު މުއިއްޒު ދެއްވުމާއި ގުޅިގެންނެވެ.
ކެމްޕޭނު ދަތުރުފުޅެއްގައި ވާހަކަފުޅު ދައްކަވަމުން ރައީސް ވިދާޅުވެފައިވަނީ، މަޖިލީހުގެ ޖުމުލަ މެންބަރުންގެ އަދަދު ގުނާއިރު، 80 މެންބަރުންނަށް ބަލައިގެން ނިންމާ ނިންމުން ބާތިލުވާނެކަމަށް ސުޕްރީމް ކޯޓުން ނިންމާފައިވާތީ، މަޖިލީހުން މީގެ ކުރިން ނިންމި ނިންމުންތަކުގެ ސައްޙަކަމާމެދު ވެސް ސުވާލު އުފެދޭ ކަމަށެވެ. އެގޮތުން އެ ނިންމުންތަކުގެ ޤާނޫނީ ހައިސިއްޔަތާމެދު ސުވާލު އުފެދޭކަމަށް ރައީސް ވިދާޅުވިއެވެ.
ވުމާއެކު، އޭޖީގެ ޤާނޫނީ ލަފަޔަކަށް އެދި ދަންނަވާނެކަމަށް ރައީސް ވިދާޅުވިއެވެ.
މިކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން ބިގޭ ވިދާޅުވީ، މިކަމުގައި ރައީސް އެއްވެސް ޤާނޫނީ ލަފައެއް ހޯއްދަވަން ޖެހިވަޑައިނުގަންނަވާނެ ކަމަށެވެ. އެގޮތުން މަޖިލީހުން ފާސްކުރީމަ ތަސްދީޤު ކުރެއްވުން ނޫން ގޮތެއް ނޯންނާނެކަމަށްވެސް ބިގޭ ވިދާޅުވިއެވެ.
ގާނޫނު އަސާސީ ބުނާ ގޮތުން، ރައީސް ތަސްދީގުނުކޮށް ބިލު އަނބުރާ ފޮނުވައިލި ނަމަވެސް ބަދަލެއް ނުގެނެސް ދެވަނަ ފަހަރަށް ފާސްކުރުމުގެ ފުރުސަތު މަޖިލީހަށް ލިބިދެއެވެ.
އަދި، މަޖިލީހުގެ ޖުމުލަ މެންބަރުންގެ އަޣުލަބިއްޔަތުން އެގޮތަށް ފާސްކޮށްފި ނަމަ، އެ ބިލެއް ތަސްދީގުކުރަން ޖެހޭނެއެވެ. އެހެންކަމުން މި ބިލު ރައީސް ތަސްދީގު ނުކުރައްވައިފިނަމަ، ކަނޑައެޅިގެން އެމަނިކުފާނު ގާނޫނާ ޚިލާފުވާނޭކަމަށް އެމްޑީޕީން އަންނަނީ ބުނަމުންނެވެ.
މީގެ އިތުރުން، ސުޕްރީމް ކޯޓުގެ ނިންމުމުގައި މަޖިލީހުގެ ޖުމުލަ މެންބަރުންގެ އަދަދު ގުނާނީ 87 ކަމަށް ބަލައިގެންކަމަށް ނިންމާފައިވާއިރު، އެ އަދަަދަށް ބެލި ނަމަވެސް، ބުދަ ދުވަހު މަޖިލީހުން ފާސްކުރި ބިލަށް ޙުކުމުގައި ބުނެފައިވާ އަދަދަށް މެންބަރުން ވަނީ ވޯޓު ދެއްވާފައެވެ. އެގޮތުން ބުދަ ދުވަހު މަޖިލީހުން ފާސްކުރި ބިލު، ދެވަނަ ފަހަރަށް ފާސްކުރީ ވޯޓުގައި ބައިވެރިވި މެންބަރުންގެ ތެރެއިން 47 މެންބަރުންގެ ވޯޓުންނެވެ.
