ފްލެޓު މައްސަލާގައި ސިއްރު މައުލޫމާތު ހިމެނޭތީ މިނިވަން މުއައްސަސާ ކޮމިޓީ ސިއްރުކޮށްފި

މިދިޔަ ސަރުކާރުން ދޫކުރި 4،000 ފްލެޓްގެ މައްސަލަތައް ދިރާސާ ކުރުމަށް މިނިވަން މުއައްސަސާ ކޮމިޓީން ކުރިއަށްގެންދިޔަ ބައްދަލުވުން ސިއްރުކޮށްފިއެވެ.

ބުދަ ދުވަހު ކޮމިޓީއަށް ހާޒިރުކޮށްފައިވަނީ ކުރީ ސަރުކާރުގެ ހައުސިންގ މިނިސްޓްރީގައި ފްލެޓާގުޅޭ ކަންކަމުގައި އިސްކޮށް އުޅުއްވި އޮފިޝަލުންނާއި މި ސަރުކާރުގެ ހައުސިންގ މިނިސްޓްރީގެ އިސް އޮފިޝަލުން، އަދި އެންޓި ކޮރަޕްޝަން ކޮމިޝަން (އޭސީސީ)ގެ މެންބަރުންނެވެ.

މި ކޮމިޓީ ސިއްރުކުރަން ނިންމާފައިވަނީ ފްލެޓުތަކާ ގުޅޭގޮތުން އޭސީސީން މިނިވަން މުއައްސަސާތަކުގެ ކޮމެޓީއާ ހިއްސާކޮށްފައިވާ މައުލޫމާތުގައި ސިއްރު މައުލޫމާތު ހިމެނޭތީއެވެ. ބުދަ ދުވަހުގެ ކޮމިޓީގައި މި ސިއްރު މައުލޫމާތުތަކާއި ގުޅޭގޮތުން މަޝްވަރާ ކުރާނެއެވެ. އެކަން އެންމެ ފަހުން މި މައްސަލާގައި ބޭއްވި ކޮމިޓީގައި ފާހަގަކޮށް، ކޮމިޓީ ސިއްރުކުރަން ވަނީ ނިންމާފައެވެ.

މީގެ ކުރިން ބޭއްވި ކޮމިޓީގައި އޭސީސީން ބުނެފައިވަނީ ފުލެޓް ލިބޭނެކަމަށް ބުނެފައިވާ ފަރާތްތަކުގެ ތެރެއިން ފްލެޓް ލިބެންޖެހޭ ފަރާތްތަކަށް ފްލެޓް ދޫކުރުމުގެ މަސައްކަތް ލަސްވެެ، މީހެއްގެ ހައްގެއް ގެއްލޭ ހިސާބަށް ގޮސް، ކޮރަޕްޝަނަށް މަގުފަހިވާނަމަ އޭސީސީން އެކަމުގެ ތެރެއަށް ވަންނާނެކަމަށެވެ. އޭސީސީން ބުނީ ތަހުގީގުގައި ޝަރުތުހަމަވެ، އެއްވެސް މައްސަލައެއް ފާހަގަވެފައި ނުވަނީ 20.7 އިންސައްތަ ފޯމުގައި ކަމަށެވެ.

މީގެ އިތުރުން އޭސީސީން ވަނީ ފްލެޓުގެ މައްސަލަތައް ތަހުގީގު ކުރުމަށްފަހު ފާހަގަވި ކަންކަން ވެސް ހިއްސާކޮށްފައި ވެއެވެ. އެގޮތުން، މާލޭގައި 15 އަހަރުވެފައިވާ ފަރާތްތައް ކަނޑައެޅުމުގައި ހަމައެކަނި ގޭގެ ވެރިފަރާތުގެ ލިއުންތަކަށް ބަރޯސާވެގެން ޕޮއިންޓް ދީފައިވާ ކޭސްތައްވެސް ފާހަގަވެފައިވާ ކަމަށެވެ. ބައެއް ފަރާތްތައް ދަފްތަރުގައި ޖެހުމުން އިތުރަށް ބަލަންޖެހޭ ކަންކަން ކަށަވަރުވުމެއް ނެތި ޝަރުތު ހަމަވާކަމަށް ކަނޑައަޅާފައިވާ ކަމަށެވެ.

އޭގެ އިތުރުން، ކުންފުނި ރަޖިސްޓްރީ ކޮށްފައިވާ ތާރީޚުގެ މާ ކުރިން އެ ކުންފުންޏެއްގައި ވަޒީފާ އަދާކޮށްފައިވާކަމަށް ވެސް ހުށަހަޅާފައިވާ ބައެއް ފޯމު ޝަރުތު ހަމަވާކަމަށް ކަނޑަައަޅާފައިވާކަންވެސް ތަހުގީގަށް ފާހަގަވެފައިވާ ކަމަށް އޭސީސީން ބުނެއެވެ. އަދި މަހަކަށް ޖެހޭ ޖުމުލަ އާމްދަނީ 60،000 ރުފިޔާއަށްވުރެ އިތުރަށް ލިބޭ ފަރާތްތައްވެސް ޝަރުތު ފުރިހަމަވާ ފަރާތްތަކުގެ ގޮތުގައި ކަނޑައަޅާފައިވާ މައްސަލަަތައް އޭސީސީން ފާހަގަކޮށްފައި ވެއެވެ.

އޭސީސީން ބުނީ، ދައުލަތުގެ މުއައްސަސާތަކުން ފަސޭހައިން ހޯދެން ހުރި މައުލޫމާތުތައް އެންމެ އެކަށީގެންވާ ގޮތެއްގައި ކަށަވަރުކޮށްފައި ނެތުމުގެ ސަބަބުން، ޕޮއިންޓް ދިނުމުގައި މައްސަލަތައް ދިމާވެފައިވާކަން ފާހަގަކުރެވޭ ކަމަށެވެ.

މި މައްސަލަތައް ބެލުމަށްފަހު، މައްސަލައެއް ނެތް، ޝަރުތު ފުރިހަވާ ފަރާތްތަކަށް ފްލެޓްތައް ދޫކުރުން ކުރިއަށް ގެންދިއުމަށް ހައުސިންގ މިނިސްޓްރީގައި އޭސީސީން ވަނީ އެދިފައެވެ. ނަމަވެސް ފްލެޓްތައް ދޫކުރުން ލަސްވާތީ، ފްލެޓް ލިބިފައިވާ މީހުން ކަންބޮޑުވުންފާޅުކޮށް، ދޭތެރެދޭތެރެއިން ހައުސިންގ މިނިސްޓްރީއަށް އެއްވެ، ދަނީ މުޒާހަރާތައް ކުރަމުންނެވެ.