މިދިޔަ 5 އަހަރު އައްޑޫ ދެކެމުން އައި ތަރައްޤީ އަނެއްކާވެސް މަަޑުޖެހިއްޖެ - ނާޒިލް
އައްޑޫސިޓީ ހިތަދޫ ބަނދަރުގެ މަސައްކަތް ހުއްޓިފައިވާ ކަމަށް އޭނާ ވިދާޅުވި
ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހިމް ނާޒިލް
ނިމިދިޔަ 5 އަހަރު އައްޑޫ ދެކެމުން އައި ތަރައްޤީ އަނެއްކާވެސް މަަޑުޖެހިފައިވާ ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހިމް ނާޒިލް ވިދާޅުވެއްޖެއެވެ.
އެމްޑީޕީގެ މިސްރާބު ހަމަމަގަށް ކެމްޕެއިން ޖަލްސާގައި ވާހަކަދައްކަވަމުން ނާޒިލް ވިދާޅުވީ މަޝްރޫތައް ހިނގުން މިހާރު ލަސްވެފައިވާ ކަމަށެވެ. އެގޮތުން އައްޑޫސިޓީ ހިތަދޫ ބަނދަރުގެ މަސައްކަތް ކުރާ އެކްސްކަވޭޓަރ އަށް އަޅާނެ ޑީސަލް ވެސް ހުސްވެފައިވާ ކަަމަށާއި، އެކްސްކަވޭޓަރަށް ޑީސަލް ނޭޅި 45 ދުވަސް ވެފައިވާ ކަމަށް ނާޒިލް ވަނީ ވިދާޅުވެފައެވެ. އަދި އެ މަސައްކަތް ކުރަމުން އައި އެކްސްކަވޭޓަރ ސައިޓުން ގެންގޮސްފައިވާ އިރު އެ އެކްސްކަވޭޓަރ ގެންދިޔަ ތަނެއް އެނގޭ މީހަކުވެސް ނެތް ކަމަށް އޭނާ ވިދާޅުވިއެވެ. އައްޑޫ ތަމްސީލްކުރާ މަޖިލީސް މެމްބަރުން އެކަންކަމަށް ފާރަވެރިވާން ޖެހޭ ކަމަށް އޭނާ ވިދާޅުވިއެވެ. މީގެ އިތުރުން އައްޑޫ އަށް ދިމާވެފައިވާ ކަރަންޓުގެ މައްސަލަ އަށް ވެސް އޭނާ އަލިއަޅުވާލެއްވިއެވެ. ކުރިން ޕީޕިއެމްގެ ވެރިކަމެއް އޮތް އިރު ވެސް އައްޑޫ އަށް ވަރަށް ބޮޑަށް ކަރަންޓުގެ މައްސަލަ ދިމާވިކަން ފާހަގަކުރައްވާ ނާޒިލް ވަނީ އައްޑޫ އިން އެ ހާލަތަށް އަނބުރާ ދާން ބޭނުން ނުވާ ކަމަށް ފާހަގަކުރައްވާފައެވެ.
އޭނާ ވަނީ އައްޑޫގެ މަސްވެރިންނަށް ފައިސާ ނުލިބި 75 ދުވަސް ވެފައިވާ ކަމަށާއި އެއީވެސް ވަރަށް ބޮޑު ކަންބޮޑުވުމެއް ކަމަށް އޭނާ ވިދާޅުވިއެވެ. ނާޒިލް ވިދާޅުވީ ރާއްޖެ ދުށް ރީތި، ނަލަ ފަހި ފަސް އަހަރު ފާއިތުވެ ނިމި ގޮސްފައިވާ ކަމަށެވެ. އޭނާ އެފަދައިން ވިދާޅުވީ ކުރީގެ ރައީސް އިބްރާޙިމް މުހައްމަދު ޞާލިހުގެ ވެރިކަމަށް އިޝާރާތްކުރައްވައެވެ. އެމްޑީޕީގެ 5 އަހަރުގެ ވެރިކަން ވަރަށް ފުރިހަމަ ކަމަށާއި އެނބުރި ކުރީގެ ދުވަސްތަކަށް ދާން ދިވެހިން ބޭނުން ވާ ކަމަށް ނާޒިލް ވިދާޅުވިއެވެ. އަދި ކުރިއަށް އޮތް މަޖިލިސް އިންތިޚާބުގައި ވާދަކޮށް ކާމިޔާބުކުރާ ކެނޑިޑޭޓުން މަސައްކަތް ކުރާނީ ރާއްޖޭގެ މިސްރާބު ހަމަ މަގަށް އަޅުވަން ކަަމަށް އޭނާ ވިދާޅުވިއެވެ.
