މެންބަރުންގެ އަދަދުކަނޑައެޅުމާއި މެދު ސުޕްރީމްކޯޓަށް ހުށަހެޅި މައްސަލައަކީ އަމިއްލަ މަންފާ ހޯދަން ހުށަހެޅި ބާތިލް މައްސަލަ އެއް - ބިގޭ

ރައްޔިތުންގެ މަޖިލީހުގެ ޖުމްލަ މެންބަރުންގެ ޢަދަދު ކަނޑައެޅުމާ ގުޅޭގޮތުން ރައްޔިތުންގެ މަޖިލީހުގެ ގަވާއިދަށް ގެނައި އިސްލާހު ބާތިލުކުރުމަށް އެދި ދިވެހިރާއްޖޭގެ ސުޕްރީމް ކޯޓަށް ބަންޑާރަ ނައިބުގެ އޮފީހުން ހުށަހަޅާފައިވާ ދުސްތޫރީ މައްސަލައަކީ ބާތިލް މައްސަލަ އެއް ކަމަށާއި، ވަކި ބޭނުމެއްގައި އަމިއްލަ މަންފާ އެއް ހޯދުމަށް ހުށަހަޅާފައިވާ މައްސަލަ އެއް ކަމަށް މަޖިލީހުގެ އަލިފުށީ ދާއިރާގެ މެންބަރު އަދި އެމްޑީޕީ ޕީޖީ ގުރޫޕުގެ ލީޑަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

އޭނާ އެފަދައިން ވިދާޅުވީ ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައެވެ. މިހާރު ފެނިގެން ދަނީ އެއްބާރުން އަނެއް ބާރަށް އިޙްތިރާމް ނުކުރާ މަންޒަރުކަމަށާއި އެއީ ވަރަށް ބޮޑަށް ކަންބޮޑުވެވަޑައިގަންނަވާ ކަމެއް ކަަމަށް އޭނާ ވަނީ ވިދާޅުވެފައެވެ. މަޖިލީހުގެ ޤަވާއިދުގެ 49 ވަނަ މާއްދާގެ ކ،އ އަދި ވ އަށް އަކުރެއް އިތުރުކޮށް ބަދަލުތައް ގެނެސްފައިވާނެ ކަަމަށް އޭނާ ވިދާޅުވިއެވެ. އެ ބަދަލުތަކާއި ގުޅިގެން ސުޕްރީމްކޯޓަށް މައްސަލަ އެއް ހުށަހަޅައިގެން ކުރިއަށް ގެންދަވާ އިރު އެ މައްސަލަ ހުށަހެޅުއްވީ ބަންޑާރަނައިބުކަން އޭނާ ވަނީ ފާހަގަކުރައްވާފައެވެ. ބަންޑާރަނައިބަކީ މަޖިލީހުގެ މަސްލަހަތު ހިމާޔަތްކޮށް މަޖިލީހުގެ ކަންކަމުގައި ވެސް ވަކާލާތުކުރަން ޖެހޭ ފަރާތްކަން އޭނާ ވަނި ފާހަގަކުރައްވާފައެވެ. 49 ވަނަ މާއްދާ އާއި މެދު މި މައްސަަލަ ސުޕްރީމްކޯޓުގައި ކުރިއަށް ދަނިކޮށް މަޖިލީހުގެ ކޮމިޓީން ފާސްކޮށްގެން 49ވަނަ މާއްދާގެ އ،ވ އަދި ކ އުނިކޮށް އަކުރެއް އިތުރުކޮށްފައިވާ ކަމަށް ވެސް އޭނާ ވަނީ ވިދާޅުވެފައެވެ. އެހެންކަމުން މިހާރު ސުޕްރީމްކޯޓުގައިކުރިއަށް ދަނީ ބާތިލް މައްސަލަ އެއް ކަމަށް އޭނާ ވަނީ ވިދާޅުވެފައެވެ. މިހާރު މަޖިލީހުން ދަނީ ކުރިން އަމަލުކުރަމުންދިޔަ މާއްދާތައް އުނިކުރުމަށް ފަހު އެކުލަވާލި މާއްދާއަކަށް ކަމަށް ވެސް ބިގޭ ވަނީ ވިދާޅުވެފައެވެ.

އޭނާ އެފަދައިން ވިދާޅުވެފައިވާއިރު، ރައްޔިތުންގެ މަޖިލީހުގެ ޖުމްލަ މެންބަރުންގެ ޢަދަދު ކަނޑައެޅުމާ ގުޅޭގޮތުން ރައްޔިތުންގެ މަޖިލީހުގެ ގަވާއިދަށް ގެނައި އިސްލާހު ބާތިލުކުރުމަށް އެދި ދިވެހިރާއްޖޭގެ ސުޕްރީމް ކޯޓަށް ބަންޑާރަ ނައިބުގެ އޮފީހުން ހުށަހަޅާފައިވާ ދުސްތޫރީ މައްސަލައިގެ އަޑުއެހުންތައް ބުރާސްފަތި ދުވަހު ވަނީ ނިންމާލައްވާފައެވެ. ސުޕްރީމްކޯޓަށް މައްސަލަ އެއް ހުށަހަޅުއްވާފައި ވަނީ މަޖިލީހުގެ ގަވާއިދަށް ގެނެސްފައިވާ ތިން އިސްލާހާއި ގުޅިގެން ކަމަށް ވާއިރު އެ އިސްލާހުތައް އެ މާއްދާއިން އުނިކުރުމަށް ދާދި ފަހުން މަޖިލީހުގެ އާންމު ކޮމިޓީން ވަނީ ފާސްކޮށްފައެވެ. އެގޮތުން ކޮމިޓީން ފާސްކުރީ މަޖިލީހުގެ ގަވާއިދަށް ގެނެސްފައިވާ ތިން އިސްލާހު އެ މާއްދާއިން އުނިކޮށް، މަޖިލީހުގެ ގަވާއިދުގެ 242 ވަނަ މާއްދާގެ ފަހަތަށް އިތުރުކުރުމަށެވެ. އެގޮތުން 'ހުސްވާ ގޮނޑިއަށް މެމްބަރަކު އިންތިހާބު ކުރެވެން ނެތް ހާލަތުގައި މަޖިލީހުގެ މެމްބަރުން އަދަދު ގުނާނެ ގޮތް' ކިޔާ މާއްދާއެއް މަޖިލީހުގެ ޤަވާއިދުގެ 242 ވަނަ މާއްދާއަށް އިތުރު ކުރުމަށް ކޮމިޓީން ވަނީ ފާސްކޮށްފައެވެ.