ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ފުރަތަމަ ލެގުގައި އާސެނަލާ ދެކޮޅަށް ކުޅުނު މެޗުން ޕޯޓޯ މޮޅުވެއްޖެ އެވެ.
ބުދަ ދުވަހުގެ ރޭ ޕޯޓޯގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ.
މެޗުގައި އާސެނަލުން ރަނގަޅު ކުޅުމެއް ދެއްކި ނަމަވެސް، ޕޯޓޯގެ ގޯލަށް އަމާޒުކޮށް ރަނގަޅު ހަމަލާއެއް އެ ޓީމަށް ފޮނުވާލެވިފައެއް ނުވެ އެވެ. ނަމަވެސް މެޗުގައި ޕޯޓޯ އިން ވަނީ ލަނޑު ޖަހާނެ ފުރުސަތުތަކެއް ފުރަތަމަ ހާފުގައި ވެސް ތަނަވަސްކޮށްފަ އެވެ. މެޗު އެއްވަރުވެގެން އޮވެ ނިމެން ދަނިކޮށް، ޕޯޓޯ އިން ލީޑު ނެގީ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. އޮޓާވިއޯ ތަނަވަސްކޮށްދިން ފުރުސަތެއްގައި އެ ލަނޑު ޖެހީ ޖަލޭނޯ އެވެ.
ފުރަތަމަ ލެގުގައި އާސެނަލްގެ މައްޗަށް ކުރި ލިބުމާއެކު، ޕޯޓޯ އިން ވަނީ ކުއާޓާ ފައިނަަލްގެ އުންމީދު ބޮޑުކޮށްފަ އެވެ. ހަތް އަހަރަށްފަހު ޗެމްޕިއަންސް ލީގުގައި ވާދަކުރަމުން އަންނަ އާސެނަލަށް، ކުއާޓާ ފައިނަލްގެ ފުރުސަތު އޮންނާނީ މާޗު މަހުގެ 13 ވަނަ ދުވަހު އަމިއްލަ ދަނޑުގައި ކުޅޭ މެޗުން ޕޯޓޯ ބަލިކޮށްގެންނެވެ.
