ރައީސުލްޖުމްހުރިއްޔާ ޑރ.މުހައްމަދު މުއިއްޒު އިއްވެވި ރިޔާސީ ބަޔާނުގައި އިޖްތިމާއީ ރައްކާތެރިކަމުގެ ސިޔާސަތުތަކަށް އެއްވެސް މިންވަރަކަށް އަލިއަޅުއްވާލައްވާފައިނުވާ ކަމަށް ރިޔާސީ ބަޔާނުގެ ޖަވާބުގައި އެމްޑީޕީން ބުނެފިއެވެ.
ހޯމަ ދުވަހު އޮތް ޖަލްސާއަށް ރިޔާސީ ބަޔާނުގެ ޖަވާބު ހުށަހަޅުއްވައިދެއްވީ އަލިފުށީ ދާއިރާގެ މެމްބަރު މުޙައްމަދު ރަޝީދު ހުސައިން (ބިގޭ) އެވެ.
އޭނާ ވިދާޅުވީ އިޖްތިމާއީ ގޮތުން ރާއްޖެ މިހާރު ތަހައްމަލުކުރަމުން މި އަންނަ ގޮންޖެހުންތަކަކީ އެކަމުގެ އަސަރު މުޅި އިގްތިސާދަށް ވެސް ކުރާނެ ކަންކަން ކަމަށެވެ. ނަމަވެސް އިޖްތިމާއީ ރައްކާތެރިކަމުގެ ސިޔާސަތުތަކަށް އެއްވެސް މިންވަރަކަށް އަލިއަޅުވައިނުލައްވައި ރައީސްގެ ރިޔާސީ ބަޔާން ނިންމަވާލެއްވީ ކަމަށް މެންބަރު ވިދާޅުވިއެވެ.
މެންބަރު ވިދާޅުވީ ތައުލީމާއި، ސިއްހަތާއި، އިސްލާމްދީނުގެ ސައްހަ އަގީދާއާއ،ި ކުޑަކުދިން އަދި މިނޫންވެސް އިޖްތިމާއި އެކިއެކި ދާއިރާތަކުގައި ކަންބޮޑުވާ އެތައް ކަމެއް އެބަހުރި ކަމަށެވެ.
ކޮންމެ މީހެއް ގާތުންވެސް ރާއްޖެއަށް މިއަދު ދިމާވެފައިވާ އެންމެ ބޮޑު އިޖްތިމާޢީ މައްސަލައަކީ ކޮބައިތޯ އައްސަވާ! ވިދާޅުވާނެ އެއީ މަސްތުވާތަކެތި އަދި ކުށުގެ ވެއްޓާއި ގާތް ގުޅުން އޮންނަ ކުށް ކުރާ ގުރޫޕްތަކުގެ މައްސަލަތައް ކަމަށް. އަޅުގަނޑު މި ރިޔާސީ ބަޔާން އަޑު އަހާފައި އެންމެ ކަންބޮޑުވީ އެކަމާ ގުޅޭ ގޮތުން އެއްވެސް އެއްޗެއް ރައީސް ވިދާޅުނުވީމާ. މިއީ ހަގީގަތުގައި ވަރަށް ސީރިއަށް މައްސަލައެއް. އެކަން އެގޮތަށް ވީ ކީއްވެތޯއާމެދު ރައީސުލްޖުމްހޫރިއްޔާ ސާފުކޮށްދެއްވަންޖެހޭ ފަދަ ބޮޑު ކަމެއް މިއީއަލިފުށީ ދާއިރާގެ މެމްބަރު މުޙައްމަދު ރަޝީދު ހުސައިން (ބިގޭ)
ދިވެހިން އެންމެ އިސްކަން ދެނީ ކުދިންނަށް ދޭ ތައުލީމްކަން ފާހަގަކުރައްވައި މެންބަރު ވިދާޅުވީ ތައުލީމީ މަންހަޖާއި ޓީޗަރުންގެ ފެންވަރާއި ސްކޫލްތަކުގެ ވަސީލަތްތައް ހަމަކުރުމާއި ހުރިހާ ކަމަކަށް ބަލާއިރު ދައުލަތުގެ ބަޖެޓުން އެންމެ ބޮޑު ހޭދައެއް ކުރާ އެއް ދާއިރާއަކީވެސް ތައުލީމީ ދާއިރާ ކަމަށެވެ.
ރިޔާސީ ބަޔާނުގައި މުދައްރިސުންގެ ގޮތުގައި އެކި މާއްދާތައް ކިޔަވައިދޭނެ ގާބިލް ދިވެހީން ގިނަކުރާން ފެއްޓެވި ކަމަށް ވިދާޅުވިއިރު ތައުލީމީ ދާއިރާއަށް ދިމާވި އެންމެ ބޮޑު ގޮންޖެހުމަކީ ދާއިރާގެ މުވައްޒަފުންގެ މުސާރަ ކުޑަވުން ކަމުގައި ތަކުރާރުކޮށް އަޑުއިވެމުން އައި ކަމަށެވެ. އެކަން ހައްލުކުރީވެސް އެމްޑީޕީ ސަރުކާރުން ކަން މެންބަރު ފާހަގަކުރެއްވިއެވެ. އަދި ވިދާޅުވީ ތައުލީމީ ދާއިރާގެ 9000 މުވައްޒަފުންނަށް މުސާރައިގެ ކުރިއެރުން ކަށަވަރުކުރުމުގެ ނަތީޖާއަކީ މި ދާއިރާއަށް އާ ޖީލެއް ބިނާކުރެވެން ފެށުން ކަމަށެވެ.
މީގެ އިތުރުން މެންބަރު ވިދާޅުވީ ތައުލީމީ ދާއިރާށް މިވީ މަދު ދުވަސްތެރޭގައި ސަރުކާރުން ބޮޑެތި ބަދަލުތައް ގެންނަނީ އެއްވެސް މަޝްވަރާއެއް ނެތި ސިޔާސީ ބޭނުމުގައި ކަމަށެވެ. ދިރާސީ އަހަރު ފެށޭ ތާރީޚު ބަދަލުކުރުމުގެ ނުރަނގަޅު އަސަރު ކުދިންނަށް ކުރާނެ ކަމަށާއި، ކުރުކޮށްގެން ސިލަބަސް ނިންމުން އެއީ ކަންބޮޑުވާ ކަމެއް ކަމަށް މެންބަރު ވިދާޅުވިއެވެ.
ބޭރުގެ ޤައުމުތަކުގައި ދިރިއުޅޭ ދިވެހި ދަރިވަރުންނަށް ދިވެހިބަހާ އިސްލާމް ކިޔަވައިދިނުން ފަށްޓަވާނެ ކަމަށް ވިދާޅުވެ ހެއްދެވީ ސީދާ އިތުރުފުޅެއް. ދިވެހި އާއިލާތައް އެންމެ ގިނައިން ދިރިއުޅޭ ލަންކާ އަދި މެލޭޝިޔާގައި ދައުރު ނިމުނު އިރުވެސް ދައުލަތުން ޚަރަދުކޮށްގެން އިސްލާމް އަދި ދިވެހި ކިޔަވައިދެމުން ގެންދޭ. ރާއްޖޭގެ އާބާދީގެ ބޮޑު ބަޔަކީ ޒުވާނުން. އެ ޒުވާނުންނަށް ނިމިދިޔަ ސަރުކާރުން ކޮށްދެވުނު އެންމެ މުހިއްމު ކަމަކީ ހިލޭ ޑިގްރީއަށް ކިޔެވޭނެ ގޮތް ހަދައިދިނުން. މަތީ ތާއުލީމުގެ އެއްވެސް ވާހަކައެއް ރިޔާސީ ބަޔަނުގައި ނެތް ކަމީ ވަރަށް ދެރަ ކަމެއް.އަލިފުށީ ދާއިރާގެ މެމްބަރު މުޙައްމަދު ރަޝީދު ހުސައިން (ބިގޭ)
ސިއްހީ ދާއިރާއަށް އިޝާރާތް ކުރައްވައި މެންބަރު ވިދާޅުވީ ސިއްހީ ދާއިރާ ހަރުދަނާ ކުރުމަށް ރައީސްގެ ރިޔާސީ ބަޔާނުގައި ފާހަގަކުރައްވާފައި ހުރީ މުޅިންވެސް އެމްޑީޕީ ސަރުކާރުގައި ފަށާފައިވާ ހިނގަހިނގާ ހުރި ކަންކަން ކަމަށެވެ.
އައްޑޫ އަދި ކުޅުދުއްފުށީ ހޮސްޕިޓަލުގެ ފެންވަރު ރަނގަޅުކުރައްވާނެ ކަމަށް ރައީސް ވިދާޅުވި. އަޅުގަނޑު ދެން މިދަންނަވާލާ ކަންކަން ހަނދާން ނެތޭހާ ދުވަހެއް އަދި ނުވޭ. މާލެ ނައިސް ހިދުމަތް ދެވޭހެން 5 ޓަރޝަރީ ހޮސްޕިޓަލު ތަރައްގީކުރަން ފެށީ އެމްޑީޕީ ސަރުކާރުން. 4 އަތޮޅެއްގައި ޑެންޓަލް އޯޕީީޖީ، 7 އަތޮޅެއްގައި ޑެންޓަލް ޚިދުމަތް، 5 އަތޮޅެއްގައި ސީޓީ ސްކޭނ،ް އުތުރާއި ދެކުނުގައި އެމްއާރްއައި، 3 އަތޮޅެއްގައި ޑަޔަލަސިސް، ހުރިހާ ރަށަކަށް ޒަމާނީ އެމްބިއުލާންސް، 20 އަތޮޅަކަށް ޕޯޓަބަލް އެކްސްރޭގެ ޚިދުމަތް މި ނިމިދިޔަ 5 އަހަރުތެރޭ ތައާރަފްކުރެވުނު.އަލިފުށީ ދާއިރާގެ މެމްބަރު މުޙައްމަދު ރަޝީދު ހުސައިން (ބިގޭ)
މެންބަރު ވިދާޅުވީ ބޭސްގަތުމަށް ހިނގާ ޚަރަދު ކުޑަކުރުމަށް ބަލްކް ޕްރޮކިއުމަންޓް ނިޒާމެއް ގާއިމްކޮށް އަގުހެޔޮ އަދި ފެންވަރު ރަނގަޅު ބޭސް ލިބޭނެ އިންތިޒާމްތައް ގާއިމްކުރުމުގެ ސިޔާސަތެއް އެކުލަވާލާފައިވާ ކަމަށް ވިދާޅުވިއިރު، ބަލްކް ޕްރޮކިއުމަންޓާއި ޕޫލް ޕްރޮކިއުމަންޓާ ގުޅޭ އެއްބަސްވުމުގައި ޔޫއެންޑީޕީއާއެކު 2023 ވަނަ އަހަރު އެމްޑީޕީ ސަރުކާރުން ސޮއިކޮށްފައިވާ ކަމަށެވެ. އަދި ބޭހުގެ ފެންވަރު ކަށަވަރުކުރުމަށް ބޭސް ތަހުލީލުކުރުމަށް ބޭނުންވާ ވަސީލަތްތައް ފޯރުކޮށްދީ ހަރުދަނާގޮތެއްގައި ތަހުލީލުކުރެވޭނެ އިންތިޒާމް ހަމަޖެހިގެންދާނެ ކަމަށް ވިދާޅުވިއިރު، ނެޝަނަލް ހެލްތް ލެބޯޓްރީ ގާއިމުކުރުމަށް ޔޫރަޕިއަން އިންވެސްޓްމަންޓް ބޭންކާއިއެކު ސޮއިކުރީ ވެސް އެމްޑީޕީ ސަރުކާރުން ކަމަށް މެންބަރު ވިދާޅުވިއެވެ.
މީގެ އިތުރުން ޑްރޯން ޑެލިވަރީ ނިޒާމުވެސް ތައާރަފްކުރީ އެމްޑީޕީ ސަރުކާރުން ކަމަށް މެންބަރު ވިދާޅުވިއެވެ.
