ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި 1300 އަށްވުރެ ގިނަ މަޝްރޫއު މުޅި ރާއްޖޭގައި ހިނގަމުންދިޔަ ކަމަށާއި މިސަރުކާރުގެ ނާގާބިލް ކަމުން ގިނަ މަޝްރޫއުތައް ހުއްޓުވާފައިވާ ކަމަށް ރިޔާސީ ބަޔާނުގެ ޖަވާބުގައި އެމްޑީޕީން ބުނެފިއެވެ.

ހޯމަ ދުވަހު އޮތް ޖަލްސާއަށް ރިޔާސީ ބަޔާނުގެ ޖަވާބު ހުށަހަޅުއްވައިދެއްވީ އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) އެވެ.

ހޯމަ ދުވަހުގެ ރައްޔިތުން މަޖިލީހުގެ ޖަލްސާގައި ރިޔާސީ ބަޔާނުގެ ޖަވާބުގައި މެންބަރު މުހައްމަދު ރަޝީދު ވިދާޅުވީ ނިމިދިޔަ 5 އަހަރަކީ މި ރާއްޖޭގައި ތަރައްގީގެ މަސައްކަތްތައް މިއިން ޒަމާނަކުވެސް ނުދެކޭ މިންވަރަށް ކުރެވުނު 5 އަހަރު ކަމަށާއި، 1300 އަށްވުރެ ގިނަ މަޝްރޫއު މުޅި ރާއްޖޭގެ ހުރިހާ ރަށެއްގައި ހިނގަމުން ނިންމަމުން ދިޔަ ކަމަށެވެ. ނަމަވެސް މި ސަރުކާރުގެ ނާގާބިލްކަމުން ގިނަ މަޝްރޫއުތައް ވަނީ ހުއްޓާލާފައި ކަމަށް މެންބަރު ވިދާޅުވިއެވެ.

މެންބަރު ވިދާޅުވީ މިދިޔަ ސަރުކާރުން ކުޑަރަށެއް ބޮޑު ރަށެއް ބެލުމެއް ނެތި މަސައްކަތް ކުރަމުންދިޔައީ ޒަމާންތަކެއް ވަންދެން ފޯރުކޮށްދީފައިނުވާ އަސާސީ ޚިދުމަތްތައް ފޯރުކޮށްދިނުމަށް ކަމަށެވެ.