ހަމަލާގައި ސަލާމަތްވީ ތުއްތު ހޫރު އެކަނި، މިއަދު ވެސް ގޮވަމުންދަނީ މަންމައަށް

ނިރުބަވެރި އިސްރާއީލް ސިފައިން ފަލަސްތީނަށް ދެމުންގެންދާ ހަމަލާތަކާއި ގުޅިގެން ކޮންމެ ދުވަހަކު ވެސް ފަލަސްތީނުގެ އެތައް ބަޔަކު ޝަހީދުވެއެވެ. އާއްމު ރައްޔިތުން ދިރިއުޅޭ ގޮތަކަށް އާމާޒުކޮށް ކުއްލިއަކަށް ދެމުންދާ ހަމަލާތަކުގައި އާއިލާތައް އެއްކޮށް ޝަހީދުވެގެންދެއެވެ. ބައެއް ފަހަރު އެއާއިލާއަށް ނިސްބަތްވާ އެކަކު މަދުފަހަރެއްގައި ހަނި ފުރުސަތަކުން ސަލާމަތްވާ ފަހަރު ވެސް އާދެއެވެ. އެގޮތަށް އާއިލާތަކުން ސަލާމަތްވި އެއް ކުއްޖަކީ ހޫރު ނަސީރެވެ.

ގައްޒާގެ ޑެއިރް އަލްބާލާ އަވަށުގައި ދިރިއުޅުމުންދިޔަ އެއާއިލާގެ ގެއަށް އިސްރާއީލު ސިފައިން ހަމަލާދީފައިވަނީ ޖެނުއަރީ މަހުގެ 27 ވަނަ ދުވަހެވެ. ވައްޓާލި ބޮމާއެކު ހޫރުގެ މަންމައާއި ބައްޕަ އަދި އެ އަންހެން ކުއްޖާގެ ތިން ބޭބެ ވަނީ ޝަހީދުވެފައެވެ.

ބޭރުގެ މީޑީއާތަކުގައި ރިޕޯޓުކޮށްފައިވާ ގޮތުގައި ދޮޅު އަހަރުގެ ހޫރު ސަލާމަތްވެފައިވަނީ ހަނިފުރުސަތަކުން މާތްﷲގެ ކުޅަދުންވަންތަކަމުންނެވެ. އެތުއްތު ކުއްޖާ ދުނިޔޭގައި ހުރި ނަމަވެސް އެކުއްޖާއަށް މިއަދު ވަނީ ވަރަށް ބޮޑަށް ބޭސްފަރުވާ ބޭނުންވެފައެވެ.

މިހާރު ވެސް ހޫރަށް ފަރުވާ ދެމުންދާއިރު، ލިބުނު ޒަހަމްތަކާއި ގުޅިގެން އެކުއްޖާގެ ކަނާ އަތް ވަނީ ބުރިކޮށްލާފައެވެ. އަދި ބޮލަށާއި، ފައިގައި ވެސް ވަރަށް ގިނަ ޒަޚަމްތަކެއް ލިބިފައިވާ ކަމަށް ޑޮކްޓަރުން ވިދާޅުވެފައިވެއެވެ. އެކުއްޖާއަށް ނަފްސާނީ ގޮތުން ވެސް ވަރަށް ބޮޑަށް އަސަރުކޮށްފައިވާ ކަމަށެވެ. ޑޮކްޓަރުންނާއި ހަވާލާދީ ފާތިމަތު ބުނެފައިވަނީ ހޫރު އިތުރު އޮޕަރޭޝަންތައް ކުރަން ޖެހޭ ކަމަށެވެ. ނަމަވެސް ގައްޒާއިން މިދަނޑިވަޅު އެކަށީގެންވާ ފަރުވާއަށް ދެވިދާނެ ކަމުގެ ޔަގީންކަން ނެތް ކަމަށެވެ. އަދި ގެއްލިފައިވާ އަތުގެ ބަދަލުގައި ޕްލާސްޓިކް އަތެއް ޖެހޭނެ ކަމަށް ވެސް ޑޮކްޓަރުން ވިދާޅުވެފައިވެއެވެ.

ހޫރު ބަލަމުންދަނީ އޭނާގެ ދައްތަ އެއް ކަމަށްވާ ފާތިމަތު ނަސީރެވެ. އެކުއްޖާ ފެންކަޅިވެ، ސިހިސިހިގެންދާއިރު، ހަމައެކަށް އެޅުވުމަށް ފާތިމަތު އަބަދުވެސް މަސައްކަތް ކުރެއެވެ. ނަމަވެސް ހޫރު އާއްމު ހާލަތަކަށް ދިއުމަށް ދުވަސްނަގާނެ ކަމަށް ޑޮކްޓަރުން ވިދާޅުވެއެވެ.

24 އަހަރުގެ ފާތުމަތު ބުނެފައިވާ ގޮތުގައި ހޫރު މިއަދު ވެސް އެންމެ ބޭނުންވަނީ އޭނާގެ މަންމައާއި ބައްޕައެވެ. އެ ދެމީހުންގެ ޚިދުމަތްތައް އެހެން މީހަކަށް ފޫ ބަައްދައިނުދެވޭނެ ކަމަށް ފާތިމަތު ބުންޏެވެ.

ހޫރު މިއަދު ތަހައްމަލް ކުރަމުން އެދަނީ ބޮޑެތި ވޭންތަކެކެވެ. އެމަންޒަރުތައް ބަލަން އެހެން މީހުންނަށް ވެސް އަސަރުކުރެއެވެ. އެ އުމުރުގައި އަތް ނެތުމުގެ ސަބަބުން ހޫރަށް މިއަދު ވަރަށް ބޮޑަށް ސަމާލުކަން ބޭނުންވެއެވެ. ކުޅޭ އެއްޗެއްގައި ނުހިފޭއިރު، އެކުއްޖާއަކީ ވެސް އެހެން ކުދިންނެކޭ އެއްފަދައިން ކުޅުމުގައި ޝާމިލްވެ އުޅެން ބޭނުންވާ ކުއްޖެކެވެ. މި ޒަހަމްތަކާއި އަނިޔާތައް ވުމުގެ ކުރިން އެކުއްޖާއަކީ އުފާވެރި އާއިލާއެއްގައި ކުޅެ، ދުވެ ހީސަމާސާކޮށް އުޅުނު ހަލަނި މަޖާ ކުއްޖެކެވެ. ނަމަވެސް އިސްރާއީލްގެ ޔަހޫދީން ދިން ލާއިންސާނީ ހަމަލާއެއްގައި އެ ތުއްތު ކުއްޖާގެ މުޅި ދިރިއުޅުން މިވަނީ ހަލާކުވެގެން ގޮސްފައެވެ.