އިޒްރޭލާ ދެކޮޅަށް ނުކުތް ހަނގުރާމަވެރިޔާ، ކުރެހުންތެރިއަކަށް: އަދިވެސް ހުރީ މިނިވަންކަމުގެ ދިފާޢުގައި ސާބިތުވެ!

މިއީ މުޙައްމަދު އައްރޫޤޫގެ ވާހަކައެވެ. ސޫރިޔާގައި ދިރިއުޅުނު ނަމަވެސް، އެ ހަށިގަނޑުގައި ހިނގަނީ ފަލަސްޠީނުގެ ލެޔެވެ. ދުނިޔެ މައްޗަށް އަލިވިލޭ ކޮންމެ ރެއަކާއި ދުވާލެއް އޭނާ ހޭދަކުރަނީ ކުރެހުމުގެ މަސައްކަތުގައެވެ. އެހެން ނޫނީ، އުފަން ފަސްގަނޑުގެ ޚަބަރުދަބަރު އޮޅުންފިލުވުމުގައެވެ.

ޣައްޒާ ކޮންޓްރޯލްކުރާ ޙަމާސް ޖަމާޢަތުން، އޮކްޓޯބަރު 7 ވަނަ ދުވަހު އިޒްރޭލަށް ދިން ކުއްލި ޙަމަލާގެ ރައްދުގައި ކަމަށް ބުނެ، ނިރުބަވެރި އިޒްރޭލުން ގަތުލުއާންމު ހިންގަން ފެށިފަހުން، މަސައްކަތުގައި މުޙައްމަދު ހޭދަކުރާ ވަގުތު ވަނީ އިތުރުވެފައެވެ. އޭނާގެ ކުރެހުންތަކުގެ އަސްލަކަށް ވެފައި އޮންނަނީ، އިޒްރޭލުން ޣައްޒާގައި ހިންގަމުން ގެންދާ ރަޙުމެއް ނެތް ގަތުލުއާންމެވެ. އަދި އޭގެ ކުރިންވެސް ސިލްސިލާ ގޮތެއްގައި އިޒްރޭލުން ދެމުންދާ ނިރުބަވެރި ޙަމަލާތަކެވެ.

މުޙައްމަދުގެ ދަތުރު ފެށުނީ 1970 ވަނަ އަހަރުއެވެ. އެއީ އިޒްރޭލާ ދެކޮޅު ހަނގުރާމަވެރިއެއްގެ ގޮތުގައި، ޕޮޕިއުލަރ ފްރަންޓް ފޮރ ދަ ލިބަރޭޝަން އޮފް ޕަލަސްޓައިން (ޕީއެފްއެލްޕީ)އާ ގުޅުނު ހިސާބެވެ. ނަމަވެސް އިޒްރޭލުގެ ޚުދުމުޚުތާރު ބާރުތަކުން، 1973 ވަނަ އަހަރު މުޙައްމަދު ހައްޔަރުކުރިއެވެ. ޖަލުގައި 13 އަހަރު ހޭދަކުރުމަށްފަހު މުޙައްމަދަށް މިނިވަންކަމުގެ ނޭވާއެއް ލެވުނީ، ޤައިދީން ބަދަލުކުރުމަށް ހިންގި ހަރަކާތެއްގައެވެ. ކުރެހުމަށް އޭނާގެ ހިތުގައި އޮތް ޝައުޤު ދެނެގަނެވުނީ އެ ދުވަސްވަރުއެވެ. އިޒްރޭލާ ދެކޮޅަށް ތެދުވުމުގެ ހަތިޔާރެއްގެ ގޮތުގައި، ކުރެހުމުގެ ފަންނު ބޭނުންކުރަން ފެށި ހިސާބަކީވެސް އެއީއެވެ.

އެހެން ގައުމެއްގައި ދިރިއުޅުނު ނަމަވެސް، އުފަން ފަސްގަނޑުގެ ހަނދާންތައް އެންމެ ހިނދުކޮޅަކަށްވެސް މުޙައްމަދުގެ ޚިޔާލާ ވަކިނުވެއެވެ. ދިރިހުއްޓައި އުފަން ފަސްގަނޑަށް ދެވުމަކީ އޭނާ ދެކެމުންދާ ހުވަފެނެކެވެ. އެ ހުވަފެނުގައި ޙަޤީޤީ ކުލަ ޖެއްސުމަށް މުޙައްމަދު ބޭނުންކުރަނީ އޭނާގެ ހަނދާންތަކެވެ.

މުޙައްމަދުގެ އުފަން ވަޒަނަކީ، ފަލަސްޠީނުގެ ބިންތަކަށް ވެރިވެގަނެގެން އުޅޭ ޔަހޫދީ އިޒްރޭލުންގެ ބާރުގެ ދަށުގައި އޮތް އަޝްޤިލޫނެވެ. މުޙައްމަދަކީ އޭނާގެ އާއިލާގެ މެންބަރުންގެ ތެރެއިން، ފަލަސްޠީނުގެ ބިންތައް ދޫކޮށް އެހެން ސަރަޙައްދަކަށް ހިޖުރަކުރި ހަމައެކަނި މީހާއެވެ.

ޣައްޒާ ކޮންޓްރޯލްކުރާ ޙަމާސް ޖަމާޢަތް ނައްތާލާނެ ކަމަށް ބުނެ އިޒްރޭލުން 4 މަސް ކުރިން ހިންގަން ފެށި ގަތުލުއާންމާއެކު މުޙައްމަދުގެ އާއިލާ ވަނީ ރަފަޙަށް ބަދަލުވެފައެވެ. ގެދޮރު ގެއްލިފައިވާ ރެފިއުޖީންގެ ގޮތުގައެވެ. މުޙައްމަދުގެ މިހާރުގެ ހުރިހާވެސް އުންމީދަކީ، އޭނާގެ އާއިލާގެ މެންބަރުން ހެޔޮ ހާލުގައި ތިބުމެވެ.

އޭނާގެ ކުރެހުންތަކުން ސިފަކޮށްދެނީ މިނިވަންކަމާއި އިންސާފު ހޯދުމަށް ފަލަސްޠީނުން އުފުލަމުންދާ ތަކުލީފުތަކެވެ. ކުރަމުންދާ ބުރަ މަސައްކަތެވެ. މުޙައްމަދު ވަނީ ސޫރިޔާގެ ވެރިރަށް ދިމިޝްޤުގައި ކުރިއަށް ގެންދިޔަ މައުރަޒެއްގައި ބައިވެރިވެފައެވެ. އަދި މިއަދު އޭނާއަކީ ފަލަސްޠީނުގެ ސަގާފީ ހެދުމާއި ހަނދާނީ ހަދިޔާތައް ވިއްކާ ފިހާރައެއްވެސް ސޫރިޔާގައި ހިންގާ މީހެކެވެ.

2.3 މިލިއަން މީހުންގެ ޢާބާދީއެއް އޮތް ޣައްޒާއަށް އަމާޒުކޮށް، އެއެއް މިއެއް ބެލުމެއް ނެތި އިޒްރޭލުން ދެމުން ޙަމަލާތަކުގައި މަރުވި ފަލަސްޠީނު މީހުންގެ ޢަދަދު މިހާރު ވަނީ 28000ށް އަރާފައެވެ. އެއީ ކޮން ބައެއްކަން ދެނެގަނެވިފައިވާ މީހުންގެ އަދަދެވެ. އެއްގަމާއި ވައިގެ މަގުން ދޭ ޙަމަލާތަކުގައި ބިމާހަމަކޮށްލާފައިވާ ޢިމާރާތްތަކުގެ ދަށުގައި އަދިވެސް އެތައް ހާސް ބައެއްގެ ހަށިގަނޑު ވާނެކަމަށް، ޣައްޒާގެ ކަމާބެހޭ ފަރާތްތަކުން ބުނެއެވެ.