ގަލޮޅު ދަނޑުގައި ހިންގި މާރާމާރީ ގައި ހައްޔަރުކުރި މީހުންގެ އަދަދު 10ށް
މިމާރާމާރީ ހިންގީ މިދިޔަ ހަފްތާގައި
ވިކްޓަރީ އާއި ކުޑަހެންވޭރު ކުޅުނު މެޗުގެ ތެރެއިން
މިދިޔަ ހަފްތާގައި ގަލޮޅު ދަނޑުގައި ކުޅުނު ފުޓްބޯޅަ މެޗެއްގެ ތެރެއިން ހިންގި މާރާމާރީއާ ގުޅިގެން މިހާތަނަށް 10 މީހުން ހައްޔަރުކޮށްފައިވާކަމަށް ފުލުހުން ބުނެއެވެ.
އެ މާރާމާރީ ހިންގީ ދެވަނަ ޑިވިޝަން ފުޓްބޯޅަ މުބާރާތުގައި ކުޑަހެންވޭރާއި ވިކްޓަރީ ކުޅުނު މެޗުގައެވެ.
މިމާރާމާރީ އާ ގުޅޭގޮތުން ފުލުހުން ބުނީ އެ މެޗުގެ ކުޅުން ކުރިއަށް ދަނިކޮށް ބަޔަކު މީހުން ދަނޑުމައްޗަށް އަރައި ހަމަނުޖެހުން ހިންގައި ވިކްޓްރީ ސްޕޯޓްސް ކްލަބުގެ ކުޅުންތެރިންނާއި އޮފިޝަލުންނާމެދު މާރާމާރީ ހިންގި މައްސަލާގައި މިހާތަނަށް ޖުމްލަ 10 މީހަކު ހައްޔަރު ކޮށްފައިވާ ކަމަށެވެ. އެ މައްސަލަ ފުލުހުން އަންނަނީ ތަހުގީގު ކުރަމުންނެވެ.
އެ ދުވަހުގެ މެޗުގައި ހިންގި ހަމަނުޖެހުމުގައި ވަނީ ވިކްޓަރީގެ ކޯޗު ސޮބާހް މުހައްމަދު އިބްރާހިމަށް ވެސް ހަމަލާ ދީފައެވެ. މިހަމަނުޖެހުމުގެ ވީޑިއޯ ސޯޝަލް މީޑިޔާގައި ވަނީ ވަރަށް ބޮޑަށް ވައިރަލްވެފައެވެ.
