ދިވެހި މަސްބޯޓުތަކަކަށް ބޭރުގެ ސިފައިން އެރި މައްސަލައާ ގުޅިގެން ސަރުކާރުން ފުރިހަމަ މައުލޫމާތު ހާމަކުރަންޖެހޭ: މެންބަރު ފަލާހު
ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށްދޭންޖެހޭ
ބޭރުގެ ސިފައިން ދިވެހި މަސްބޯޓަކަށް އަރާ
ދިވެހިރާއްޖޭގެ ޚާއްސަ އިގްތިޞާދީ ސަރަހައްދުގައި މަސްވެރިކަން ކުރަމުންދިޔަ ދިވެހި މަސްބޯޓުތަކަކަށް ބޭރުގެ ސިފައިން އެރި މައްސަލައާ ގުޅިގެން ސަރުކާރުން ފުރިހަމަ މައުލޫމާތު ރައްޔިތުންނަށް ހާމަކުރަންޖެހޭ ކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ އެމްޑީޕީ މެންބަރު މުހައްމަދު ފަލާހު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ފަލާހު ވިދާޅުވީ ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށްދޭންޖެހޭ ކަމަށެވެ. ކަށަވަރު ނުކޮށްދެވޭނެ ކަމަށްވާނަމަ އެއީ ރައްޔިތުންނަށް އަޅާނުލުމުގެ އެއް ހެކި ކަމަށް ފަލާހު ވިދާޅުވިއެވެ. މަސްބޯޓުތަކަކަށް ބޭރުގެ ސިފައިން އެރި މައްސަލައަށް އިޝާރާތް ކުރައްވައި ފަލާހު ވިދާޅުވީ މިއަދާ ހަމައަށް ބޯޓުތަކަށް އެރީ ކޮން ގައުމެއްގެ ސިފައިންކަން ރަސްމީކޮށް ދިވެހި ސަރުކާރުން ހާމަކޮށްފައިނުވާ ކަމަށެވެ. ނަމަވެސް އެއީ ކޮންގައުމެއްގެ ސިފައިން ކަމާއި، އެބޯޓުތަކަށް އެރީ ކޮން މަގުސަދެއްގައިކަން ސަރުކާރުން ރައްޔިތުންނަށް ސާފުކޮށްދޭން ޖެހޭ ކަމަށް ފަލާހު ވިދާޅުވިއެވެ.
ފަލާހު ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިއްވެވި ރިޔާސީ ބަޔާނުގައި ވެސް މިމައްސަލައަށް އަލިއަޅުވާލައިފައިނުވާ ކަމަށާއި، މިކަމުން ވެސް މިސަރުކާރުގެ ނާގާބިލްކަން ހާމަވާ ކަމަށެވެ.
މީގެ އިތުރުން ފަލާހު ވިދާޅުވީ މިސަރުކާރަކީ ގައުމިއްޔަތު އިސްކުރުމަށް ގޮވާލާ ސަރުކާރެއް ކަމަށާއި، ނަމަވެސް މިފަދަ ހާލަތްތަކުގައި ގައުމިއްޔަތު ނުފެންނަ ކަމަށެވެ. އަދި މިސަރުކާރުން ދައްކާ ވާހަކައާއި އަމަލު ދިމާނުވާ ކަމަށް އޭނާ ވިދާޅުވިއެވެ.
ފެބްރުއަރީ މަހުގެ ކުރީކޮޅު ދިވެހިރާއްޖޭގެ މަސްވެރިކަންކުރާ ބޯޓުތަކަކަށް ބޭރުގެ ސިފައިންގެ ބަޔަކު އެރި މައްސަލައާ ގުޅިގެން އެމްއެންޑީއެފުން ބުނެފައިވަނީ މަސްބޯޓުތަކަށް އިންޑިޔާ ސިފައިން އެރީ ކަނޑުގެ ގާނޫނާއި ޚިލާފަށް ކަމަށާއި، މިކަމާއި ގައުމީ ދިފާއީ ބާރުން ފިޔަވަޅުތަކެއް އަޅާފައިވާ ކަމަށެވެ. އެގޮތުން އިންޑިއާ ސިފައިން ހިންގި އޮޕަރޭޝަންގެ މައުލޫމާތު ހިއްސާކޮށްދިނުމަށް ވަނީ އެދިފައެވެ.
ރާއްޖޭގެ ކަނޑުގެ ސަރަހައްދުގައި މަސްވެރިކަން ކުރަމުންދިޔަ ބަސް ބޯޓުތަކަކަށް އިންޑިއާގެ ސިފައިން އަރައި މަސްވެރިންނަށް ބިރު ދެއްކި ކަމަށް މަސްވެރިންގެ ޔޫނިއަންއިން ބުނެފައިވެއެވެ.
