ކަޑައެއް ނުޖަހާނެ، އެކަމަކު ބަޖެޓުގައި ނެތަސް ކުރާނެ!

މިހާރު އުފެދިފައި މި އޮތް ސަރުކާރަށް ތިން މަސް ހަމަވާން ކައިރިވެފައިވާއިރު، މިހާތަނަށް ކުރެވުނު ހަރުދަނާ ހަމަ އެންމެ ކަމެއް ވެސް ނެތީ އެވެ. މި ވާހަކަ މި ދަންނަވަނީ، ބައެއް ބޭފުޅުން އަޅުގަނޑު ދެކެ ރުޅި އަންނާނެ ކަން ވެސް އެނގި ހުރެ އެވެ. އެކަމާ ހަމަ ކުޑަ ވެސް ފަރުވާލެއް ނެތެވެ. ސަރުކާރަށް ތިން މަސް ވާން ކައިރިވެފައިވާއިރު، އަތޮޅު ތެރޭގައި އެއްވެސް ކަމެއް ނުހިނގަ އެވެ. ކުރީ ސަރުކާރުގައި ފަށާފައި ހުރި ބައެއް މަޝްރޫއުތައް، ސަރުކާރު ބަދަލުވުމާއެކު ހުއްޓުނު ގޮތަށް އެ އޮތީ ހުއްޓިފަ އެވެ. ބައެއް ކަންކަން މި ސަރުކާރުން ކުރަމުން ގެންދިޔަ ނަމަވެސް، އެއީ ކުރީ ސަރުކާރުގައި ފަށާފައި ހުރި ކަންކަމެވެ.

މިހާރުގެ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒަކީ، ބަހާއި އަމަލާއި އަދި ދައްކަވާ ވާހަކަފުޅުތައް ވެސް ދިމާނުވާކަމުގެ ސާފު ރެކޯޑެއް އޮތް ބޭފުޅެކެވެ. ލައްކަ ހުވަފެނާއި، ލައްކަ އަވާމެންދުރު ރައްޔިތުންނަށް ދައްކަވައިގެން ވެރިކަމަށް ވަޑައިގެން، އަދި މި އުޅެނީ ހަމަ އެއްވެސް ވަރެއް ނުވެގެންނެވެ. އަދި ފެންނަނީ އަމިއްލަ ޕާޓީގެ ކުދިން ކޮޅަށް ވަޒީފާ ދެއްވުމާއި، އަމިއްލަ އާއިލާ ބޭފުޅުންނަށް މަޤާމުތައް ދެއްވުމުގަ އެވެ. ހަރުދަނާ ހަމަ އެންމެ ކަމެއް ވެސް މި ސަރުކާރަށް އަދި ކުރެވިފައެއް ނެތެވެ. ސަރުކާރަށް ތިން މަސް ވެގެންދާއިރު، އަދި ހަމަ ސުމެއްގަ އެވެ.

ރިޔާސީ ކެމްޕެއިންގައި ވެވަޑައިގެންނެވި ވައުދުފުޅާ އެއް ގޮތަށް، ރައީސް މުޢިއްޒު އަތޮޅު ތެރެއަށް ކުރައްވާ ފުރަތަމަ ދަތުރުފުޅުގައި ބުދަ ދުވަހު ވަޑައިގެންނެވީ ތ އަތޮޅު ގުރައިދޫ އަށެވެ. އެއީ ރިޔާސީ އިންތިޚާބުގައި ނިސްބަތުން އެންމެ ގިނަ ވޯޓު ލިބިވަޑައިގަންނަވާ ރަށަކަށް ވަޑައިގަންނަވާނެ ކަމަށް ވެވަޑައިގެންނެވި ވައުދުފުޅުގެ ދަށުންނެވެ. އެއީ ސަރުކާރުގެ ވަރަށް މުހިންމު ވައުދުފުޅެއް ކަމަށް، ސަރުކާރުން ދެކިވަޑައިގަންނަވަނީ ހެއްޔެވެ؟ އާދޭހެވެ! އެހެންވީއިރު، އަތާއި ފައިން ހަން ދަންދެން، މިފަހަރު ވެސް އަތް ޖައްސަވާށެވެ.

ގުރައިދޫއަށް ވަޑައިގެންނެވުމުގެ ކުރިން، ތ އަތޮޅު ދިޔަމިގިލީ ރައްޔިތުންނާ ބައްދަލުކުރައްވާ، ރައީސް މުޢިއްޒު ދެއްކެވި ވާހަކަފުޅަށް އަލިއަޅުވާލުން މުހިންމެވެ. މޮޅު، އިޤްތިޞާދީ މާހިރު، ރައީސް މުޢިއްޒު ވިދާޅުވީ ރާއްޖޭގެ އިޤްތިޞާދީ ޙާލަތައް ނުބައްލަވާ، ކަޑަ ޖައްސަވާ ވެރިޔަކަށް ނުވާނެ ކަމަށެވެ. މާލީ ދަތިކަމުގެ ސަބަބުން، ސަރުކާރުން ރަށްރަށުގައި ހިންގަން ރާވާފައިވާ ތަރައްޤީގެ މަޝްރޫއުތައް ނުފެށިދާނެ ކަމުގެ އިޝާރާތެއް ވެސް ކުރެއްވި އެވެ. އެ ވާހަކަފުޅު ތަކާއެކު، ރައީސްގެ ސަޕޯޓަރުންނަށް ހީވީ، ދެ ޢީދު އެއް ފަހަރާ އައިސްގެން އުޅޭ ހެންނެވެ. އެއްވެސް ކަމެއް އޮޅުވާލެއްވުމެއް ނެތި، ރައްޔިތުންނަށް ކޮންްމެ ކަމެއް ސާފުކޮށް ވިދާޅުވެ ދެއްވާތީޔޯލައެވެ!

ދެން ޖެހިލާނީ ގުރައިދޫގައި ދެއްކެވި ވާހަކަފުޅަށެވެ. އެ ރަށުގައި ވިދާޅުވި މުޅިން އެހެން ރާގެއްގެ ލަވަ އެކެވެ. ގުރައިދޫގަައި ހުންނަވާ ރައީސް ވިދާޅުވީ، ބަޖެޓުގައި ނެތް ނަމަވެސް، އެ ރަށުގައި އެއާޕޯޓު ޤާއިމު ކުރުމުގެ މަސައްކަތް މިއަހަރު ފައްޓަވާނެ ކަަމަށެވެ. ރައީސް ވިދާޅުވީ، ބަޖެޓުގައި ނެތް ކަންކަންް ކުރެވޭނެ ކަން މި ސަރުކާރުން މީގެ ކުރިން ވެސް ސާބިތު ކޮށްދީފައިވާނެ ކަމަށެވެ.

ދެން ވެސް މި ދަނޑިވަޅުގައި އެއްޗެއް ބުނެލާނަމެވެ. މިކަމުގައި ވެސް ގޯސް ވާނީ އަޅުގަނޑުކަން އެނގި ހުރެ އެވެ. އެކަމަކު ވެސް، އެއްވެސް ފަރުވާލެއް ނެތެވެ. އަތޮޅުތެރޭގެ ދަތުރުފުޅުތައް ފެއްޓެވީ ވަރަށް އެހެން ކަހަލަ ވަގުތެއްގަ އެވެ. ސަރުކާރުން ގިނަ ގޯސްތަކެއް ހަދައިފައި ވަނިކޮށެވެ. މި ސަރުކާރު ގެންނަން މަސައްކަތް ކުރި ގިނަ ރައްޔިތުން ވެސް "އަލިފާން" ރުޅި ސަރުކާރު ދެކެ އައިސްފައިވާ ވަގުތެއްގަ އެވެ. ބޯ މައްޗަށް އޮތީ ރައްޔިތުންގެ މަޖިލީހުގެ އިންތިޚާބެވެ.

ރަށްރަށަށް ވަޑައިގެން ރައީސް އުޅުއްވާއިރު، ސަރުކާރުގެ ބޭބޭފުޅުން ވިދާޅުވަމުން ގެންދަަވަނީ، އެއީ އެއްވެސް ޙާލެއްގައި މަޖިލިސް އިންތިޚާބަށް ކެމްޕެއިން ކުރުމުގެ ދަތުރުފުޅެއް ނޫން ކަމަށެވެ. އެވާހަކަ ޤަބޫލު ކުރާނެ ބަޔަކު ވެސް ތިބެދާނެ އެވެ. އެކަމަކު، ހަމަބުއްދިން ވިސްނައި، ހިނގަމުން މިދާ ކަންކަމަށް ނަޒަރު ހިންގާލާނަމަ، ހަމަ އެންމެ ރައްޔިތަކު ވެސް އެއިން ވާހަކަ އެއް ޤަބޫލު ނުކުރާނެކަން ޔަގީން ކަށަވަރެވެ. ސަބަބު ވެސް ބުނެލަދޭނަމެވެ. ރައީސް ވަޑައިގަންނަވާ ހަމަ ކޮންމެ ރަށެއްގައި ވެސް، ޕޯޑިއަމް ދޮށުގައި ހުއްޓި ވަޑައިގެން، އެންމެ ފުރަތަމަ ވެސް ވިދާޅުވަނީ ސަރުކާރަކަސް، މަޖިލީހުގެ މެޖޯރިޓީ ބޭނުންވާ ވާހަކަފުޅެވެ.

ރައީސް އެކަންޏެއް ވެސް ނޫނެވެ. މި ސަރުކާރުގެ ހުންނެވި ހަމައެކަނި ސީނިއަރ މިނިސްޓަރު، ޢަބްދުއްރަޙީމް ޢަބްދުﷲ (އަދުރޭ) ވެސް ވިދާޅުވީ އެ ވާހަކަ އެވެ. ރަށްރަށުގައި ތަރައްޤީގެ މަޝްރޫއުތައް ހިންގަން ބޭނުންވާ ނަމަ، ސަރުކާރަށް މެޖޯރިޓީ ދޭން ޖެހޭ ވާހަކަ އެވެ. މިކަމުގައި ވެސް އަދުރޭ ބައި ކޮޅަށް ލަނޑެއް ޖައްސަވައިފި އެވެ. މީގެ ކުރިން ވިދާޅުވެފައި ވަނީ، ސަރުކާރަށް މަޖިލީހުގެ މެޖޯރިޓީ ލިބިއްޖެ ނަމަ، އިދިކޮޅަށް ސަރުކާރު ޖަވާބުދާރީ ކުރުމަށް އުނދަގޫވާނެ ކަމަށެވެ.

މިއީ މުޅިން ވެސް މިކަހަލަ ތާކުންތާކު ނުޖެހޭ، ދޯހަޅި ކަންތައްތައް ކުރާ އަދި އެ ކަހަލަ ވާހަކަ ދައްކާ ސަރުކާރެކެވެ. ރައްޔިތުން ވެސް ޤަބޫލު ކުރެ އެވެ. ސަރުކާރާއި، ސަރުކާރެވެ. އިތުރަށް ބުނާނެ އެއްޗެއް ނެތެވެ.