ފްލެޓު ދިނުމަށް ގޮވާލާ ހުށަހެޅި މައްސަލައިގެ ވޯޓުގައި ސަރުކާރުގެ މެންބަރުން ބައިވެރިނުވި
ސަރުކާރުގެ މެންބަރުން ތިއްބެވީ މަޖިލިސް ކުރާ ގޯތިތެރޭގައި
ރައްޔިތުންގެ މަޖިލީހުގެ ޖަލްސާގެ ތެރެއިން- ފައިލް ފޮޓޯ
ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަހައްދުން ފްލެޓް ލިބޭ ފަރާތްތަކަށް ވީހާވެސް އަވަހަކަށް ފްލެޓު ދޫކުރުމަށް ގޮވާލައި ހުށަހެޅި މައްސަލާގެ ވޯޓުގައި ބައިވެރިނުވެ ސަރުކާރުގެ މެންބަރުން ޖަލްސާއިން ނުކުމެވަޑައިގެންފިއެވެ.
ބުދަ ދުވަހު ކުރިއަށް ގެންދާ 2024 ވަނަ އަހަރުގެ ފުރަތަމަ ދައުރުގެ 4 ވަނަ ޖަލްސާއަށް ރައްޔިތުން މަޖިލީހުގެ ގަވާއިދުގެ 179 ވަނަ މާއްދާގެ ދަށުން ގަލޮޅު އުތުރު ދާއިރާގެ މެންބަރު އީވާ އަބްދުﷲ ވަނީ މައްސަލަ ހުށަހަޅުއްވާފައެވެ.
މިމައްސަލައަށް ބަހުސް ކުރުމަށް ފެންނަ ކަމަށް ވޯޓަށް އެހުމުން ވޯޓު ދެއްވީ ޖަލްސާގައި ބައިވެރިވެވަޑައިގެންނެވި 24 މެންބަރުންނެވެ.
މައުލޫމާތު ލިބޭގޮތުގައި ސަރުކާރުގެ މެންބަރުން ތިއްބެވީ މަޖިލިސް ކުރާ ގޯތިތެރޭގައެވެ.
މެންބަރު އިވާ ހުށަހެޅުއްވި މިމައްސަލާގައި ބުނެފައިވަނީ ބޯހިޔާވަހިކަމުގެ މައްސަލައަކީ އަދިވެސް ހައްލުނުވެ އޮތް މުހިންމު މައްސަލައެއް ކަމަށްވީއިރު، ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަހައްދުން ފްލެޓު ދޫކުރުމަށް ހިންގާ ގެދޮރުވެރިޔާ ސްކީމްގެ ދަށުން 4000 ފަރާތަށް ފްލެޓް ލިބިފައިވާ ކަމަށް އާއްމުކުރި ދާއިމީ ލިސްޓް ނެރުން ވެގެންދިޔައީ އެތައް ހާސް އާއިލާއަކަށް ރީތި ސާދާ ދިރިއުޅުމެއް އުޅެވޭނެކަމުގެ ފޮނި އުންމީދަކަށެވެ. ނަމަވެސް އެކި ސަބަބުތަކާއި ހުރެ ފްލެޓްތައް ދޫކުރުމުގެ މަސައްކަތް ލަސްވެގެން ދިއުމުގެ ސަބަބުން ފްލެޓްތަކުގެ ހައްގުވެރިންނަށް އެކަމުގެ ސަބަބުން ގެއްލުން ލިބޭ ކަމަށެވެ. ފްލެޓްގައި ދިރިއުޅެވެންދެން ކުލީގެ ގޮތުގައި ލިބޭ އާމްދަނީގެ ބޮޑުބައެއް ދިރިއުޅެވޭނެ ތަނަކަށް ހަރަދުކުރަންޖެހޭ ފަރާތްތައް ގިނަ ކަމަށެވެ. ހަމައެހެންމެ އާއިލާގެ މެންބަރުންނާއެކު ކުދިކުދި ތަންތަންކޮޅުގައި ދިރިއުޅެންޖެހިފައިވާ އެކަތަކެއް އާއިލާއެއް ލިބި ކަމަށް ބުނެފައިވެއެވެ.
މީގެ އިތުރުން ބުނެފައިވަނީ މިމައްސަލާގައި ފްލެޓްތައް ދީފައިވާ ގޮތާމެދު ގިނަ ޝަކުވާތަކެއް ހުށަހެޅި އެންޓި ކޮރަޕްޝަން ކޮމިޝަނުން އެކަމުގެ ތަހުގީގެއް ހިންގާފައިވާއިރު، ފްލެޓް ލިބުމުގެ ޝަރުތު ހަމަވާ އެއްވެސް މައްސަލަ ނެތް ފްލެޓްތަކުގެ ހައްގުވެރިންނަށް އިތުރު ލަސްކުރުމަކާ ނުލައި ފްލެޓްތައް ދޫކުރުމަށާއި، ދަތި ހާލުގައި އާއިލާ ބިނާކުރަމުންދާ ފަރާތްތަކުގެ ތަކުލީފުތަކަށް ހައްލެއް ހޯދައިދިނުމަށް މިއީ އެންމެ މުހިންމު ކަމެއްގެ ގޮތުގައި ދެކެންޖެހޭ ކަމަށެވެ. އަދި ވީ އެންމެ އަވަހަކަށް މިމަސައްކަތް ކުރިއަށް ގެންދެވުމަށް ވަނީ ގޮވާލާފައެވެ.
