އިޓާލިއަން ލީގުގަައި ޔުވެންޓަސްއާ ދެކޮޅަށް ކުޅުނު މެޗުން، އިންޓަ މިލާނަށް އުނދަގޫ މޮޅެއް ލިބިއްޖެ އެވެ.

އިންޓަ މިލާންގެ އަމިއްލަ ދަނޑުގައި އާދިއްތަ ދުވަހުގެ ރޭ ކުޅުނު މެޗުން އެ ޓީމު މޮޅުވީ، 1-0 އިންނެވެ. މި ސީޒަންގެ ލީގުގައި އެންމެ ރަނގަޅު ނަތީޖާއެއް ނެރެމުން އަންނަ އެއް ޓީމަކީ ވެސް އިންޓަ މިލާން އެވެ. އަނެއްކޮޅުން، ޔުވެންޓަސް ވެސް އަންނަނީ މި ސީޒަންގައި ރަނގަޅު ނަތީޖާއެއް ނެރެ، ލީގަށް ވާދަކުރަމުންނެވެ.

ޔުވެންޓަސްއާ ދެކޮޅަށް ކުޅުނު މެޗުން އިންޓަ މިލާން މޮޅުވީ، ޔުވެންޓަސްގެ ބައި ކޮޅަށް ވަތް ލަނޑަކުންނެވެ. އެއީ ފުރަތަމަ ހާފުގެ 37 ވަނަ މިނެޓުގައި ޔުވެންޓަސްގެ ޑިފެންޑަރު ފެޑެރިކޯ ގަޓީ އަތުން ބައި ކޮޅަށް ވަތް ލަނޑެކެވެ. އޭނާ އަތުން ބައި ކޮޅަށް ލަނޑެއް ވަނީ، އިންޓަގެ ހަމަލާއެއް ދިފާއު ކުރަން އުޅުމުގެ ތެރޭގަ އެވެ. އޭގެ ފަހުން ޔުވެންޓަސް އަށް ވަނީ ނަތީޖާ ހަމަހަމަ ކުރާނެ ފުރުސަތު ވެސް ލިބިފަ އެވެ.

މޮޅާއެކު އިންޓަ އެއް ވަނައިގައި އޮތީ 22 މެޗުން 57 ޕޮޮއިންޓު ހޯދައިގެންނެވެ. އިންޓަ އަށް އަށް ވުރެ އެއް މެޗު އިތުރަށް ކުޅެގެން ދެ ވަނައިގައި ޔުވެންޓަސް އަށް ލިބެނީ 53 ޕޮއިންޓެވެ.