ޖަރުމަނު ލީގުގައި ބޮރޫޝިއާ މުންޗެންގްލަޑްބެކާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބަޔާން މިއުނިކުން އެއް ވަނައިގައި އޮތް ބަޔާ ލެވަކޫސަނާ ފަރަގު ކުޑަ ކޮށްފި އެވެ.

ބަޔާންގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު ބަޔާނުން ކާމިޔާބު ކުރީ 3-1 އިންނެވެ. މި ސީޒަންގެ ލީގުގައި ބަޔާންގެ ނަތީޖާތައް ދަށްވެ، އެ ޓީމު ވަނީ ލީގު ރޭހުގައި ފަހަތަށް ސޮއްސާލައިފަ އެވެ. ނަމަވެސް މޮޅާއެކު ބަޔާނުން ވަނީ ދެ ޕޮއިންޓަށް ފަރަގު ކުޑަ ކޮށްފަ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެސް މުންޗެންގްލަޑްބެކް އިންނެވެ. މެޗުގެ 35 ވަނަ މިނެޓުގައި އެ ޓީމަށް ލީޑު ނަގައިދިނީ ނިކޯ އެލްވެޑީ އެވެ. ނަމަވެސް ފުރަތަމަ ހާފުގެ ފަހު ވަގުތުގައި އެލެކްސެންޑާ ޕަލޮވިޗް ވަނީ ލަނޑު ޖަހައި، ބަޔާނަށް ނަތީޖާ ހަމަހަމަ ކޮށްދީފަ އެވެ. އޭނާ އެ ލަނޑު ޖެހީ ތޯމަސް މުލާ ތަނަވަސްކޮށްދިން ފުރުސަތެއްގަ އެވެ. ދެ ވަނަ ހާފުގައި ބަޔާނަށް ލީޑު ނަގައިދިނީ އިންގްލެންޑުގެ ކެޕްޓަން ހެރީ ކޭން އެވެ. އޭނާ ލަނޑު ޖެހީ މެޗުގެ 70 ވަނަ މިނެޓުގަ އެވެ. މެޗުގައި ބަޔާންގެ ތިން ވަނަ ލަނޑު 86 ވަނަ މިނެޓުގައި ޖެހީ ޑިފެންޑަރު މަތައިސް ޑި ލިޓް އެވެ. އެއީ ލެރޯއީ ސާނޭ ތަނަވަސްކޮށްދިން ފުރުސަތެއްގަ އެވެ.

މޮޅާއެކު ބަޔާން ދެ ވަނައިގައި އޮތީ މިހާާތަނަށް ކުޅުނު 20 މެޗުން 50 ޕޮއިންޓު ހޯދައިގެންނެވެ. ހަމަ އެ އަަދަދަށް މެޗު ކުޅެގެން އެއް ވަނައިގައި ލެވަކޫސަން އަށް ލިބެނީ 52 ޕޮއިންޓެވެ.