ރިޔާސީ އިންތިޚާބުގެ ކެމްޕެއިންގެ ތެރޭގައި މިހާރުގެ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވެވަޑައިގެންނެވި އެއް ވައުދުފުޅަކީ، ބޭރުގައި ކިޔަވަން ތިބޭ ކުދިންނަށް ބީއެމްއެލް އިން ނެގޭ ޑޮލަރުގެ ލިމިޓު އުވާލައްވާނެ ކަމަށެވެ. އެ ވައުދުފުޅު ފުރިހަމަ ކުރައްވާނެ ކަމަށް ވިދާޅުވީ ތިން މަސް ދުވަހުގެ ތެރޭގައެވެ. އެހެން ނަމަވެސް، އާންމު އުސޫލަކުން ވެސް ކުރައްވާ ގިނަ ކަންކަމުގައި "އަތަށް ގޮވާ" މި ސަރުކާރުގެ އަތަށް، މިފަހަރު ވެސް ހެޔޮ ވަރުގެ ގޮވުމެއް ގޮވައިފި އެވެ.

ރައީސް މަނިކުފާނުގެ ވައުދުފުޅަކީ ޑޮލަރު ނެގޭ އަދަދު ނުވަތަ ލިމިޓު އެއްކޮށް އުވާލަން ކަމަށްވީ ނަމަވެސް، މިދިޔަ ޑިސެމްބަރު މަހުގެ 24 ވަނަ ދުވަހު އޮތް ވަޒީރުންގެ މަޖިލީހުގައި ނިންމެވީ އެ އަދަދު 1200 ޑޮލަރަށް މަތި ކުރުމަށެވެ. އަދި މި ފެށުނު ފެބްރުވަރީ މަހުގެ އެއް ވަނަ ދުވަހުން ފެށިގެން، ބޭރުގައި ކިޔަވަން ތިބޭ ކުދިންނަށް ބީއެމްއެލް އިން 1200 ޑޮލަރާ ހަމައަށް ނެގޭނެ ކަމަށް ސަރުކާރުގެ ފަރާތުން އިއުލާން ކުރެއްވި އެވެ.

ނަމަވެސް، ރަައީސް މުޢިއްޒުގެ ވައުދުފުޅާ އެއް ގޮތަށް، ލިމިޓު އެއްކޮށް އުވާ ނުލީ ކީއްވެތޯ ނޫސްވެރިން ސުވާލު ކުރުމުން ރަައީސް އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުﷲ ނާޡިމް އިބްރާހީމް ވިދާޅުވެފައި ވަނީ، ރާއްޖޭގެ އިޤްތިސާދާއި އެހެނިހެން ކަންކަމަށް ރިއާޔަތް ކުރެއްވުމަށްފަހު، ކެބިނެޓުން ނިންމެވީ މަރުހަލާތަކަށް ބަހާލައިގެން އެކަން ކުރިއަށް ގެންދިޔުމަށް ކަމަށެވެ. ނާޡިމް އިތުރަށް ވިދާޅުވީ، ދިވެހިރާއްޖޭގެ އިޤްތިސާދު ރަނގަޅުވެ، ޑޮލަރު ލިބުމުގެ ޙާލަތު ރަނގަޅުވުމުން އެކަމަށް ޙައްލެއް ގެނެވޭނެ ކަމަށެވެ. އެހެންކަމުން ބޭރުގައި ކިޔަވަން ތިބި ކުދިންނާއި އެ ކުދިންގެ މައިންބަފަައިން ތިބީ ފެބްރުވަރީ އެކެއްގެ އިންތިޒާރުގަ އެވެ. ވެވަޑައިގެންނެވި ވައުދު ދެ ފަޅިވެ، ބަދަލުވި ނަމަވެސް، އެކަމާ ވެސް އަތްޖެހި ބަޔަކު، އަތުން ހަން ދާ ވަރަށް އަތްޖެހި އެވެ.

އެހެން ނަމަވެސް، ޖަނަވަރީ މަސް ނިމެން ދަނިކޮށް، ޚަބަރުތައް ލިބެން ފެށީ ބެންކަށް އެކަން ކޮށްދެވެން ނެތް ވާހަކަ އެވެ. އެއާއެކު އާންމުންގެ ޝަކުވާތައް އިންތިހާ އަށް ބޮޑުވާން ފެށުމުން، ބުދަ ދުވަހު މިނިސްޓްރީ އޮފް ފިނޭންސް އިން ވަނީ ބަޔާނެއް ނެރެފަ އެވެ. އެ ބަޔާނުގައި ފިނޭންސް އިން ބުނެފައި ވަނީ، ފެބްރުވަރީ މަހުގެ އެއް ވަނަ ދުވަހުން ފެށިގެން ޑޮލަރުގެ ލިމެޓު 1200 އަށް ބޮޑު ކުރަން ނިންމާފައި އޮތް ނަމަވެސް، ޑޮލަރުގެ ތާށިކަމާ ހުރެ، އެކަން ތަންފީޒު ކުރެވެން ނެތް ކަމަށެވެ. އަދި އެ ބަޔާނުގައި ބުނެފައި ވަނީ އެ ސިޔާސުތައް ތަންފީޒު ކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)، މިނިސްޓްރީ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓާއެކު މަޝްވަރާ ކުރަމުން އަންނަ ކަމަށެވެ.

ފިނޭންސްގެ ބަޔާނުގައި ދެން ބުނެފައި ވަނީ ކާޑު ލިމިޓު އިތުރު ކުރުމުގެ މަސައްކަތުގެ ތެރެއިން، ރާއްޖެ އިން ބޭރުގައި ކިޔަވާ ކުދިންގެ ދަފްތަރެއް އެކުލަވާލުމުގެ މަސައްކަތް ވެސް ކުރަމުންދާ ކަމަށެވެ. މީގެ އިތުރުން ރާއްޖޭގެ ރަސްމީ ރިޒާވް އިތުރު ކުރުމާއި، ބޭންކިން ނިޒާމުން މާރުކުރެވޭ ޑޮލަރުގެ މިންވަރު އިތުރު ކުރުމަށްޓަކައި އެ މިނިސްޓްރީ އާއި ބޭންކުތައް އަދި އެމްއެއެމްއޭ ގުޅިގެން މަސައްކަތް ކުރަމުން އަންނަ ކަމަށެވެ. ސަރުކާރުގެ ވައުދާ އެއްގޮތަށް، ޑޮލަރު ނެގޭ ލިމިޓު ބޮޑު ކުރެވޭނެ ތާރީޚެއް އެ ބަޔާނުގައި ނެތެވެ.

މިހާ ހިސާބުން އުފެދޭ ސުވާލަކީ ރައީސްގެ ރިޔާސީ ކެމްޕެއިންގައި އެ ވައުދުފުޅު ވެވަޑައިގެންނެވިއިރު، މި ޙާލަތު ބައްލަވާފައި ނެތީތޯ އެވެ؟ ނުވަތަ އޭގެ ފަހުން ވަޒީރުންގެ މަޖިލީހުގައި އެކަމާ ގުޅޭ މަޝްވަރާތައްކޮށް، ގޮތެއް ނިންމެވިއިރު މި ޙާލަތު ބައްލަވާފައި ނެތީތޯ އެވެ؟ ގައިމު ކެބިނެޓު ބައްދަލުވުމުގައި އެކަމާ ގުޅޭ މަޝްވަރާތައް ކުރިއަށް ގެންދިޔައިރު، ރައީސުލްޖުމްހޫރިއްޔާ ވެސް އިންނަވާނެތާ އެވެ! ސަރުކާރުގެ މާލީ ކަންކަމާ ބެހޭ ވަޒީރާއި، އިޤްތިޞާދީ ވަޒީރު ވެސް އިންނަވާނެތާ އެވެ! އެ ބޭފުޅުން ތިއްބެވި ވަޒީރުންގެ މަޖިލީހެއްގައި މިކަމާ މެދު ސަރުކާރުން މަޝްވަރާކޮށް، ފެބްރުވަރީ އެއް ވަނަ ދުވަހުން ފެށިގެން އެ ލިމިޓު 1200 ޑޮލަރަށް ބޮޑު ކުރަން ނިންމެވިއިރު، ރާއްޖޭގެ އިޤްތިޞާދީ ހާލަތު އެ ބޭފުޅުންނަށް އެނގިވަޑައިނުގެންނެވީތޯ އެވެ؟ ޑޮލަރުގެ ލިމިޓު ބޮޑު ކުރުމުގެ ދަތިތަކެއް ހުރިކަން އެ ދުވަހު ހަނދުމަފުޅު ނެތީތޯ އެވެ؟

ނޫން ނަމަ، އާންމު ގޮތެއްގައި ސަރުކާރުން ވެފައިވާ ވައުދުތަކާ އެއް ގޮތަށް، "ހޮޅި" ވައުދެއް ވެވަޑައިގެންނެވީބާވަ އެވެ؟ ނުވަތަ އިތުރުފުޅެއްގެ މައްޗަށް، އެހެން އިތުރު ފުޅެއް ހެއްދެވީތޯ އެވެ؟ އެހެންވިއްޔާ ރައީސް މަނިކުފާނު ވެސް ވިދާޅުވެފައި އޮތީ ވަރަށް ބޮޑު ތެދުފުޅެކެވެ. ދޮގު މައްޗަށް ދޮގު ހެދީމާ، އެޔަށް ކިޔާނީ ބުހުތާނު ދޮގެވެ!