އިންޑިޔާގެ ފުޓްބޯޅަ މައްސަލަގަނޑެއްގެ ތެރެއަށް: ރައީސް އިސްތިއުފާދޭން ގޮވާލީ ބުޓިޔާ

އިންޑިޔާގެ ފުޓްބޯޅަ އަނެއްކާ ވެސް މައްސަލަ ގަނޑެއްގެ ތެރެއަށް ވެއްޓި، ރައީސް ކަލިޔާން ޗައުބޭ މަގާމުން އިސްތިއުފާ ދިނުމަށް ގޮވާލައިފި އެވެ.

އޭނާގެ އިސްތިއުފާ އަށް ގޮވާލީ، އިންޑިޔާގެ އެފްއޭގެ އެކްސްކޯ މެމްބަރު އަދި ކުރީގެ ގައުމީ ކެޕްޓަން ބައިޗުން ބުޓިޔާ އެވެ. ސާކް ސަރަހައްދުގައި ވެސް އުފެދުނު އެންމެ މޮޅު އެއް ފޯވަޑް ބުޓިޔާ އަކީ މިދިޔަ އަހަރު ބޭއްވި އިންޑިއަން ފުޓްބޯޅަ ފެޑަރޭޝަނުގެ އިންތިހާބުގައި ޗައުބޭއާ ވާދަކުރި ކެންޑިޑޭޓެވެ.

ބުޓިޔާ ބުނީ އިންޑިޔާގެ ފުޓްބޯޅަ ސިޔާސީވެ، ފީފާގެ ސަސްޕެންޝަން ކުރިމަތިވެ، އެތައް މައްސަލަތަކަކަށް ފަހު ފެޑަރޭޝަނުގެ އިންތިހާބު ބާއްވައި އަހަރެއްގެ ތެރޭގައި އަނެއްކާ ވެސް މައްސަލަޖެހި އެއް ބަޔަކު އިސްތިއުފާދީ، މަގާމުން ވަކިކުރުން ފަދަ ކަންތައްތައްވުމަކީ އިންޑިޔާގެ ފުޓްބޯޅަ އަށް ލިބޭ މޮޅެއް ނޫން ކަމަށެވެ.

އިންޑިޔާގެ ފުޓްބޯޅަ ފެޑަރޭޝަނުގައި މައްސަލަ ޖެހުނީ ޖެނެރަލް ސެކްރެޓަރީ ސާޖީ ޕްރަބާކަރަން މަގާމުން ވަކިކުރުމުންނެވެ. ބުޓިޔާ ބުނީ މިއީ އެގްޒެކެޓިވް ކޮމިޓީއަށް އެނގިގެން ކޮށްފައިވާ ކަމެއްނޫން ކަމަށެވެ. އަދި މިކަން ކުރީ އިމަޖެންސީ ކޮމިޓީން ކަމަށް ޗައުބޭ ވިދާޅުވި ނަމަވެސް އިންޑިޔާގެ ފުޓްބޯޅަ ފެޑަރޭޝަނުގެ ގަވާއިދުގައި އެގްޒެކެޓިވް ކޮމިޓީގެ މެމްބަރުންގެ ތެރެއިން އިމަޖެންސީ ކޮމިޓީ އެކުލަވާލުވުމުގެ ބާރު އޮތީ ހަމައެކަނި އެގްޒެކެޓިވް ކޮމިޓީއަށް ކަމަށެވެ.

ޕްރަބާކަރަން މަގާމުން ވަކިކުރީ އެގްޒެކެޓިވް ކޮމިޓީގެ ހުއްދަ ނުހޯދައި އަމިއްލަ އަމިއްލަ އަށް ނިންމުންތަކެއް ނިންމާފައިވާ ކަމަށް ތުހުމަތުކޮށެވެ. ތުހުމަތު ކުރެވެނީ ފައިސާގެ މައްސަލަތަކަކަށެވެ. ނަމަވެސް މިކަމުގައި ބުޓިޔާގެ ހިޔާލު ތަފާތެވެ.

އޭނާ އަދި ބުނީ އިންޑިޔާގެ ފުޓްބޯޅަ ފެޑަރޭޝަނަށް ލިބޭ ފައިސާ ނަހަމަ ގޮތުގައި ބޭނުންކޮށްފައިވާ ކަމަށް ބެލެވޭއިރު ފަރުވާކުޑަވުމުން ހެދުނު ގޯސްތަކެއް ފެންނަންހުރި ކަމަށެވެ. މި ގޮތުން އޭނާ ފާހަގަ ކުރީ ގައުމީ ޓީމުގެ އިންތިޒާމްތައް ދަށްވުމެވެ.

އޭނާ ބުނީ ޕްރަބާކަރަން އޭނާއާ ވާހަކަ ދެއްކި ކަމަށާއި އިތުބާރު ނެތީ ކީއްވެތޯ ބަލަން އޭނާ އެގްޒެކެޓިވް ކޮމިޓީއާ ސުވާލު ކުރިމަތިކޮށްފައިވާ ކަމަށެވެ. އަދި ހަޑިކޮށް ކަންތައްތައް ނުކޮށް އިސްތިއުފާދިނުމަށް އެދުނުނަމަ ރީތި ގޮތުގައި އިސްތިއުފާދޭން ވެސް ޕްރަބާކަރަން ހުރީ ނިންމައިގެން ކަމަށް ބުނެފައިވާ ކަމަށެވެ.