ރާއްޖޭގެ 3 ސަރަހައްދެއްގައި ރިހެބިލިޓޭޝަން ފަރުވާދޭ މަރުކަޒު ގާއިމުކުރަނީ
29 ޖެނުއަރީ 2024 | ހޯމަ 17:18މި ޕްރޮގްރާމް ހިންގާ ސަރަހައްދުތަކަކީ ލ އަތޮޅާއި ކ. ކާށިދުއާއި ނ. ވެލިދޫ
ރިހެބިލިޓޭޝަން ފަރުވާދޭ ސެންޓަރު ގާއިމުކުރުމާގުޅޭ މަޝްވަރާތަކުގެ ތެރެއިން
ދިވެހިރާއްޖޭގެ ތިން ސަރަހައްދެއްގައި ރިހެބިލިޓޭޝަން ފަރުވާދޭ ސެންޓަރު ގާއިމުކުރުމަށް، ނޭޝަނަލް ޑްރަގް އެޖެންސީ(އެންޑީއޭ)ން ނިންމައިފިއެވެ.
މަސްތުވާތަކެތި ބޭނުންކުރާ މީހުންނަށް ފަރުވާދިނުމަށް އެންޑީއޭއިން ވަނީ މަސްތުވާތަކެތީގެ ގާނޫނުގައި ބަޔާންކުރާފަދަ ފަރުވާދޭ މަރުކަޒުތައް ރާއްޖެއާއި ރާއްޖޭން ބޭރުގައިވެސް އަމިއްލަ ފަރާތްތައް މެދުވެރިކޮށް ގާއިމުކޮށް، ހިންގުމާ ގުޅޭގޮތުން މަޝްވަރާކޮށްފައެވެ.
މަސްތުވާތަކެތީގެ ބޭނުންކުރާ ފަރާތްތައް ރިހެބިލިޓޭޓް ކުރުމުގައި އެ ފަރާތްތަކަށް ކޮމިއުނިޓީ ބޭސްޑް ރިހެބިލިޓޭޝަން ޕްރޮގްރާމެއް ކުރިއަށް ގެންދިއުމަށް ވަޒީރުންގެ މަޖިލީހުން އޮތީ ކުރިން ލަފާ ދެއްވާފައެވެ. މި ޕްރޮގްރާމް ހިންގާ ސަރަހައްދުތަކަކީ ލ އަތޮޅާއި ކ. ކާށިދުއާއި ނ. ވެލިދުއެވެ.
ލ އަތޮޅުގައި މި ޕްރޮގްރާމް ހިންގާނޭ ރަށެއް ކަނޑައެޅުމުގެ ގޮތުން، އަތޮޅުގައި މަސްތުވާތަކެތީގެ ހާލަތު އޮތްގޮތް ދެނެގަތުމަށް އެންޑީއޭން ވަނީ މި މަހުގެ 24ން 28ށް ލ އަތޮޅުގެ 11 ރަށަކަށް ދަތުރުކޮށް، މަސައްކަތް ފަށާފައެވެ. މިދަތުރުގައި ލ. ފޮނަދޫ، ގަން، މާވަށް، އިސްދޫ، ކަލައިދޫ، ހިތަދޫ، މުންޑޫ، ކުނަހަންދޫ، ގާދޫ އަދި މާބައިދޫއަށް ޒިޔާރަތްކޮށް އެ ރަށްރަށުގެ ކައުންސިލްތަކާވެސް ބައްދަލުކޮށްފައި ވެއެވެ. އެންޑީއޭގެ ޓީމު ލ އަތޮޅުގެ ރަށްތަކަށް ކުރާ ދަތުރަށްފަހު އެ އަތޮޅުގައި މި ޕްރޮގްރާމް ހިންގާނޭ ރަށެއް ކަނޑައަޅާނީ އަތޮޅުގެ ކައުންސިލާ މަޝްވަރާކުރުމަށްފަހު ކަމަށް އެންޑީއޭން ބުނެއެވެ.
މި ދިރާސާ ދަތުރުގައި އެންޑީއޭގެ ސީއީއޯ އިމާދު ސާލިހާއި ހޯމްލޭންޑް ސެކިއުރިޓީގެ ސީނިއާ ޕޮލިޓިކަލް ޑައިރެކްޓަރު އިސްމާއީލް އިބްރާހީމް ބައިވެރިވެވަޑައިގަންނަވައެވެ.
