ފްލެޓްތަކާއި ގުޅިގެން ތަހުގީގުކުރަމުންދާ މައްސަލައިގައި މިހަފްތާތެރޭގައި ގޮތެއް ނިންމާނެ: އޭސީސީ
ތަހުގީގު ކުރިއަށްދާ ގޮތުގެ ޓައިމްލައިން ހާމަކުރުމަށް އޭސީސީން ވަނީ ދެކޮޅު ހަދާފައި
އާއްމުން އޭސީސީ އަށް އެއްވެ ނުރުހުން ފާޅުކުރަނީ
ނިމިިދިޔަ ސަރުކާރުގެ ގެދޮރުވެރިޔާ ސްކީމްގެ ދަށުން ދޫކުރާ ފްލެޓްތަކާއި ގުޅިގެން އެންޓި ކޮރަޕްޝަން ކޮމިޝަން (އޭސީސީ)އިން ތަހުގީގުކުރަމުންދާ މައްސަލައިގައި މި ހަފުތާ ތެރޭގައި ގޮތެއް ނިންމާނެ ކަމަށް އެ ކޮމިޝަނުން ބުނެފިއެވެ.
އާދީއްތަ ދުވަހު އޭސީސީން ބުނީ ގެދޮރުވެރިޔާ ސްކީމްގެ ދަށުން އިއުލާންކުރި 4000 ފްލެޓާ ގުޅިގެން ކޮމިޝަނަށް ހުށަހެޅުނު މައްސަލައިގައި، ފްލެޓާ ގުޅޭ ކަންކަން މަޑުޖައްސައިލުމަށް ކޮމިޝަނުން އެންގި އެންގުމާ މެދު ކޮމިޝަނުން މި ހަފްތާ ތެރޭގައި ގޮތެއް ނިންމާނެ ކަމަށެވެ.
މި ހަފްތާ ތެރޭގައި ގޮތެއް ނިންމާނެ ކަމަށް އޭސީސީން ބުނެފައިވާއިރު، ތަހުގީގު ކުރިއަށްދާ ގޮތުގެ ޓައިމްލައިން ހާމަކުރުމަށް އެ ކޮމިޝަނުން ވަނީ ނިންމާފައެވެ.
ފްލެޓު ދިނުން ލަސްވާތީ މިދިޔަ ހަފްތާ ތެރޭގައި ވެސް ގިނަ އަދަދެއްގެ އާއްމު ރައްޔިތުން ވަނީ އޭސީސީއަށް އެއްވެ، މުޒާހަރާކޮށްފައެވެ. އަދި މި މައްސަލަ ލަސްވާ ކޮންމެ ދުވަހަކީ ގިނަ ބައެއްގެ ހައްގުތައް ގެއްލޭ ދުވަހެއް ކަމަށް މުޒާހަރާގެ ބައިވެރިން ބުނެފައިވެއެވެ.
މި މައްސަލައާ ގުޅިގެން ހައުސިންގ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ މި ސަރުކާރުން ފްލެޓުގެ މަސައްކަތް ހުއްޓުވީ ސިޔާސީ ވެގެން ކަމަަށާއި، ސަރުކާރުގެ ނުފޫޒުން އޭސީސީން ސިޓީއެއް ފޮނުވާ އެ މަސައްކަތް ހުއްޓާލަން އެންގި ކަމަށެވެ. އަދި ގާނޫނާއި އެއްގޮތަށް ބަލާއިރު، އޭސީސިއަކަށް އެކަން ނުވެސް ހުއްޓުވޭނެ ކަމަށާއި އެކަމުގެ އެއް ހެތްކަކީ، ފުލުހުންގެ އިވެންޓެއް ބޭވުމުގައި އެކަން ހުއްޓަން އޭސީސީން އަންގައިގެން، ޕޮލިހުން ޕީޖީއަށް ދިޔުމުން ޕީޖީން އެންގީ އޭސީސީއަަކަށް އެކަން އެގޮތަށް ނުކުރެވޭނެ ކަމަށެވެ. ނަމަވެސް ސަރުކާރު ބަދަލުވާން 1 ދުވަހަށް ވެފައި އޮއްވާ އެކަން ހުއްޓުވުމުން ޕީޖީއަށް ނުދެވުނު ކަމަށާއި، އިތުރު މަސައްކަތެއް ކުރަން ފުރުސަތެއް ނުލިބުނު ކަމަށެވެ.
އަކްރަމް ވިދާޅުވީ ގާނޫނާއި ގަވާއިދާ ހިލާފަށް ފުލެޓުގެ މަސައްކަތް ސަރުކާރުން ހުއްޓުވާފައިވާ ކަމަށެވެ. އެ މައްސަލަ އޭސީސީން ތަހުގީގުކުރެވިދާނެ ކަމަށާއި ނަމަވެސް އޭސީސީއަކަށް އެ މަސައްކަތް ނުހުއްޓުވޭނެކަމަށް އަކްރަމް ވިދާޅުވިއެވެ. އަދި ތަހުގީގުކޮށް، ގޯސްކޮށް ކަންކޮށްފައިވާ ފަރާތަކާއި މެދު ފިޔަވަޅު އެޅިދާނެ ކަމަށާއި ދީފައި ހުރި އެއްޗެއް އަތެއް ނުލެވޭނެ ކަމަށެވެ. އަދި ނުބައި މައުލޫމާތު ދީފައިހުރިކަން އެނގޭނަމަ އެކަން ބެލޭނެ ކަމަށާއި، ނަމަވެސް އޭސީސީއަކަަށް ފުލެޓް ދިނުން ނުހުއްޓުވޭނެ ކަމަށެވެ.
