ކްލޮޕްގެ ނިންމުމުން އުނދަގޫވި، ލިބުނީ ހިތްވަރެއް: ވެންޑައިކް
ކުޅުންތެރިން ކުލަބުގައި ހިފެހެއްޓިފައި ތިބުމުގެ އެއް ސަބަބަކީ އޭނާ: ވެންޑައިކް
ކްލޮޕް އާއި ވެންޑައިކް
ލިވަޕޫލްގެ ކޯޗު ޔާގެން ކްލޮޕް މި ސީޒަނަށް ފަހު ކުލަބު ދޫކޮށްލަން ނިންމުމުން އެކަން ބަލައިގަންނަން ކުޅުންތެރިންނަށް އުނދަގޫވި ކަމަށާއި ނަމަވެސް އެކަމުން އިތުރު ހިތްވަރެއް ލިބުނު ކަމަށް ކެޕްޓަން ވާޖިލް ވެންޑައިކް ބުނެފި އެވެ.
އޭނާ މިހެން ބުނީ ކްލޮޕް މި ސީޒަނަށް ފަހު ލިވަޕޫލާ ވަކިވާނެކަން އިއުލާނުކުރިތާ އެއް ދުވަސް ފަހުންނެވެ.
އޭނާ ބުނީ މި ސީޒަނުގައި ލިވަޕޫލަށް ހަތަރު ތަށި ހޯދެން އޮތުމުން ކުޅުންތެރިންގެ ވިސްނުމަކީ ކްލޮޕްއާއެކު ކާމިޔާބު ހޯދުމަށް އިތުރަށް މަސައްކަތް ކުރުން ކަމަށެވެ. ސަބަބަކީ ކްލޮޕް އަކީ ކާމިޔާބު ހޯދަން އެނގޭ ކުޅުންތެރިންނާ ގުޅޭ، ކުޅުންތެރިން ކުރިއަރުވާ ކޯޗަކަވުން ކަމަށެވެ.
2015 ވަނަ އަހަރު ލިވަޕޫލާ ހަވާލުވި ކްލޮޕް ކޯޗުކަން ދޫކޮށްލަން ކްލޮޕް ނިންމީ އޭނާ ވަރުބަލިވެއްޖެ ކަމަށާއި އަބަދު މަސައްކަތުގައި ނޫޅެވޭނެ ކަމަށް ބުނެފަ އެވެ. އުމުރުން 56 އަހަރުގެ ކޯޗު ބުނީ ދެން އަދާކުރާނެ ވަޒީފާ ބުނަން ނޭނގުނު ނަމަވެސް ކުރިއަށް އޮތް އަހަރު އެއްވެސް ޓީމަކަށް ކޯޗުކޮށްނުދޭނެ ކަމަށެވެ. އަމުދުން ލިވަޕޫލަށް އިހްތިރާމް ކުރުމުގެ ގޮތުން އިނގިރޭސި ޓީމަކަށް ކޯޗުކޮށްނުދޭނެ ކަމަށެވެ.
