އަޑު އިވުމުގެ ހިއްސު އުނިކޮށް އުފަންވި އައިސަމްގެ އެންމެ ޖީންއަކަށް ފަރުވާ ދީގެން، ދިރިއުޅުމަށް ބޮޑު އުފަލެއް!

ފެނުމާއި، އަޑު އިވުމާއި، އިޙްސާސްވުން އަދި ވަސްދުވުމާއި ރަހަލުމުގެ ހިއްސަކީ އަހަރެމެން އިންސާނުންގެ ޢާންމު ދިރިއުޅުމަށް އިންތިހާއަށް ބޭނުން ހިއްސުތަކެކެވެ. ނަމަވެސް އުފެދުމުގައި ހުންނަ އުނިކަމެއްގެ ސަބަބުން ބައެއް މީހުންގެ ހުރިހާ ހިއްސެއް، އޭގެ އެންމެ ފުރިހަމަ ގޮތުގައި ނުހުރެއެވެ. އަނެއް ބައި މީހުންނަކީ އެއްވެސް ވަރަކަށް އެ ހިއްސު ނުވަތަ ހިއްސުތަކެއްގެ ނަޞީބު ލިބިފައި ނުވާ މީހުންނެވެ. ސައެންސްއާއި ޓެކްނޮލޮޖީ އަދި ބޭސްވެރިކަން މަސްހުނިވެ، ހޯދަމުން ދާ ކުރިއެރުންތަކާއެކު، ހިއްސުތަކުގައި އުނިކަން ނުވަތަ އައިބު ހުންނަ މީހުންގެ ދިރިއުޅުމަށް އުޖާލާ ބަދަލުތަކެއް ލިބުމުގެ ފުރުޞަތު އޮވެއެވެ.

ޢުމުރުން 11 އަހަރުގެ އައިސަމް ދާމްއަކީ ވިހޭ އިރުވެސް އަޑު އިވުމުގެ ހިއްސުގައި އުނިކަމެއް ހުރި ކުއްޖެކެވެ. ނަމަވެސް މިއަދު އޭނާއަށް މާޙައުލުގެ އަޑުތައް އަހާލުމުގެ ފުރުޞަތު ވަނީ ލިބިފައެވެ. އެ ތުއްތު ޙަޔާތުގައިވެސް ފުރަތަމަ ފަހަރަށް އެ ފުރުޞަތު ލިބުނީ ދާދި ފަހުން ފައްކާ ކުރަން ފެށި ޖީން ތެރަޕީގެ ފަރުވާގެ އެހީގައެވެ. އައިސަމްގެ އޮޕަރޭޝަން ކުރި ޑޮކްޓަރު ވަނީ، އެ ފަރުވާއަކީ، އަޑު އިވުމުން މަހްރޫމު ވެފައި ވާ މީހުންގެ ފަރުވާގެ މުސްތަޤުބަލަށް އިންތިހާއަށް މުހިންމު ފަރުވާއަކަށް ވުމުގެ ފުރުޞަތު އޮތް ކަމަށް ވިދާޅުވެފައެވެ.

އައިސަމް ސަރޖަރީ ހެދީ މިދިޔަ އޮކްޓޯބަރ މަހުއެވެ. އޭގެ ފަހުން މިހާތަނަށް އައި އިރު، އޭނާގެ އަޑު އިވުމުގެ ހިއްސުގައި އުޅެނީ ކުޑަ ވަރެއްގެ އުނިކަމެއް ޗިލްރަންސް ހޮސްޕިޓަލް އޮފް ފިލަޑެލްފިއާ (ޗޮޕް)ގެ ޑރ ޖޯން ޖަމިލަރ ވަނީ ފާހަގަ ކުރައްވާފައެވެ.

އައިސަމްއަކީ މޮރޮކޯއަށް އުފަންވި ކުއްޖެކެވެ. ނަމަވެސް އޭނާ ދިރިއުޅެމުން ދަނީ ސްޕެއިންގެ ބަރސެލޯނާގައެވެ. އެމެރިކާގެ ފިލަޑެލްފިއާއަށް، އޭނާގެ ޢާއިލާއާ އެކު ބަދަލުވީ މިދިޔަ ސެޕްޓެމްބަރު މަހުގެ ތެރޭގައެވެ. އެއީ އޭނާގެ މުޅި ޙަޔާތް ބަދަލުކޮށްލަނިވި ބޮޑު އޮޕަރޭޝަން ކުރުމަށްޓަކައެވެ.

އައިސަމް އުފަންވީ އޯޓޯފަރލިން ޖީންގައި ހުރި މައްސަލައެއްގެ ސަބަބުން، އަޑު އިވުމުގެ ހިއްސު އުނި ކުއްޖެއްގެ ގޮތުގައެވެ. އައިސަމްއަށް ދެމުން ދަނީ މުޅިން އައު ފަރުވާއެކެވެ. ފަރުވާގެ ތެރެއިން، އައިސަމްގެ ކަންފަތުގެ އެންމެ އެތެރެއަށް، އޯޓޯފޮ ޖީން ފޮނުވައިގެންނެވެ.

އައިސަމްގެ ފަރުވާ ސްޕޮންސަރ ކޮށްފައި ވަނީ އެލި ލިލީގެ ސަބްސިޑަރީ ކުންފުންޏެއް ކަމަށް ވާ އަކޫޒްއިންނެވެ. ޑރ ޖޯން ޖަމިލަރ ހުންނެވީ ކްލިނިކަލް ޓްރަޔަލް މަރުހަލާގައި އޮތް ފަރުވާ ކާމިޔާބު ވާނެ ކަމުގެ ފޮނި އުންމީދުގައެވެ. އަދި ޖީންގެ އުނިކަމެއްގެ ސަބަބުން އަޑު އިވުމުގެ ހިއްސުގައި އުނިކަން ހުންނަ މީހުންނަށް ފަރުވާ ކުރުމުގެ ރޮނގުން ބޮޑު، ކުރިއެރުންތަކެއް ލިބޭނެ ކަމަށް ޑރ ޖޯން ޖަމިލަރ ވިދާޅުވިއެވެ.