ތިބާގެ ކިބައިގައި ނުކުޅެދުންތެރިކަމެއް ހުރުމަކީ އެކަމެއްގެ ސަބަބުން ތިބާގެ ޝަޚްސަށް ކުޑަ ނަމަވެސް އުނިކަމެއް ގެނުވާ ކަމެއް ނޫން ކަން ޤަބޫލު ކުރުމަށް ބައެއް ފަހަރު ފަސްޖެހެވޭ ގޮތްވެއެވެ. އެކަން އެހެން ދިމާވަނީ، ނުކުޅެދުންތެރިކަން ހުންނަ މީހުންނާ މެދު މުޖުތަމަޢުގެ ބައެއް މެންބަރުން ޢަމަލު ކުރާ ގޮތުންނެވެ. ނުވަތަ ނުކުޅެދުންތެރިކަން ހުންނަ މީހުންނާ މެދު މުޖުތަމަޢުތަކުން ދެކޭ ގޮތެއްގެ ސަބަބުންނެވެ. ހަމަ އެފަދައިން، މުޖުތަމަޢުގެ އެއްބާރުލުމާއި އެހީތެރިކަން ލިބޭނަމަ، ނުކުޅެދުންތެރިކަން ހުންނަ މީހުންނަކީވެސް އެމީހުންގެ ފަރާތުން ޤައުމަށް އެތައް ފައިދާއަކާއި މަންފާއެއް ލިއްބައިދޭނެ ބައެއްކަން ސާބިތުކޮށްދެމުން ދާ މީހުންވެސް މަދެއް ނޫނެވެ. އެފަދަ އެކަކީ ޗައިނާއަށް އުފަން، ވެންގް ޓާއޯއެވެ.
ވެންގްއަކީ އަޑުއިވުމުގެ ހިއްސު އުނި މީހެކެވެ. ނަމަވެސް މިއަދު އޭނާއަކީ ޗައިނާގެ ޗޮންޗީންގް މުނިސިޕަލްޓީގައި ކާމިޔާބު ރެސްޓޯރަންޓެއް ހިންގާ ވިޔަފާރިވެރިއެކެވެ. އެ މަސައްކަތުގައި ދަރުމަވެރިންގެ އިތުރުން، އޭނާ ފަދައިން އަޑުއިވުމުގެ ހިއްސު އުނި އެތައް ބައެއްގެ އެހީތެރިކަން ވެންގްއަށް ލިބެއެވެ. ވެންގް ގަދަ އަޅާ މަސައްކަތް ކުރަމުން ދަނީ، އޭނާގެ ފަރާތުން މުޖުތަމަޢަށް ކޮންމެވެސް ކަމެއް ކޮށްދެވޭތޯއެވެ.
ވެންގްގެ ރެސްޓޯރަންޓް ހުންނަނީ ޗޮންގްޗީންގްގައި ކެފޭ އަދި ރެސްޓޯރަންޓް ފަދަ ކެއިންބުއިމުގެ ޚިދުމަތްތައް އެންމެ ގިނަ ޢަދަދަކަށް ހުންނަ ސަރަޙައްދުގައެވެ. ވެންގްގެ ރެސްޓޯރަންޓަކީ ހޮޓްޕޮޓް ރެސްޓޯރަންޓްއެކެވެ. ހޮޓްޕޮޓް ޑިޝްއަކީ، ކާ ސުފުރާ މަތީގައި ހޫނު އުފައްދާ މަސްދަރެއްގެ މަތީގައި ކެކިކެކި ހުންނަ ސޫޕްއަކާއެކު ލިބެން ހުންނަ ކޭމެކެވެ. ހޮޓްޕޮޓް ސޫޕާއެކު ކައިބޮއެ ހެދުމަށް، ޗައިނާގެ ތަފާތު އެކި ބާވަތްބާވަތުގެ އެއްޗެހިވެސް ހޮޓްޕޮޓްއާއެކު ސަރވް ކުރެއެވެ. ޗޮންގްޗީންގްގައި ހިންގާ ހޮޓްޕޮޓް ރެސްޓޯރަންޓްތަކާއި، ވެންގްގެ ރެސްޓޯރަންޓް ތަފާތެވެ. އެ ރެސްޓޯރަންޓަކީ ވަރަށް ހަމަހިމޭން ރެސްޓޯރަންޓެކެވެ. ސަބަބެއް ނެތިއެއް ނޫނެވެ. ވެންގްގެ އިތުރުން، އޭނާގެ ގިނަ ކަސްޓަމަރުންނަކީވެސް އޭނާ ފަދައިން އަޑު އިވުމުގެ ހިއްސު އުނި މީހުންނެވެ.
އަހަންނަށް މިހާރު މި ރެސްޓޯރަންޓަށް އާދެވިއްޖެ އަށެއްކަ ފަހަރު. އެއީ، އަހަރެން ގޮތަށް، އަޑުއިވުމުގައި އުނިކަން ހުންނަ، އަހަރެންގެ އެކުވެރިންނަށް އެއްބާރުލުން ދިނުމުގެ ގޮތުން ކުރާ ކަމެއް. ފުރަތަމަ މިކޮޅަށް އައި އިރު، ރަހަތައް ދެން ހުރީ ވަރަށް ފާޑަކަށް. އެކަމަކު، އަހަރެމެން ދިން ލަފަޔާއި ޚިޔާލުތަކަށް ބަލައިގެން ތައްޔާރުކޮށްލީމަ، މިހާރު ލިބޭ ކެއުންތައް ވަރަށް ރަނގަޅު.ވެންގްގެ ހޮޓްޕޮޓް ރެސްޓޯރަންޓްގެ ކަސްޓަމަރެއް
ވެންގްއަށް ޤަވައިދުން ކަސްޓަމަރުން ލިބެއެވެ. އޭނާގެ ވިޔަފާރިވެސް ދަނީ ދުވަހަކަށް ވުރެ ދުވަހެއް ކުރިއަރަމުންނެވެ. ނަމަވެސް، މި އަހަރުގެ މެއި މަހު، ޙާލަތު މުޅިން ތަފާތެވެ. އެއީ ރެސްޓޯރަންޓް ހުޅުވި ދުވަސްވަރެވެ. އެއީ ވިޔަފާރީގެ ތެރެއަށް ވެންގް އަލަށް ނުކުތް ދުވަސްވަރެވެ. ރެސްޓޯރަންޓަށް ޚާއްޞަ ރަހަތައް ދެނެގަތުމާއި، ކަސްޓަމަރުންގެ ސަމާލުކަން ދަމައިގަތުމުގައި ވެންގްއަށް ގޮންޖެހުންތަކާ ކުރިމަތިވިއެވެ.
ވަރަށް ގިނަ ކަސްޓަމަރުން ހަމަ މިތާ އެނބުރިލާފަ ދާނީ. ނުވެސް ވަންނާނެ އެތެރެއަކަށް. އޭރު، އެދުވަސްވަރު އެންމެ ދަތިވި ކަމަކަށް އޮންނަނީ ތަނުގެ ކުލި ދެއްކުމާއި، މުވައްޒަފުންނަށް މުސާރަ ދިނުން.ވެންގް ޓާއޯ؛ އަޑު އިވުމުގައި ނުކުޅެދުންތެރިކަން ހުންނަ ރެސްޓޯރަންޓް އޯނަރެއް
ވިޔަފާރީގައި ދެމި ހުރުމަށް ވެންގް ހިތުގައި އޮތް ޢަޒުމު ފުނޑުފުނޑު ވިޔަ ނުދީ، އޭނާ ބެލީ ކުރިއަށް ދެވޭތޯއެވެ. އެކި ގޮތް ގޮތުން، އެކި މީސްމީހުން ގާތު އޭނާ އެހީއަށް އެދެމުން ދިޔައެވެ. ވެންގްއަށް ދީލަތި އެހީގެ އަތެއް ދިއްކޮށްލީ ކޭޓަރިންގްގެ ދާއިރާގައި ގިނަ ދުވަސްތަކެއް ވަންދެން ޚިދުމަތް ކޮށްފައިވާ ދަރުމަވެރިއެއް ކަމަށްވާ ލީ ޑެލަންއެވެ.
ލީ އަކީ އަޑު އިވުމުގެ ހިއްސުގައި ނުކުޅެދުންތެރިކަން ހުންނަ އޭނާގެ އެކުވެރިންނަށް ރެސްޓޯރަންޓް ހިންގުމުގައި އަތްގާތް ކޮށްދީ އުޅުނު މީހެކެވެ. އެހެން ކަމުން ލީއަކީ ހަމަ އެކަނި ކޭޓަރިންގް ދާއިރާގެ ތަޖުރިބާކާރެކޭ ބުނެވޭކަށް ނެތެވެ. ލީ އަކީ، އަޑު އިވުމުގެ ހިއްސުގައި އުނިކަން ހުންނަ މީހުން ވާހަކަދައްކާ އުޅުމަށް އާންމުކޮށް ބޭނުން ކުރާ އިޝާރާތުގެ ބަހުރުވަ ނުވަތަ ސައިން ލޭންގުވިޖްއަށްވެސް ފަރިތަ މީހެކެވެ.
ވިޔަފާރީގެ ޙާލަތު އޮތް ގޮތުގެ އެތައް ދިރާސާއަކާއި ތަހުލީލުތަކެއް ހެދުމަށް ފަހު ވެންގްއާއި ލީ ނިންމީ ހޮޓްޕޮޓް ރެސްޓޯރަންޓެއް ހިންގާށެވެ. އަދި އެއީ ހައްޓަށް ލުއި، ޞިއްޙަތަށް ފައިދާ ކުރަނިވި ސޫޕެއް، ރެސްޓޯރަންޓްގެ މައިގަނޑު ޑިޝްގެ ގޮތުގައި ސަރވް ކުރާ ރެސްޓޯރަންޓަކަށް ހެދުމަށް ނިންމިއެވެ.
ގިނަ ކަސްޓަމަރުންނަކީ ދޮށީ ޢުމުރުގެ މީހުން. ހޮޓްޕޮޓް މީލްއަކުން އެމީހުންގެ ބަނޑަށް ވަރަށް އުނދަގޫ ކުރާނެ. އެހެންވެ، އަހަރެމެން ނިންމީ ޞިއްޙަތަށް ފައިދާ ކުރާ ކަހަލަ ސޫޕް ތައްޔާރު ކުރަން. މިސާލަކަށް މަހާއި، ކުކުޅު ސޫޕް ކަހަލަ އުފެއްދުންތަކަށް ޚާއްޞަ ވާން ނިންމީ. މި ސަރަޙައްދުގަ އުޅޭ ދޮށީ ޢުމުރުގެ ވަރަށް ގިނަ މީހުން މިހާރު މިތަނުން ކާން ވަރަށް ގަޔާވާނެ.ލީ ޑެލަން؛ ދަރުމައަށް މަސައްކަތް ކުރާ މީހެއް
ކަސްޓަމަރުންނަށް ކަމުދާނެހެން ވެންގް ހެޔޮކޮށްލި ރަހަތަކާއެކު އޭނާގެ ވިޔަފާރި ހިނގައިގަތީ ފަތުއަޑުކިޔާފައެވެ. ފަހަރަކަށް ވުރެ ފަހަރެއް، އެ ވިޔަފާރި ދިޔައީ މަޤުބޫލު ވަމުންނެވެ. ކަސްޓަމަރުން އިތުރު ވަމުން ދިޔަ ވަރަކަށް، އެ ޑިމާންޑަށް ކޭޓަރ ކުރުމަށްޓަކައި އިތުރު މުވައްޒަފުން ހޯދުމަށްވެސް ވެންގް ނިންމީއެވެ. ރެސްޓޯރަންޓަށް މުވައްޒަފުން ހޮވުމުގައި، އަޑު އިވުމުގެ ހިއްސުގައި އުނިކަން ހުންނަ މީހުންނަށް ވެންގް އިސްކަން ދިނެވެ.
މިތާ މަސައްކަތް ކުރަން އަހަރެން ވަރަށް ހިތްހަމަޖެހޭ. މިތަނުގެ 2 އޯނަރުންނާއި މުވައްޒަފުންނަކީވެސް އަޑު އިވުމުގަ އުނިކަން ހުންނަ މީހުން. އަހަރެމެން އެކަކު އަނެކަކާ ވާހަކަދައްކާ އުޅެން ވަރަށް ފަސޭހަ. މިތަނަށް އަންނަ ގިނަ ކަސްޓަމަރުންނަކީވެސް އަޑު އިވުމުގަ ނުކުޅެދުންތެރިކަން ހުންނަ މީހުން. އެހެންވެ، އަޑު އިވުމުގަ އުނިކަން ހުންނަ ގިނަ ރައްޓެހިންވެސް އަހަންނަށް އެބަ ލިބޭ.ޖިއާންގް ޔޫ؛ ވެންގް ގެ މުވައްޒަފެއް
މިއަދު، ވެންގްގެ ހޮޓްޕޮޓް ރެސްޓޯރަންޓްގެ ކޭންތައް ތަޖުރިބާ ކުރުމަށް، ޗައިނާގެ އެކި ޕްރޮވިންސްތަކުން މީހުން އާދެއެވެ. ގިނައީ އަޑު އިވުމުގެ ހިއްސުގައި އުނިކަން ހުންނަ މީހުންނެވެ.
ވިޔަފާރި އޭގެ މެކުހަށް ޖަހާފައި ވާ އިރު، ވެންގް އަދިވެސް ހުރީ މަޑުޖެހޭ ގޮތަކަށް ނޫނެވެ. އޭނާ މިހާރު މިޞްރާބު ޖަހާފައި ހުރީ އިތުރު ރެސްޓޯރަންޓެއް ހުޅުވުމާ ދިމާއަށެވެ. އެ ރެސްޓޯރަންޓުގައި މަސައްކަތް ކުރަންވެސް އޭނާ އިޚުތިޔާރު ކުރާނީ، އަޑު އިވުމުގެ ހިއްސުގައި އުނިކަން ހުންނަ މީހުން ކަމަށް ވެންގް ވަނީ ބުނެފައެވެ.
