''ދިވެހިރާއްޖޭގެ ޒަކާތު ހައުސް''ގެ ވެބްސައިޓް ލޯންޗުކޮށްފިއެވެ.

މި ވެބްސައިޓް ލޯންޗްކޮށްދެއްވީ އިސްލާމީ މަރުކަޒުގެ އިސް އިމާމް ޝައިހް މުހައްމަދު ލަތީފްއެވެ.

ދިވެހިރާއްޖޭގެ ޒަކާތު ހައުސް އާއި ގުޅޭ އެންމެހައި މައުލޫމާތުތައް ވެބްސައިޓްއިން ލިބޭނެ ކަމަށް އެ އޮފީހުން ބުނެއެވެ.

މިވެބްސައިޓާއި ގުޅޭގޮތުން އިސްލާމިކް މިނިސްޓަރު ޑރ. ޝަހީމް އަލީ ސައީދު ވިދާޅުވީ މި ވެބްސައިޓް މެދުވެރިކޮށް ޒަކާތު ފަންޑު ހިނގަމުންދާ ގޮތުގެ ތަފްސީލްތައް ރައްޔިތުންނަށް ލިބޭނެ ކަމަށެވެ. މިނިސްޓަރު ޝަހީމް ވިދާޅުވީ، އަމާޒަކީ ރާއްޖޭގެ ޒަކާތުގެ ދާއިރާއިން ކުރެވިފައި ހުރި ތާރީހީ މަސައްކަތްތައް އެއްތާކުން ފެންނަން ހުންނާނެގޮތް ހެދުން ކަމަށެވެ. އަދި މިކަމުގެ ސަބަބުން ދިރާސާކުރާ ދަރިވަރުންނަށް ވެސް ވަރަށް ވަރަށް ބޮޑު ލުޔެއް ލިބޭނެ ކަމަށާއި، މައުލޫމާތު ހޯދުމުގައި ދަތިނުވާނެ ކަމަށް މިނިސްޓަރު ވިދާޅުވިއެވެ.

ރައީސުލްޖުމްހޫރިއްޔާއަށް ޤާނޫނު އަސާސީގެ 116 ވަނަ މާއްދާއިން ލިބިވަޑައިގަންނަވާ ބާރުގެ ދަށުން ރައީސުލްޖުމްހޫރިއްޔާ ޑރ.މުޙައްމަދު މުއިއްޒު 'ދިވެހިރާއްޖޭގެ ޒަކާތު ހައުސް' އުފެއްދެވީ 18 ޑިސެމްބަރ 2023ގައެވެ. އަދި މި މަހުގެ 2 ވަނަ ދުވަހު އެމަނިކުފާނު ވަނީ ދިވެހިރާއްޖޭގެ ޒަކާތު ހައުސް އިފްތިތާހްކޮށްދެއްވައިފައެވެ.