މުއިއްޒު ރިޔާސީ ޓިކެޓް ހޯއްދެވީ އަބްދުއްރަހީމަށް ނާޖާއިޒް މަންފާތަކެއް ހޯދައިދީގެންކަމަށް ތުހުމަތުކުރެވޭ، އޭސީސީން މައްސަލަ ބަލަން ޖެހޭ - ފަލާހް
25 ޖެނުއަރީ 2024 | ބުރާސްފަތި 10:02މިކަމުގެ ހަގީގަތް ރާއްޖޭގެ ރައްޔިތުންނަށް އޮޅުންފިލުވާދޭން ޖެހޭ ކަމެއް ކަމަށް ފަލާހު ވިދާޅުވި
ރައީސް ޑރ. މުއިއްޒު އާއި ޕީއެންސީގެ ޗެއާޕަރސަން އަބްދުއްރަހީމް
ރައީސް ޑރ.މުހައްމަދު މުއިއްޒު ޕީޕީއެމް/ ޕީއެންސީގެ ރިޔާސީ ޓިކެޓް ހޯއްދެވީ ޕީއެންސީގެ ޗެއާޕަރސަން އަބްދުއްރަހީމް އަބްދުﷲ އަށް ގިނަ ނާޖާއިޒް މަންފާތަކެއް ހޯއްދަވާދެއްވައިގެން ކަމަށް ތުހުމަތު ކުރެވޭ ކަމަށާއި އެއީ އެންޓި ކޮރަޕްޝަން ކޮމިޝަން، އޭސީސީން ބަލަން ޖެހޭނެ މައްސަލައެއް ކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެންބަރު މުހައްމަދު ފަލާހު ވިދާޅުވެއްޖެއެވެ.
މެންބަރު ފަލާހު މިހެން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
ރައީސް މުއިއްޒު އަށް ޕީއެންސީގެ ރިޔާސީ ޓިކެޓް ލިބިވަޑައިގެންނެވި ގޮތާ މެދު ވެސް ސުވާލު އުފެދޭ ކަމަށާއި، އެއީ ވިޔަފާރި އުސޫލުން ބައްލަވައިގަތް ޓިކެޓެއް ކަަމަށް ތުހުމަތުކުރެވޭ ކަމަށް އޭނާ ވިދާޅުވިއެވެ. އެގޮތުން މާލޭގެ މަސްމާރުކޭޓު މަތީގައި ހުރި ކުދި ހޮޓާފަދަ ތަންތަން ކުއްޔަށްދީފައި ހުރީ ކޮން ބަޔަކަށް ފައިދާ ލިބޭގޮތަށް ތޯ ބަލަން ޖެހޭ ކަމަށް މެންބަރު ފަލާހު ވިދާޅުވިއެވެ. ފަލާހު ވިދާޅުވީ އެ ތަންތަން ދީފައި ހުރީ މިހާރު މި ސަރުކާރުގައި އެންމެ އިސްކޮށް އުޅުއްވާ އަބްދުއްރަހީމަށް އޭގެ މަންފާ ލިބޭ ގޮތަށް ކަމަށް އެނގިވަޑައިގަންނަވާ ކަމަށެވެ. އެހެންކަމުން ޕީއެންސީގެ ރިޔާސީ ޓިކެޓް ބައްލަވައިގަތީ އަބްދުއްރަހީމަށް ގިނަ ފައިދާތަކެއް ހޯއްދަވާދެއްވައިގެން ކަަމަށް ޤަބޫލުކުރައްވާ ކަމަށް މެންބަރު ފަލާހު ވިދާޅުވިއެވެ.
މެންބަރު ފަލާހު ވިދާޅުވީ މި ކަމުގެ ހަގީގަތް ރާއްޖޭގެ ރައްޔިތުންނަށް އޮޅުންފިލުވާދޭން ޖެހޭ ކަމެއް ކަމަށެވެ. މީގެ އިތުރުން ޕްރޮޖެކްޓްތައް ހިންގާއިރު މާލީ ތަނަވަސްކަން ނެތްނަމަ، ސަރުކާރުތަކުން އެކަން ކުރަނީ މަޝްރޫޢު ހިންގާ ފަރާތަށް ޓުއަރިޒަމް އަދި އެހެނިހެން ބޭނުންތަކަށް ރާއްޖެއިން ބައެއް ދީގެން ކަމަށް ފަލާހު ވިދާޅުވިއެެވެ. ނަމަވެސް ރާއްޖޭގެ ރައްޔިތުން ދިރިއުޅޭ ތަނެއްގެ މެދުން ބަޔަކަށް ދިގު މުއްދަތަކަށް 70 ހެކްޓަރު ދިނުމަކީ ރާއްޖޭގެ ސިޔާސަތާއި މަސަލަސްކަމަށް ވެސް ބުރޫ އަރާނެ ކަމެއް ކަމަށް ފަލާހު ވިދާޅުވިއެވެ. ރައީސް މުއިއްޒު އެކަން ވެސް ކުރައްވަނީ ވިޔަފާރި އުސޫލުން ކަމަށް ފަލާހު ވިދާޅުވިއެވެ.
ފަލާހު ވަނީ ރައީސް ޑރ. މުއިއްޒު ކަންކަން ކުރައްވާ އިރު ބައްލަވަން ޖެހޭ ވަރަށް ކަންކަން ނުބައްލަވާ ކަމަށް ވެސް ތުހުމަތުކުރައްވާފައެވެ. އަދި އެމަނިކުފާނު މަސައްކަތް ކުރައްވަނީ އަވަސް އަވަހަށް ވިޔަފާރި އުސޫލުން ކަންކަން ނިންމަވާލައްވަން ކަމަށް ވެސް ފަލާހް ވިދާޅުވިއެވެ. މީގެ އިތުރުން މި ސަރުކާރުގެ ކޮރަޕްޝަން އިންތިހާ އަށް އިތުރުވެފައިވާ ކަމަށް ފާހަގަކުރައްވާ ފަލާހު ވަނީ އެކަމަށް ވެސް ފާޑުވިދާޅުވެފައެވެ.
