ގޮތްދޫކުރައްވަން މަސީހު ބޭނުމެއްނުވި، އެއިންނަވަނީ ވަށައިގެން ސިފައިން އަތުރައިގެން: އިބޫ
މަޖިލީހުގެ ޖަލްސާ ފެށުމުގެ ކުރިންވެސް ސިފައިން ވަނީ ޗެމްބަރުގެ ތެރެއަށް ވަދެފަ
މަޖިލީހުގެ ރައީސް މަސީހު ރިޔާސަތުގައި އިންނެވިއިރު، އިދާރީ މުވައްޒަފުން ކޮޅަށް، އަދި ސިފައިން ޗެމްބަރުގެ އެތެރޭގައި
ރައްޔިތުންގެ މަޖިލީހުގެ ރައީސް އަބްދުﷲ މަސީހުއާއި ބައްދަލުކުރައްވައި މަޖިލީހުގެ ކަންކަން ހައްލު ކުރުމަށް މަސައްކަތް ކުރެއްވި ނަމަވެސް މަސީހުގެ ވަށައިގެން ސިފައިން ބައިތިއްބައިގެން ހަމައެއްގޮތަކަށްވެސް ގޮތް ދޫކުރައްވަން ނޫޅުއްވި ކަމަށް ރައްޔިތުންގެ މައިނޯރިޓީ ލީޑަރ އިބްރާހީމް މުހައްމަދު ސޯލިހު (އިބޫ) ވިދާޅުވެއްޖެއެވެ.
ހޯމަ ދުވަހު ރައްޔިތުންގެ މަޖިލީހުން ބާއްވަން އުޅުނު މަޖިލީހުގެ މިއަހަރުގެ ދެވަނަ ދައުރުގެ އަށް ވަނަ ޖަލްސާ ކުރިއަށް ގެންވޭގޮތް ނުވެ، ބޮޑު ހަމަނުޖެހުމަކަށް ގޮސްފައިވަނީ މަޖިލީހުގެ ގަވާއިދާ ހިލާފަށް މަޖިލީހުގެ ރައީސް އަބްދުﷲ މަސީހު މުޙައްމަދު ކަންކަން ކުރައްވަމުން ގެންދަވާތީ ކަމާއި ކަންކަން ހައްލު ކުރުމަށް މަސީހު ބޭނުންފުޅު ވެނުލައްވާކަމަށްވެސް އިބޫ ވިދާޅުވިއެވެ.
"މަޖިލީހުގެ ކަންކަން ހައްލުކުރުމަށް ބައްދަލުކުރުމަށް އައިއިރު މިއޮތީ މަޖިލީހުގެ ރައީސްގެ ކޮޓަރި ކޮޅު ދޮރުމަތީ އެމްއެންޑީއެފް މީހުން އަތުރާލާފަ. ބައްދަލުވީކީނޫން. ވާހަކައެއް ނުދެއްކޭ. ދެން އަޅުގަނޑަކަށް ނޭނގޭ މަޖިލިސްގެ މަސައްކަތްތައް ކުރާނެ ގޮތެއް. ގަވާއިދެއް އެއްޗަކަށް އަމަލުކުރަނީއެއް ނޫން. ގަވާއިދުގެ ތެރެއިން މިހާރު ކަންކަން ކުރަން އުޅުމުގެ ބޭނުމެއް މިހާރަކުނެތް. އަޅުގަނޑުމެން މިހާރުވެސް މަސައްކަތް މިކުރަނީ މަޖިލިސްގެ ކަންކަން ރަނގަޅުކުރެވޭނެ ގޮތެއް ފެނޭތޯ. ހަމަ ހިލާ ގޮތް ދޫނުކުރަންވަން އެއިންނަވަނީ މަސީހު ވަށައިގެން ސިފައިން ލައިގެން،" އިބޫ ވިދާޅުވިއެވެ.
މީގެ އިތުރުން އިބޫ ވިދާޅުވީ މަޖިލީހުގެ ޖަލްސާ ފެށުމުގެ ކުރިން މަޖިލީހުގެ ޗެމްބަރުގެ ތެރެއަށް ސިފައިން ވަނުމަކީ މަނާކަމެއް ކަމަށެވެ.
މަޖިލީހުގެ ސަލާމަތީ ކަންކަން ބަލަހައްޓާ ސިފައިންނަށް މަޖިލީހުގެ ޗެމްބަރުގެ ތެރެއަށް ވަނުމުގެ ހުއްދަ ލިބިގެން ވަނީ މަޖިލީހުގެ ރިޔާސަތުން މެމްބަރެއްގެ ނަން އިއްވުމުން، ޗެމްބަރުގެ ތެރެއިން އެ މެމްބަރު ނިކުމެވަޑައި ނުގެންފިނަމަ، އެ މެމްބަރުން ޗެމްބަރުގެ ތެރެއިން ނެރުމަށްޓަކައި ލިޔުމުން އެކަން މަޖިލީހުގެ ސެކިއުރިޓީ ބަލަހައްޓާ ފަރާތްތަކާއި އެންގުމުންނެވެ.
ގުޅިފައިވާ ސިޔާސީ ޕާޓީތަކުގެ މެމްބަރުން ވިދާޅުވެފައިވަނީ މަޖިލީހުގެ ޖަލްސާއެއް ބޭއްވުމަށް މަސީހު ޗެމްބަރުގެ ތެރެއަށް ވެންނެވި ނަމަވެސް މަޖިލިސް ކުރިއަށް ނުގެންދެވޭ ކަމަށެވެ.
މަސީހު ރިޔާސަތުގައި އިންނެވުމަށްފަހު ކުޑަ ވަގުތު ކޮޅެއްގެ ތެރޭގައި މަސީހު ވަނީ މަޖިލިސް ދޫކުރައްވާ ޗެމްބަރުގެ ތެރެއިން ނިކުމެވަޑައިގަންނަވާފައެވެ.
މަޖިލީހުގެ ރައީސްގެ ކޮޓަރިކޮޅަށް މަސީހު ވެންނެވުމާއިއެކު ގުޅިފައިވާ ސިޔާސީ ޕާޓީތަކުގެ މެމްބަރުންގެ ފަރާތުން އިބޫ ވަނީ މަސީހާއި ބައްދަލުކުރެއްވުމަށް މަސައްކަތް ކުރައްވާފައެވެ.
ނަމަވެސް މަޖިލީހުގެ ރައީސްގެ ކޮޓަރި ކޮޅު ކައިރީގައި 15 ވަރަކަށް ސިފައިން ވަނީ އެއްވެސް މެމްބަރަކަށް ނުވަދެވޭގޮތަށް ސަފަކަށް އެތުރިފައެވެ.
މަޖިލީހުގެ ޗެމްބަރުގެ ތެރެއަށް ގިނަ އަދަދެއްގެ ސިފައިން ވަދެ ގުޅިފައިވާ ސިޔާސީ ޕާޓީތަކުގެ ބައެއް މެމްބަރުން ޗެމްބަރުން ނެރުމަށް ސިފައިން މަސައްކަތް ކުރުމުގެ ތެރޭގައި ބައެއް މެމްބަރުންނަށް އަނިޔާވެފައިވެސްވެއެވެ.
