ސްޕެއިންގެ ރެއާލް މެޑްރިޑަށް ކުޅެމުން އަންނަ ބްރެޒިލްގެ އެޑާ މިލިޓާއޯ، އެ ކުލަބުގެ އެއްބަސްވުން އައުކޮށްފި އެވެ.

އުމުރުން 26 އަހަރުގެ ކުޅުންތެރިޔާ ރެއާލަށް ބަދަލުވީ 2019 ވަނަ އަހަރު އެވެ. އެ ކުލަބާއެކު އޭނާ ސޮއި ކުރީ ހަ އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާން އޮތީ އަންނަ އަހަރުގެ ޖޫން މަހުގެ ނިޔަލަށެވެ. ނަމަވެސް، ރެއާލްގައި މިލިޓާއޯ ދައްކަމުން އަންނަ ކުޅުމުގެ ސަބަބުން، އޭނާ އަކީ އެ ޓީމަށް މުހިންމު ކުޅުންތެރިޔެކެވެ. އެހެންކަމުން، ރެއާލުން ވަނީ ބާކީ އެއް އަހަރު އޮއްވާ އޭނާގެ އެއްބަސްވުން އައު ކޮށްފަ އެވެ.

ރެއާލްގެ އެއްބަސްވުން މިލިޓާއޯ އައު ކުރީ އިތުރު ތިން އަހަރު ދުވަހަށެވެ. އެހެންކަމުން، މިހާރު ރެއާލާއެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށެވެ. އޭނާ ކުލަބުގައި ބައްޓައި، އެއްބަސްވުން އައު ކުރުމަށް އެންމެ ބޮޑަށް ބާރު އެޅީ އެ ޓީމުގެ ކޯޗު ކާލޯ އަންޗެލޮޓީ ކަމަށް މީޑިއާ ރިޕޯޓުތައް ވަނީ ބުނެފަ އެވެ. އައު އެއްބަސްވުމުގެ ދަށުން، މިލިޓާއޯގެ ރިލީޒް ކްލޯސް އަކީ އެއް ބިލިއަން ޔޫރޯ އެވެ.

މިިލިޓާއޯ ވަނީ މިހާތަނަށް ރެއާލަށް ކުޅެދިން 143 މެޗުގައި 11 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ، އަށް ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ސްޕެނީޝް ލީގު ދެ ފަހަރު، ކޮޕާ ޑެލް ރޭ އެއް ފަހަރު، ސްޕެނިޝް ސުޕަ ކަޕް ދެ ފަހަރު، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް އެއް ފަހަރު ކާމިޔާބު ކުރުން ހިމެނެ އެވެ.