ހަތަރު ލަނޑުން މޮޅުވެ، ލިވަޕޫލަށް އެއްވަނައިގައި ފަސް ޕޮއިންޓްގެ ލީޑެއް

ހަތަރު ލަނޑުގެ މޮޅެއް ހޯދައިގެން, އިނގިރޭސި ޕްރިމިއަރ ލީގު ތާވަލްގެ އެއްވަނައިގައި ލިވަޕޫލުން 5 ޕޮއިންޓްގެ ލީޑެއް ނަގައިފި އެވެ.

ލިވަޕޫލް ލީޑް ފުޅާކުރީ 4-0 ން ބޯންމައުތް ބަލިކޮށްގެންނެވެ. މެޗުގައި ލިވަޕޫލްގެ ފުރަތަމަ ލަނޑާއި, ފަހު ލަނޑު ޖެހީ ޑާވިންގ ނޫނޭޒް އެވެ. ފުރަތަމަ ލަނޑު ދެވަނަ ހާފް ފަށައިގެން ހަތަރު ވަނަ މިނިޓްގައި އަދި ފަހު ލަނޑު ޖެހީ މެޗުގެ އިތުރު ވަގުތުގައެވެ. އަނެއް ދެ ލަނޑު ދެވަނަ ހާފްގައި ޖެހީ ޖޮޓާއެވެ. އޭނާ ދެ ލަނޑު ޖެހީ ނުވަ މިނިޓްގެ ތެރޭގައެވެ. އެއީ 70 ވަނަ މިނިޓާއި, 79 ވަނަ މިނިޓް ގައެވެ. ލިވަޕޫލުން މިހާރު ކުޅެމުން ދަނީ އެއްވަނަ ފޯވާޑް ސަލާހު ނުލައެވެ. އޭނާ އެފްރިކަޕް ކަޕަށް ގައުމީ ޓީމަށް ދޫކޮށްފައި ވަނިކޮށް, އެމުބާރާތުގެ ތެރެއިން ވަނީ އަނިޔާ ވެފައެވެ.

ލިވަޕޫލް ލީގު ތާވަލްގެ އެއްވަނައިގައި އޮތީ 21 މެޗުން 48 ޕޮއިންޓާ އެކުއެވެ. ދެވަނައިގައި މެންޗެސްޓަރ ސިޓީ އޮތީ 20 މެޗުން 43 ޕޮއިންޓާއެކު އެވެ. އާސެނަލް އޮތީ 21 މެޗުން 43 ޕޮއިންޓާއެކު ތިން ވަނައިގަ އެެވެ. ހަތަރު ވަނައިގައި އޮތީ 21 މެޗުން 43 ޕޮއިންޓާއެކު އެސްޓަން ވިލާ އެވެ.