"މާލެސިޓީ މޭޔަރު އިންތިޚާބު އެމްޑީޕީން ކާމިޔާބުކުރުމުން އެނގެނީ މި ސަރުކާރު ގެނެސްގެން ރައްޔިތުންނަށް ހެދުނީ ގޯހެއްކަން އިހުސާސްކުރެވިއްޖެކަން"
21 ޖެނުއަރީ 2024 | އާދީއްތަ 03:32މާލެ ސިޓީގެ މޭޔަރު ބައި-އިލެކްޝަން، 7621 ވޯޓާއެކު ކާމިޔާބުކުރެއްވީ އެމްޑީޕީގެ ކެންޑިޑޭޓް އާދަމް އާޒިމް
ކުރީގެ ފިޝަރީޒް މިނިސްޓަރު ޑރ.އިބްރާހީމް ދީދީ
މާލެސިޓީ މޭޔަރު އިންތިޚާބު އެމްޑީޕީއަށް ކާމިޔާބުކުރެވުމުން، މި ސަރުކާރު ގެނެސްގެން ރައްޔިތުންނަށް ހެދުނީ ގޯހެއް ކަން އިހުސާސްކުރެވިއްޖެކަން އެނގޭ ކަމަށް ކުރީގެ ފިޝަރީޒް މިނިސްޓަރު ޑރ.އިބްރާހީމް ދީދީ ވިދާޅުވެއްޖެއެވެ.
އޭނާ މިފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ. ޑރ.ދީދީ ވިދާޅުވީ ރައްޔިތުން މި ސަރުކާރު އިންތިޚާބުކުރީ ސަރުކާރުން ދެއްކި ވާހަކަތައް ވަރަށް ބޮޑަށް ގަބޫލުކޮށްގެން ކަމަށެވެ. ނަމަވެސް ވެރިކަމާ ހަވާލުވެ، އަމަލުކުރަމުންދާ ގޮތުން ވަރަށް ބޮޑަށް އާއްމުން މާޔޫސްވެފައިވާ ކަމަށް އޭނާ ވިދާޅުވިއެވެ. އެގޮތުން ބޭރުގެ ސިފައިން ރާއްޖޭގައި ތިބި ކަމަށް ބުނެ ދެއްކި ވާހަކަތަކާއި، އެ ނޫންވެސް ވާހަކަތަކުގައި އިންތިހާ އަށް ދޮގު ހިމެނޭކަން މިހާރު ރައްޔިތުންނަށް އެނގޭ ކަމަށް ވިދާޅުވިއެވެ. އެންމެ ބޮޑު އާބާދީ އެއް އޮތް މާލެއިން ސަރުކާރަށް ނޫނެކޭ ބުނުމަކީ ސަރުކާރަށް ވަރަށް ވަރުގަދަ މެސެޖެއް ލިބޭކަމެއް ކަަމަށާއި އެއީ ސަރުކާރަށް އާއްމުން ނޫނެކޭ ބުނުން ކަމަށް އޭނާ ވިދާޅުވިއެވެ.
ދާއިމީ ނަތީޖާއިން ދައްކާގޮތުގައި، މާލެ ސިޓީގެ މޭޔަރު ބައި-އިލެކްޝަން، 7621 ވޯޓާއެކު ކާމިޔާބުކުރެއްވީ އެމްޑީޕީގެ ކެންޑިޑޭޓް އާދަމް އާޒިމެވެ. އެއީ އެ އިންތިޚާބުގައި ވޯޓުލީ މީހުންގެ 44.81 އިންސައްތައެވެ.
މިދިޔަ ހަފްތާގެ ހޮނިހިރު ދުވަހު ބޭއްވި ބައި-އިލެކްޝަންތަކަކީ މާލެ ސިޓީ މޭޔަރުގެ ބައި-އިލެކްޝަނާއި، މާލެ ސިޓީ ކައުންސިލްގެ މާފަންނު ދެކުނު ދާއިރާއާއި މެދުހެންވޭރު ދާއިރާއާއި ހެންވޭރު ދެކުނު ދާއިރާގެ ބައި- އިލެކްޝަނެވެ. މީގެ އިތުރުން މ. މުލަކު އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި- އިލެކްޝަން ވެސް ވަނީ ބާއްވާފައެވެ.
